ރާޖަޕަކްސަގެ އާއިލާއަށް ސޮނެވާއިން ވިލާއެއް ވިއްކަން އުޅޭ ވާހަކަ ދޮގުކޮށްފި

ސްރީ ލަންކާގެ ކުރީގެ ބޮޑުވަޒީރު މަހިންދަ ރާޖަޕަކްސާ އޭނާގެ އާއިލާ އަށް، ސޮނެވާގެ ރިސޯޓަކުން ވިލާއެއް ބައްލަވައިގަންނަން އުޅޭ ކަމަށް ބުނެ ދެކެވޭ ވާހަކަތައް ސޮނެވާ އިން މިއަދު ދޮގުކޮށްފި އެވެ.

ސޮނެވާ އިން މިއަދު ނެރުނު ނޫސްބަޔާނެއްގައި ބުނީ ރާޖަޕަކްސާގެ އާއިލާ އަށް އެތަނުގެ ރިސޯޓަކުން ވިލާއެއް ވިއްކުމަށް މަޝްވަރާކުރަމުން އަންނަ ކަމަށް ބުނެ ފަތުރާފައިވަނީ ދޮގު ޚަބަރެއް ކަމަށެވެ. އެތަނުން ބުނީ ސޮނެވާގެ އެއްވެސް ޕްރޮޕަޓީއެއް ރާޖަޕަކްސާގެ އާއިލާ އަށް ވިއްކުމަށް މަޝްވަރާކޮށްފައި ނުވާ ކަމަށެވެ.

ސޮނޭވާގެ ވިލާއެއް ރާޖަޕަކްސަގެ އާއިލާއަށް ވިއްކަން އުޅޭ ކަމަށް ބުނާ ލިޔުމުގައި ބުނެފައިވަނީ ރާޖަޕަކްސައަށް އެކަން ހުށަހެޅުއްވީ މިހާރު އެ ގައުމަށް ވަޑައިގެން އުޅުއްވާ ރާއްޖޭގެ ރައްޔިތުން މަޖިލީހުގެ ރައީސް މުހައްމަދު ނަޝީދު ކަމަށެވެ. ނަޝީދަކީ ސޮނެވާގެ ސީއީއޯ ސޯނޫ ޝިވްދަސާނީއާ ވަރަށް ގާތް ބޭފުޅެއް ކަމަށާއި ރާޖަޕަކްސާގެ އާއިލާ އަށް ރާއްޖެއިން ހިމާޔަތް ދޭނެ ކަމަށް ނަޝީދު ވިދާޅުވި ކަމަށް ވެސް އޭގައި ބުނެފައިވެ އެވެ.

އިގްތިސާދީ ދަތިކަމާ އެކު ސިޔާސީ ހަމަނުޖެހުމެއްގެ ތެރޭގައި އޮތް ލަންކާއަށް ނަޝީދު ވަޑައިގަތީ އެ ގައުމަށް ބޭރުގެ އެހީ ހޯދުމުގެ މަސައްކަތުގެ މަންދޫބެއްގެ ގޮތުންނެވެ. ލަންކާގެ ސިޔާސީ އެކި ބޭފުޅުންނާ ބައްދަލުކުރެއްވުމަށް ފަހު ނަޝީދު ވަނީ ރާއްޖެ ވަޑައިިގެންފަ އެވެ.

ޕްރައިވެޓް ވިލާއެއް ވިއްކާލަން އެއްބަސްވީ 12 މިލިއަން ޑޮލަރަށް ކަމަށާއި ރާޖަޕަކްސާ އާއިލާގެ މުވައްޒަފުންނާއި ސެކިއުރިޓީ ތިބެން، ތިން މިލިއަން ޑޮރަލަށް ދޭ އިތުރު ވިލާއެއް ވިއްކުމަށް ވެސް އެއްބަސްވި ކަމަށް ޚަބަރު ފަތުރާފައިވެ އެވެ.

އެ ތުހުމަތުތައް ދޮގުކޮށް ސޮނެވާއިން ނެރުނު ބަޔާނުގައި ބުނީ ރާޖަޕަކްސާ ނުވަތަ އެ އާއިލާގެ އެހެން ބޭފުޅަކަށް ވެސް ވިލާއެއް ވިއްކުމަށް މަޝްވަރާކޮށްފައި ނުވާނެ ކަމަށެވެ. އަދި ސޮނެވާގެ ސީއީއޯ ސޯނޫ، ރާޖަޕަކްސާ ނުވަތަ އެ އާއިލާއާ ގުޅުން އޮންނަ އެއްވެސް މީހަކާ ވެސް މިހާތަނަށް ބައްދަލުކުރައްވައިފައި ނުވާނެ ކަމަށެވެ.

"ރާއްޖޭގެ ވެބްސައިޓަކުން އެފަދަ އެއްވެސް ހަގީގަތެއް ނެތް ދޮގު ޚަބަރުތައް ފަތުރާތީ ވަރަށް ކަންބޮޑުވޭ،" އެ ބަޔާނުގައިވެ އެވެ.

ލަންކާ އަށް ކުރައްވާ ދަތުރުފުޅުގައި ނަޝީދު ވަނީ ރާޖަޕަކްސާ އާއިލާގެ ބައެއް ބޭފުޅުންނާ ބައްދަލުކުރައްވައިފަ އެވެ. ނަޝީދު ލަންކާ އަށް ވަޑައިގަތީ، އެ ގައުމަށް ކުރިމަތިވެފައިވާ އިގްތިސާދީ ހީނަރުކަމުން އަރައިގަތުމަށް އެ ގައުމަށް ބޭރު އެހީ ހޯދުމުގެ ޒިންމާ، އެ ގައުމުގެ ބޮޑުވަޒީރު ރަނިލް ވިކްރަމަސިންހަ އޭނާއާ ހަވާލުކުރެއްވުމުންނެވެ. އެ ޒިންމާ ހަވާލުކުރެއްވީ ނަޝީދާ އެކު ރަނިލް ބޭއްވި ބައްދަލުވުމެއްގައި އެކަމަށް އޭނާ އެދިވަޑައިގަތުމުންނެވެ.

ބޮޑުވަޒީރުކަމުން ރާޖަޕަކްސާ އިސްތިއުފާ ދެއްވީ، ގައުމު ބަނގުރޫޓުވުމުން ރައްޔިތުންގެ ނުކުމެ ކުރި މުޒާހަރާތަކުގެ ސަބަބުން ޕްރެޝަރު ބޮޑުވެގެންނެވެ.