ދަރަނބޫދޫގައި އިތުރު ދަނޑަކަށް ގެއްލުންދީ، 77 ކިލޯގެ ފަޅޯ ބޭނުންނުކުރެވޭ ވަރު ކޮށްލައިފި

ފ. ދަރަނބޫދޫގެ ކަރާ ދަނޑުތަކަކަށް މިދިޔަ ހުކުރު ދުވަހުގެ ރޭ ދަންވަރު ގެއްލުން ދީފައި ވަނިކޮށް، ރޭ ދަންވަރު ފަޅޯ ދަނޑަކަށް ވެސް ގެއްލުން ދީފި އެވެ.

އެ ރަށު ކައުންސިލްގެ ރައީސް އަބްދުލްހަމީދު އާދަމް މިއަދު ވިދާޅުވީ ރަށުގެ ހުޅަނގު ފަރާތުގައި އޮތް އެ ފަޅޯ ދަނޑުގައި ހުރި 20 ފަޅޯގަސް ބުރިކޮށްލާފައިވާ ކަމަށެވެ. މިހާރު އެ މައްސަލަ ވެސް ފުލުހުންނަށް ރިޕޯޓްކޮށްފައިވާ ކަމަށް ވިދާޅުވި އެވެ.

ދަރަނބޫދޫން ވާހަ ކަދެއްކި މީހަކު ބުނީ އެ ދަނޑުން 77 ކިލޯގެ ފަޅޯ ބޭނުންނުކުރެވޭ ވަރަށް ހަލާކުކޮށްފައިވާ ކަމަށެވެ.

ހުކުރު ދުވަހުގެ ރޭ ގެއްލުން ދިނީ އެ ރަށުގެ އިރުމަތީ ފަރާތުގައި އޮތް، ދެ މީހެއްގެ ތިން ދަނޑަކަށެވެ. ބަޔަކު އެ ދަނޑުތަކަށް ވަދެ، ކަރަ އާއި މެލަން ބިނދެ އަދި މޭވާތަކާއި ގަސްތަކަށް ގެއްލުން ދީފައިވެ އެވެ. އެ ދަނޑުތަކުގައި ހުރި ފަޅޯ ގަސްތައް ވެސް ހުރީ ބުރިކޮށް، އެ ސަރަހައްދަށް އުކާލާފައި ކަމަށް ކައުންސިލުން ބުންޏެވެ.

އެ ހަތަރު ދަނޑަކީ ވެސް އެ ރަށުގެ މީހުން ދަނޑުވެރިކަން ކޮށްގެން އާމްދަނީ ހޯދާ ތަންތަނެވެ. އަދި އެއީ އެކި މީހުންގެ ދަނޑުތަކެވެ.

އެއީ ގަސްތުގައި ކުރި ކަމަކަަށް ވިޔަސް އަދި ތުހުމަތުކުރެވޭ މީހަކު ނެތް ކަމަށް ކައުންސިލުން ބުންޏެވެ.