އައްޑޫ ފައްޔާޒަށް، މާލެ އާއި ފުވައްމުލައް އިންތި އަށް!

އެމްޑީޕީގެ ޗެއާޕާސަން އިންތިހާބުގައި އައްޑޫ ދާއިރާތަކުގެ ގިނަ ވޯޓު އިކޮނޮމިކް މިނިސްޓަރު ފައްޔާޒް އިސްމާއިލް ކާމިޔާބު ކުރެއްވިއިރު މާލެ އިން އެމްޑީޕީގެ މެޖޯރިޓީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ހޯއްދަވައިފި އެވެ.

އެމްޑީޕީން މިހާތަނަށް ބޭއްވި އެންމެ ވާދަވެރި އިންތިހާބުގެ ވަގުތީ ނަތީޖާ ދައްކާ ގޮތުން އައްޑޫ ހިތަދޫ އުތުރު ދާއިރާ އާއި ހިތަދޫ ދެކުނު ދާއިރާ އާއި މީދޫ ދާއިރާ އަދި ހުޅުދޫ ދާއިރާ ކާމިޔާބު ކުރެއްވީ ފައްޔާޒެވެ.

އައްޑޫން އިންތި ކާމިޔާބު ކުރެއްވީ މަރަދޫ ދާއިރާ އާއި ހިތަދޫ މެދު ދާއިރާ އެވެ. އެއީ ފައްޔާޒުގެ ފަހަތުގައި ހުންނެވި އިބްރާހިމް ޝަރީފް (މަވޯޓާ) އާއި އިންތި އަށް ތާއީދު ކުރެއްވި އަހުމަދު ރަޝީދު (ޗެކްމާކް) ގެ ދާއިރާ އެވެ.

މާލެއިން ފައްޔާޒަށް ކާމިޔާބު ކުރެއްވުނީ ހުޅުމާލެ އާއި ހެންވޭރު ދެކުނު ދާއިރާ އާއި މާފަންނު ހުޅަނގާއި މާފަންނު ދެކުނު ދާއިރާ އެވެ. މާލޭގެ ދެން އޮތް 12 ދާއިރާ އިން ގިނަ ވޯޓު ހޯއްދެވީ އިންތި އެވެ.

ފުވައްމުލަަކު އުތުރާއި ދެކުނު ދާއިރާ އިންތި ކާމިޔާބު ކުރެއްވި އިރު ފައްޔާޒް ކާމިޔާބު ކުރެވުނީ ފުވައްމުލަަކު މެދު ދާއިރާ އެކަންޏެވެ.

އިންތި ޓީމުގެ މުހިންމު ދާއިރާތަކުގައި ކުޑަ ތަފާތެއް!

ވަގުތީ ނަތީޖާ އިން ދައްކާ ގޮތުގައި އިންތިގެ ޓީމުގައި އެންމެ އިސްކޮށް ހަރަކާތްތެރިވެ ވަޑައިގަތް ބައެއް މެމްބަރުންގެ ދާއިރާތަކުން ލިބުނު ވޯޓުގެ ފަރަގު ވަރަށް ކުޑަ އެވެ.

ފައްޔާޒާއި ސަރުކާރަށް އެންމެ ބޮޑަށް ފާޑު ވިދާޅުވަމުން ގެންދެވި މެދު ހެންވޭރު ދާއިރާގެ މެމްބަރު އަލީ އާޒިމްގެ ދާއިރާ، އިންތި އަށް ކާމިޔާބު ކުރެއްވުނީ 44 ވޯޓުގެ ތަފާތަކުންނެވެ. ކުރީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފްގެ ދާއިރާ އިންތި އަށް ކާމިޔާބު ކުރެއްވުނީ އެންމެ 10 ވޯޓުގެ ތަފާތުންނެވެ.

އޭގެ އިތުރުން މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ)ގެ ދާއިރާ ވެސް އިންތި ކާމިޔާބު ކުރެއްވީ 17 ވޯޓުގެ ތަފާތަކުން ކަމަށް ނަތީޖާތަކުން ދައްކަ އެވެ.

އައްޑޫ ސިޓީގެ މެމްބަރެއްގެ ގޮތުގައި އިންތިގެ ޓީމުގެ ކުރީގައި އުޅުއްވި އިލްޔާސް ލަބީބްގެ ހުޅުދޫ ދާއިރާ އިންތި އަށް ވަނީ ގެއްލިފަ އެވެ. އެ ދާއިރާ 362 ވޯޓުން ކާމިޔާބު ކުރެއްވީ ފައްޔާޒެވެ.

އޭގެ ބަދަލުގައި އައްޑޫން އިންތި ކާމިޔާބު ކުރައްވާފައި ވަނީ ފައްޔާޒް ޓީމުގައި އިސްކޮށް އުޅުއްވި މެމްބަރު އިބްރާހިމް ޝަރީފްގެ މަރަދޫ ދާއިރާ އެވެ.

ޗެއާޕާސަން އިންތިހާބުގައި 50،000 އާ ގާތް ކުރާ އަދަދަކަށް އެމްޑީޕީގެ އާންމު މެމްބަރުން ވޯޓުލާން ނިކުތެވެ. އޭގެ ތެރެއިން 58 ޕަސެންޓު ވޯޓު ދިނީ ފައްޔާޒަށެވެ.

ތިން އަތޮޅެއް ފިޔަވައި އެހެން އަތޮޅުތައް ފައްޔާޒަށް

ފައްޔާޒަށް އެންމެ ތަފާތު ބޮޑުކޮށް ކާމިޔާބު ހޯއްދެވިފައިވާ ދާއިރާ އަކީ ރައީސް އިބްރާހިމް މުހަންމަދު ސޯލިހުގެ އުފަން ރަށް، ހިންނަވަރު ދާއިރާ އެވެ. އެ ދާއިރާގައި ބަހައްޓާފައިވާ ދެ ފޮށިން 94 ޕަސެންޓް ކާމިޔާބު ކުރެއްވި އެވެ.

މިހާތަނަށް ވޯޓުގެ ނަތީޖާ ދައްކާ ގޮތުން އިންތި އަށް ކާމިޔާބު ކުރެއްވުނީ މާލެ އާއި ފުވައްމުލަކުގެ އިތުރުން ވ. އަދި ދ. އަތޮޅެވެ. އެހެން ނަމަވެސް، އެ އަތޮޅުތައް ވެސް ކާމިޔާބު ކުރެއްވިފައި ވަނީ އެހާ ބޮޑު ތަފާތަކުން ނޫނެވެ.

އަތޮޅުތަކަށް ބަލާއިރު ފައްޔާޒު ތަފާތު ބޮޑުކޮށް ކާމިޔާބު ކުރެއްވި އަތޮޅުތަކުގެ ތެރޭގައި، ހއ. އަތޮޅާއި ހދ. އަތޮޅާއި ށ. އަތޮޅާއި ނ. އަތޮޅާއި ޅ. އަތޮޅާއި މާލެ އަތޮޅު ހިމެނެ އެވެ. ފައްޔާޒާއި އިންތިއާ ދޭތެރޭ ޖުމްލަ އަށެއްކަ ހާސް ވޯޓުގެ ތަފާތު އުޅޭއިރު ފައްޔާޒު ތަފާތު ބޮޑުކުރައްވާފައި ވަނީ ވެސް އެ އަތޮޅުގެ އެކި ދާއިރާތަކުންނެވެ.