ހަރަދު ކުޑަކުރަން ނެޓްފްލިކްސް އިން މޭގަން މާކްލްގެ ޕްރޮޖެކްޓް ކެންސަލްކޮށްފި

ހަރަދު ކުޑަކުރުމުގެ ގޮތުން ނެޓްފްލިކްސް އިން މޭގަން މާކްލްގެ ޕްރޮޖެކްޓް ކެންސަލްކޮށްފި އެވެ.

މޭގަން ޕްރޮޑިއުސްކުރާ "ޕާލް" ކިޔާ އެ އެނިމޭޓެޑް ސީރީޒް އިއުލާންކުރީ މިދިޔަ އަހަރު އެވެ.

މިދިޔަ މަހު ނެޓްފްލިކްސް އިން ބުނި ގޮތުގައި އެ ޕްލެޓްފޯމް ބޭނުންކުރާ މީހުންގެ އަދަދު މި އަހަރުގެ ފުރަތަމަ ކުއާޓާގައި ވަނީ ވަރަށް ބޮޑަށް މަދުވެފަ އެވެ. މި އަހަރު ނިމޭއިރު ދެ މިލިއަން ކަސްޓަމަރުން ގެއްލޭނެ ކަމަށް ލަފާކޮށްފައިވެ އެވެ.

އެކަމާ ގުޅިގެން ނެޓްފްލިކްސް އިން ދަނީ ކުންފުނީގެ ހަރަދު ކުޑަކުރުމުގެ ގޮތުން ބައެއް މުވައްޒަފުން ވަކިކޮށް، ކުރިން އިއުލާންކޮށްފައިވާ ބައެއް ޕްރޮޖެކްޓުތައް ވެސް ހުއްޓާލަމުންނެވެ.

އެ ޕްރޮޖެކްޓް ހުއްޓާލި ނަމަވެސް، މޭގަންގެ ޕްރޮޑަކްޝަން ހައުސް "އާޗިވެލް" އާ އެކު ފަށާފައިވާ އެހެން ޕްރޮޖެކްޓުތައް ކުރިއަށް ގެންދާނެ ކަމަށް ނެޓްފްލިކްސް އިން ބުންޏެވެ.