ސިއްހީ ސަބަބުތަކާ ހެދި ބަންދުން ދޫކުރަން ދެން އަމުރެއް ނުކުރެވޭނެ: ހައި ކޯޓް

ޝަރީއަތް ނިމެންދެން ބަންދުކޮށްފައި ތިބޭ މީހުން ސިއްހީ ސަބަބުތަކަށްޓަކައި މީގެފަހުން ބަންދުން ދޫނުކުރެވޭނެ ކަމަށް ހައި ކޯޓުން މިއަދު ކަނޑައަޅައިފި އެވެ.

ޝަރީއަތް ނިމެންދެން ބަންދުކުރާ މީހުންގެ ބަންދު ކޮންމެ 30 ދުވަހަކުން މުރާޖާ ކުރާއިރު ސިއްހީ ސަބަބުތަކަށްޓަކައި އަދި ޖަލުގައި އެކަށީގެންވާ ފަރުވާ ނުލިބޭ ކަމުގެ ޝަކުވާތަކާ ހެދި ގިނަ ބަޔަކު ދަށު ކޯޓުތަކުން ބަންދުން ދޫކުރެ އެވެ. އެކަން އެގޮތަށް ކުރެވިދާނެ ކަމަށް ހައި ކޯޓުގެ ނިންމުންތަކެއް އޮވެ އެވެ.

އެކަމަކު ހައި ކޯޓުގެ ކުރީގެ ނިންމުންތަކާ މިއަދު ދުރަށް ގޮސް، އެކަން އެގޮތަށް ނުކުރެވޭނެ ކަމަށް އެ ކޯޓުން މިއަދު ނިންމީ 130 ކިިލޯ ޑްރަގް މައްސަލާގައި ދައުވާލިބޭ ދެ މީހަކު ދަށު ކޯޓުން ދޫކޮށްލާފައި ވަނިކޮށް އެ މީހުން އަލުން ބަންދުކުރަން ކުރި ހުކުމުގަ އެވެ.

ހައި ކޯޓުގެ ދެ ފަނޑިޔާރުން އަޣުލަބިއްޔަތުން ކުރެއްވި އެ ހުކުމުގައިވަނީ ބަންދު މުރާޖާ ކުރާއިރު ބަލަން ޖެހެނީ އެ މީހަކު ބަންދުގައި ބަހައްްޓަންޖެހޭ ސަބަބު ދެމިއޮތްތޯ އެކަނި ކަމަށާއި އަދި އެކަމުގައި ސިއްހީ ސަބަބުތަކަށް ރިއާޔަތް ކުރަން ޖެހޭނެ ކަމަށް ބުނާ ގާނޫނީ އުސޫލެއް ނެތް ކަމަށެވެ. އަދި ގާނޫނެއްގައި އެކަން ބަޔާން ނުކޮށް، އެ ބާރު ފަނޑިޔާރުންނަށް ދޫކޮޮށްލުމުން ހަމަހަމަކަން ގެއްލިދާނެ ކަމަށް ހުކުމުގައިވެ އެވެ.

"ސިއްހީ ހާލަތަށް ރިއާޔަތްކޮށް، އެ ފަރާތެއްްގެ ބަންދާ މެދު ގޮތް ކަނޑައެޅުމާ ބެހޭގޮތުން ދިވެހިރާއްޖޭގެ ހައި ކޯޓުގެ ގަޒިއްޔާ (ގަޒިއްޔާ ނަމްބަރު) އާއި އެ ނޫން ވެސް އެފަދަ އެހެން ގަޒިއްޔާތަކުގައި ބަޔާން ކުރެވިފައިވާ އުސޫލާ ދުރަށް ދާންޖެހޭ.." ފަނޑިޔާރު ހުސައިން ޝަހީދު އަދި އިސް ފަނޑިޔާރު ހާތިފް ހިލްމީގެ އަޣުލަބިއްޔަތު ރައުޔުގައި ބުނެފައިވެ އެވެ.

ހުކުމުގައިވާ ގޮތުން ބަންދު މުރާޖާ ކުރުމުގެ މަރުހަލާއަކީ ބަންދުގައި ތިބޭ މީހުންނަށް ފަރުވާ ނުލިބޭ ކަމަށް ބުނެ ކަރެކްޝަންސް ޒިންމާދާރުކޮށް، ޖަވާބުދާރީ ކުރުވަން ފުރުސަތު ދޭންޖެހޭ މަޖިލީހެއް ނޫން ކަމަށެވެ. އަދި ޖަލުގައި ފަރުވާ ނުލިބޭކަމުގެ ޝަކުވާއެއް އޮތް ނަމަ އެކަމަށް ހައްލު ހޯދޭނީ ވަކި މަދަނީ މައްސަލައެއް ސިވިލް ކޯޓަށް ހުށަހަޅައިގެން ކަމަށް ހުކުމުގައިވެ އެވެ.

މީގެ ކުރިން ވެސް އަމަލު ކޮށްފައި އޮތީ އެ އުސޫލުން ކަން ފާހަގަކޮށް، އޭގެ މިސާލެއްގެ ގޮތުން ކުރީގެ ނައިބު ރައީސް އަހުމަދު އަދީބާއި އިތުރު މީހަކަށް ޖަލުގައި ފަރުވާ ނުލިބޭތީ ސިވިލް ކޯޓަށް ހުށަހެޅި ދެ މައްސަލައެއް ހައި ކޯޓުން ފާހަގަކުރި އެވެ.

"މިއީ މިފަދަ މަދަނީ ތަބީއަތުގެ މައްސަލަތަކުގައި ހައްލު ހޯދުމަށް އޮންނަ މަގު." ހުކުމުގައިވެ އެވެ.

އެހެން ނަމަވެސް މި ނުކުތާގައި، އެ ބެންޗުގައި ދެން ހިމެނިވަޑައިގަތް ފަނޑިޔާރު ހަސަން ޝަފީއުގެ ރައުޔު ތަފާތެވެ. އޭނާ ދެކެވަޑައިގަންނަންވާ ގޮތުގައި ސިއްހީ ސަބަބެއް އޮތުމަކީ އާންމު އުސޫލުން ބަންދުން ދޫކުރަން ޖެހޭ ކަމަކަށް ނުވިޔަސް، އެފަދަ ބައެއް ހާލަތްތަކުގައި ބަންދަށް ލުއި ދޭން ޖެހިދާނެ އެވެ.

ބައިނަލްއަގްވާމީ މުއާހަދާތަކަށް ވެސް ހަވާލާ ދެއްވުމަށްފަހު ފަނޑިޔާރު ޝަފީއުގެ ރައުޔުގައިވަނީ ސިއްހީ ފަރުވާ ލިބުމާއި ނަފްސު ރައްކާތެރި ކުރުމުގެ ހައްގު ކޮންމެ މީހަކަށް ވެސް އޮންނައިރު ސިއްހީ ޟަރޫރީ ހާލަތްތަކުގައި ބަންދަށް ލުއި ދެވިދާނެ ކަމަށެވެ. އަދި ހައި ކޯޓުގެ ކުރީގެ ނިންމުންތަކުން އެކަން ހުއްދަކުރީ ވެސް ޟަރޫރީ ހާލަތްތަކަށް އެކަނި ކަމަށް އޭނާ ލިޔުއްވާފައިވެ އެވެ.

"ބަންދު މުރާޖާ ކުރުމުގައި ސިއްހީ ހާލަތުގެ މައްޗަށް ރިއާޔަތް ކުރެވެން އޮންނަ އޮތުން މުޅި އެއްކޮށް ނަފީވެގެންދާ ގޮތަށް މާނަ ކުރުމަކީ އެންމެ އެދެވޭ ގޮތް ކަމަކަށް އަހުރެންނަކަށް ނުބެލެވެ އެވެ." އޭނާ ލިޔުއްވާފައިވެ އެވެ.