ނިއު ޔޯކްގައި ބަޑިޖަހައި 23 މީހަކު ޒަހަމްކޮށްލައިފި

އެމެރިކާގެ ނިއު ޔޯކްގެ ބިންގަރާސް ރޭލް ސްޓޭޝަނެއްގައި އާންމުންގެ ތެރެއަށް ބަޑި ޖަހައި، އޭގެ ތެރެއިން 23 މީހަކު ޒަހަމް ކޮށްލައިފި އެވެ.

އިއްޔެ ހެނދުނު އެމެރިކާ ގަޑިން އެންމެ ކާރުބާރު ބޮޑު ވަގުތުގައި ހިނގި މި ހާދިސާގައި އެއްވެސް މީހެއްގެ ފުރާނަ އަށް ގެއްލުމެއް ނުލިބެ އެވެ. ނިއު ޔޯކްގެ ފުލުހުން ބުނި ގޮތުގައި ބަޑި ޖެހުމުގެ ހާދިސާއާ ގުޅުން ހުރި ކަމަށް ބެލެވޭ މީހަކު މިހާރު ވަނީ ދެނެގަނެވިފަ އެވެ.

ފްރޭންކް އާރް، ޖޭމްސް، 62، ނަމަކަށް ކިޔާ ފިރިހެނަކު ހޯދުމުގައި އެހީތެރިވެދިނުމަށް ފުލުހުން މިހާރު ވަނީ އިއުލާންކޮށްފަ އެވެ. އޭނާއަކީ ބަޑި ޖެހި މީހާ ކަމަށް ފުލުހުން ތުހުމަތު ނުކުރި ނަމަވެސް، އެ ހާދިސާއާ ގުޅުން ހުރި މައުލޫމާތު އެނގޭނެ މީހެއް ކަމަށް ފުލުހުން ގަބޫލުކުރެ އެވެ.

ފުލުހުން ބުނި ގޮތުގައި ނިއު ޔޯކްގެ ބްރޫކްލީންގެ 36 ވަނަ މަގުގައި ހުންނަ ބިންގަރާސް ރޭލް ސްޓޭޝަންގެ ތެރޭގައި އުޅުނު ފިރިހެނަކު ދުން ބޮމުގެ ދެ ބޮން ގޮއްވައިލުމަށް ފަހު، އާންމުންގެ ތެރެއަށް ބަޑިން ހަމަލާ ދިނީ އެވެ. އިއްޔެ ހެނދުނު 8:30 ހާއިރު ހިނގި މި ހާދިސާގައި، ބަޑި ހިފައިގެން އުޅުނު މީހާ 33 ފަހަރު ބަޑި ޖެހި އެވެ.

އެ މީހާ ބަޑި ޖެހުމުގެ ސަބަބުން، އެ ވަގުތު ސްޓޭޝަންގެ ތެރޭގައި ތިބި މީހުންގެ ތެރެއިން 10 މީހެއްގެ ގަޔަށް ވަޒަން އެރި އެވެ. އެއީ ހަތް ފިރިހެނަކާއި ތިން އަންހެނެކެވެ. އިތުރު 13 މީހަކަށް އެކި ވަރުގެ ގެއްލުންތައް ލިބުނީ، ސަލާމަތްވާން ދުވުމުގެ ތެރޭގައި ވެއްޓިގެންނާއި ތަންތަނުގައި ޖެހިގެންނާއި ދުމުގެ ސަބަބުން ނޭވާ ހާސްވެގެންނެވެ.

ބަޑި ޖެހުމަށް ފަހު އެމީހާ ވަނީ އެ ތަނުން ފިލައިގެން ގޮސްފަ އެވެ. ނަމަވެސް ފުލުހުން ބުނި ގޮތުގައި މި ހަމަލާ ދިން މީހާ ދަތުރުކުރުމަށް ބޭނުންކުރި ކަމަށް ބެލެވޭ ވޭނެއްގެ ތަޅުދަނޑި މިހާރު ވަނީ ފެނިފަ އެވެ. އެއީ ފިލަޑެލްފިއާގެ ކުންފުންޏަކުން ކުއްޔަށް ނަގައިގެން ބޭނުންކުރި ވޭނެއް ކަމަށާއި، އެ ހަމަލާގެ މައުލޫމާތު އެނގޭނެ ކަމަށް ބެލެވިގެން ހޯދަމުންދާ ފްރޭންކް އަކީ ވެސް ފިލަޑެލްފިއާގައި ރަޖިސްޓްރީވެގެން އުޅޭ މީހެއް ކަމަށް ފުލުހުން ބުނެ އެވެ.