ދަނޑުވެރިންނަށް ހާއްސަ ލޯނަށް އެދުމުގެ ފުރުސަތު ހުޅުވާލައިފި

ދަނޑުވެރިންނަށް ހާއްސަ ލޯނަށް އެދުމުގެ ފުރުސަތު އެސްއެމްއީ ބޭންކު، އެސްޑީއެފްސީން މިއަދު ހުޅުވާލައިފި އެވެ.

"ދަނޑުވެރި ނަފާ"ގެ ނަމުގައި ދޫކުރާ އެ ލޯނަކީ އެސްޑީއެފްސީ އާއި ފިޝަރީޒް މިނިސްޓްރީއާ ގުޅިގެން ރާއްޖޭގައި ދަނޑުވެރިކަން ކުރާ ފަރާތްތަކަށް އެހީތެރިވާން ދޫކުރާ ލޯނެކެވެ.

އެ ލޯން ސްކީމުގެ ދަށުން ދެ ގޮތަކަށް ލޯނު ދޫކުރެ އެވެ. އެއީ ރަހުނަކާ ނުލައި ދޭ ލޯނާއި ރަހުނާ އެކު ދޭ ލޯނެވެ. ޕްރޮޖެކްޓުތައް ހިންގަން ރަހުނަކާ ނުލައި 75،000ރ.ގެ ލޯނު ދޫކުރާނެ އެވެ. އަދި ހަ ޕަސެންޓުގެ އިންޓްރެސްޓާ އެކު އަމިއްލަ ފަރާތްތަކަށް ގިނަވެގެން 500،000ރ. ގެ ލޯނާއި ވިޔަފާރިތަކަށް ދެ މިލިއަން ރުފިޔާއާ ހަމައަށް ވެސް ލޯނު ދޫކުރާނެ އެވެ.

ލޯނު އަނބުރާ ދައްކަން އެސްޑީއެފްސީން ހަތް އަހަރުގެ މުއްދަތެއް ދެ އެވެ. އަދި ގްރޭސް ޕީރިއަޑެއްގެ ގޮތުގައި ގިނަވެގެން 12 މަސް ދުވަސް އެ ކޯޕަރޭޝަނުން ދޭނެ އެވެ.

ދަނޑުވެރި ނަފާގެ ދަށުން ލޯނު ދޫ ކުރަނީ ޓެކްނޮލޮޖީ ބޭނުންކޮށްގެން ޒަމާނީ ދަނޑުވެރިކަން ކުރުމަށާއި ޕޯލްޓްރީ ފާމިންއަށާއި ގަހުގެ ނާސަރީތައް ގާއިމް ކުރުމަށާއި ވެލިއު އެޑިޝަންގެ މަސައްކަތްތަކަށެވެ.

ދަނޑުވެރިންގެ އިތުރުން ކުދި ވިޔަފާރިތަކަށް ލޯނުތައް ދޫކުރަން ވެސް އެސްޑީއެފްސީން ވަނީ ނިންމައިފަ އެވެ. އެ ލޯނަށް އެދުމުގެ ފުރުސަތު ހުޅުވާލާނީ އަންނަ މަހުން ފެށިގެންނެވެ.