މާފުށި ޖަލަށް ފޯނު ވައްދަން އުޅުނު ކަމަށް ބެލެވޭ މީހަކު މޫދުގައި މަރުވެފައި އޮއްވައި ފެނިއްޖެ

ފަތާފައި މާފުއްޓަށް އަރައި، ޖަލަށް އެއްޗެހިތަކެއް ވައްދަން އުޅުނު ކަމަށް ބެލެވޭ މީހަކު ފިލަން މޫދަށް ފުންމާލުމުން ގޮސް ބެލި އިރު މަރުވެފައި އޮއްވައި ފެނިއްޖެ އެވެ.

އެނގިފައިވާ ގޮތުގައި ރޭގެ ވަގުތެއްގައި މި ހާދިސާ ހިނގީ ފަތާފައި ޖަލާ ދިމާލުން ތޮށިގަނޑުމައްޗަށް އެރި މީހަކު ޖަލުގެ ސެކިއުރިޓީންނަށް ފެނުމުން ފިލަންވެގެން މޫދަށް ފުންމާލުމުންނެވެ.

ޖަލު ބަލަހައްޓާ ކަރެކްޝަނަލް ސާވިސްގެ އޮފިސަރުންނަށް، މި މިހާ ފެނުނީ ކަނޑުގައި މަރުވެފައި އޮއްވައި ކަމަށް ވަނީ އެނގިފަ އެވެ.

ފުލުހުން ބުނީ މާފުށީ ޖަލާ ދިމާލުން މޫދު އަޑީގައި މީހަކު ގެނބިފައި އޮތް ކަމަށް ރޭ 2.22 ގައި ފުލުހުންނަށް ރިޕޯޓްކޮށްފައިވާ ކަމަށެވެ. އެ މީހާ މޫދުން ނަގައިގެން މާފުށީ ހެލްތު ސެންޓަރަށް ގެންދިޔަ އިރު ވެސް މަރުވެފައިވާ ކަމަށް ހެލްތު ސެންޓަރާ ހަވާލާދީ ފުލުހުން ބުންޏެވެ.

މަރުވެފައި ވަނީ 33 އަހަރުގެ ދިވެހި ފިރިހެނެއް ކަމަށް ވެސް ފުލުހުން ބުންޏެވެ. އަދި އެކަމާ ގުޅިގެން ބަލަން ޖެހޭ ކަންކަން ބަލަމުންދާ ކަމަށް ވެސް ވަނީ ބުނެފަ އެވެ.

ފޯނާއި ފޯނުގެ ޗާޖަރާއި ބެޓެރީ އަދި ސިމް ކާޑު ފަދަ ތަކެތި ޖަލަށް ވައްދަން އުޅެނިކޮށް އެތައް ފަހަރަކު މީގެ ކުރިން އަތުލައިގެންފައިވެ އެވެ. ފުލުހުން ބުނެފައިވާ ގޮތުގައި ރާއްޖޭގައި އޮންލައިންކޮށް އަދި ފޯނު މެދުވެރިކޮށް ހިންގާ ފްރޯޑްތަކުގައި ޖަލުގެ ގައިދީން ވަރަށް ބޮޑަށް ބައިވެރިވެ އެވެ. އެކަން ކުރުމަށް ގިނަ އަދަދެއްގެ ފޯނު ޖަލަށް ވައްދަ އެވެ.