އިންޑިއާ އިން ސެނަހިޔާ ހޮސްޕިޓަލަށް ސިއްހީ ސާމާނު ހަދިޔާކޮށްފި

އިންޑިއާގެ ސަރުކާރުން އެމްއެންޑީއެފްގެ ސެނަހިޔާ ހޮސްޕިޓަލަށް ސިއްހީ ސާމާނުތަކެއް މިއަދު ހަދިޔާކޮށްފި އެވެ.

ސިފައިންގެ މައި މަރުކަޒު ހިންގާ ބަންޑާރަކޮށީގައި ބޭއްވި ހާއްސަ ރަސްމިއްޔާތެއްގައި އިންޑިއާގެ ސަރުކާރު ފަރާތުން އެ ސާމާނު ދިވެހި ސަރުކާރާ ހަވާލު ކޮށްދެއްވީ، މިހާރު ރާއްޖެ ވަޑައިގެން އުޅުއްވާ އިންޑިއާގެ ޑިފެންސް ސެކްރެޓަރީ އަޖޭ ކުމާރެވެ. ދިވެހި ސަރުކާރުގެ ފަރާތުން ސިއްހީ ސާމާނާ ހަވާލުވެވަޑައިގަތީ ޑިފެންސް މިނިސްޓަރު މާރިޔާ އަހުމަދު ދީދީ އެވެ.

އިންޑިއާ އިން ހަދިޔާކުރީ 2،800 ކިލޯގްރާމްގެ ސިއްހީ ވަސީލަތްތައް ކަމަށް ވާއިރު، އޭގެ ތެރޭގައި ސިއްހީ ކުއްލި ހާލަތުގަ އާއި ހޮސްޕިޓަލުގައި ބޭނުން ކުރާ ބައެއް އާލާތްތައް ހިމެނޭ ކަމަށް އެމްއެންޑީއެފުން ބުންޏެވެ.

ސެނަހިޔާގައި މިހާރު ވެސް އިންޑިއާގެ އަސްކަރީ ޑޮކްޓަރުން ހިދުމަތް ދެ އެވެ.

ރާއްޖެ އާއި އިންޑިއާއާ ދެމެދު މި ސަރުކާރުން ވަރަށް ގާތް ގުޅުމެއް ގާއިމުކޮށްފައިވާއިރު، އިދިކޮޅުން ބުނަމުން އަންނަނީ މާ ބޮޑަށް އެ ގައުމަށް ބަރޯސާވުމުގެ ގެއްލުން ދިވެހިންނަށް ކުރިމަތިވާ ކަމަށެވެ.