ކޯރާކޯރާގެ އެއާޕޯޓް ރެޕުންނަށް އަންހެނުން

ރ. މާމިގިލީގައި މިދިޔަ އަހަރު ހުޅުވި ރިސޯޓް، ކޯރާ ކޯރާ މޯލްޑިވްސްގެ އެއާޕޯޓު ރެޕުންގެ ގޮތުގައި 100 ޕަސެންޓް އަންހެނުންގެ ޓީމެއް ނަގައިފި އެވެ.

މިއީ ރާއްޖޭގެ ރިސޯޓެއްގެ އެއާޕޯޓް ރެޕުންގެ ޓީމަކަށް ހުސް އަންހެނުން ނެގި ފުރަތަމަ ފަހަރެވެ.

ކޯރާ ކޯރާ އިން ބުނީ އެ ރިސޯޓުގެ އެއާޕޯޓް ރެޕުންގެ ޓީމަކީ ދިވެހި އަންހެނުންނަށް ނަމޫނާއެއް ކަމަށެވެ. އަންހެނުންނަށް ވެސް ޓޫރިޒަމް ދާއިރާއިން ކުރިއަށް ދިއުމުގައި ފުރުސަތުތައް އެބަހުރި ކަމަށާއި ކާމިޔާބު ކެރިއާއެއްގެ ގޮތުގައި އެ ދާއިރާ ހިޔާރުކުރެވޭނެ ކަން މިކަމުން ދޭހަވާ ކަމަށް ވެސް އެ ރިސޯޓުން ބުންޏެވެ.

އެ ރިސޯޓުގެ ޖެނެރަލް މެނޭޖަރު ޖަސްޓިން ސްވާޓް ވިދާޅުވީ އެއާޕޯޓް ރެޕުންނަކީ ވަރަށް ޕްރެޝަރުގައި މަސައްކަތްކުރަންޖެހޭ ބަޔަކަށް ވިޔަސް ކޯރާ ކޯރާގެ ޓީމުން އެފަދަ ހާލަތްތައް މެނޭޖު ކުރަނީ ވަރަށް ފުރިހަމައަށް ކަމަށެވެ. އަންހެނުންނަށް މިފަދަ ވަޒީފާތައް ހޯދަން ދަތި ކަމަށާއި އެ ރިސޯޓުގެ ޓީމުގެ ސަބަބުން މެނެޖީރިއަލް ލެވެލްގައި ވަޒީފާ އަދާކުރަން ޝައުގުވެރިވާ އަންހެނުންގެ އަދަދު އިތުރުވާނެ ކަމަށް އުއްމީދު ކުރައްވާ ކަމަށް ވެސް އޭނާ ވިދާޅުވި އެވެ.

ޖަސްޓިން ވިދާޅުވި ގޮތުގައި އެ ރިސޯޓުގެ ރެޕުންގެ ޓީމާ ގުޅޭ ގޮތުން މިހާތަނަށް ޓޫރިސްޓުންގެ ފަރާތުން ލިބިފައިވަނީ ހުސް ޕޮޒިޓިވް ކޮމެންޓުތަކެވެ. އެހެންވެ، އަންހެނުންގެ ޓީމެއް ރިސޯޓުގެ މޫނުގެ ގޮތުގައި ޓޫރިސްޓުންނަށް މަރުހަބާ ކިޔަން ފޮނުވުމަކީ ވަރަށް ރަނގަޅު ނިންމުމެއް ކަމަށް ވެސް އޭނާ ވިދާޅުވި އެވެ.

ދިވެހި ސަގާފަތްތައް ދައްކުވައިދޭ ގޮތައް ތައްޔާރުކޮށްފައިވާ ކޯރާ ކޯރާ ހުޅުވީ މިދިޔަ އަހަރުގެ އޮކްޓޯބަރު މަހު އެވެ. ރާއްޖޭގެ ސަގާފަތާއި ހެރިޓޭޖް ވަރަށް ބޮޑަށް ފެންނަ އެ ރިސޯޓުގައި ރާއްޖޭގެ ތާރީހު ކިޔައިދޭ މިއުޒިއަމެއް ވެސް ހުރެ އެވެ.

މި ރިސޯޓުގައި 100 ވިލާ ހުންނަ އިރު، ކޮޓަރިތައް ވަނީ ނުވަ ކެޓަގަރީއަކަށް ބަހާލައިފަ އެވެ. އޭގެ ތެރޭގައި ބީޗް ވިލާ އާއި ލެގޫން ޕޫލް ވިލާ އާއި ސަގާފަތް ދައްކުވައިދޭ ވޯޓާ ވިލާތައް ވެސް ހިމެނެ އެވެ. މި ރިސޯޓު ޑިޒައިން ކޮށްފައިވަނީ އާއިލާތަކާއި ރައްޓެހިންނަށް ވެސް ގޮސް މަޖާކޮށްލެވޭނެ ފަދަ ގޮތަކަށެވެ.