ހަނިމާދޫ ހައުސިން މަޝްރޫއުގެ ބިޑް އަލުން އިވެލުއޭޓް ކުރަން ކުރި ހުކުމް އިސްތިއުނާފަށް

ހދ. ހަނިމާދޫގައި އިމާރާތްކުރާ 100 ހައުސިން ޔުނިޓްގެ މަޝްރޫއުގެ ބީލަމުގައި އެސްޖޭ ކޮންސްޓްރަކްޝަން ހިމަނައިގެން އަލުން ބިޑް ކުރަން ސިވިލް ކޯޓުން ކުރި ހުކުމް ދައުލަތުން ހައި ކޯޓުގައި އިސްތިއުނާފް ކޮށްފި އެވެ.

ހަނިމާދޫގައި އިމާރާތްކުރަން ފަށާފައިވާ 52 ހައުސިން ޔުނިޓްގެ މަސައްކަތް ނިންމުމަށާއި އަލަށް އިމާރާތްކުރާ 48 ހައުސިން ޔުނިޓް އެޅުމަށް ސަރުކާރުން މިދިޔަ އަހަރު ހަވާލުކުރީ ދޮންބެޒް ޕްރައިވެޓް ލިމިޓެޑާ އެވެ. އެ މަޝްރޫއަށް އެސްޖޭ ކޮންސްޓްރަކްޝަނުން ހުށަހެޅި ބިޑްގެ ޝަރުތު ހަމަނުވާ ކަމަށް ނޭޝަނަލް ޓެންޑާ ބޯޑުން ނިންމުމުން، އެ ކުންފުނިން އެ މައްސަލަ ކޯޓަށް ހުށަހެޅުމުން ސިވިލް ކޯޓުން މި މަހު ހުކުމްކުރީ އެސްޖޭގެ ބިޑް ހިމެނޭހެން ހުރިހާ ބިޑްތައް އަލުން އިވެލުއޭޓް ކުރުމަށެވެ.

އެ ހުކުމް އިސްތިއުނާފް ކުރަން ދައުލަތުގެ ފަރާތުން ހައި ކޯޓަށް ހުށަހެޅިޔަސް، އެ މައްސަލަ ބަލައިގަތުމާ މެދު ހައި ކޯޓުން އަދި ވަކި ގޮތެއް ނުނިންމަ އެވެ.

ހަނިމާދޫގައި ހައުސިން ޔުނިޓްތަކެއް އަޅަނީ ދައުލަތުގެ ބަޖެޓުން 79.3 މިލިއަން ރުފިޔާ ހަރަދުކޮށްގެންނެވެ.