ހަލަބުން މީހުން ނެރުން ހުއްޓާލައިފި

ދިމިޝްގު (ޑިސެމްބަރު 16) - އިދިކޮޅު ހަނގުރާމަވެރިންނާއި އާއްމުން ހަލަބު ސިޓީގެ އިރުމަތީގެ ހިސާބުތަކުން ނެރުން ހުއްޓުމަކަށް ގެނެސްފި އެވެ.

ސީރިއާ ސަރުކާރާ ގުޅުން އޮންނަ ރަޝިޔާ އިން ބުނެފައި ވަނީ ހަލަބުން މީހުން ނެރުން ހުއްޓުމަކަށް އައީ އެ މަސައްކަތް ނިމުމުން ކަމަށެވެ. ނަމަވެސް ސީރިއާގެ އަސްކަރިއްޔާ އިން އޭއެފްޕީ އަށް ބުނީ ހަލަބުން މީހުން ނެރުން ހުއްޓާލީ ވަގުތީ ގޮތުން ކަމަށެވެ. ބުރާސްފަތި ދުވަހުން ފެށިގެން ހަލަބުން 6،000 މީހުން ނުކުމެފައިވާ ކަމަށްވެ އެވެ. އދ. އިން ބުނެފައި ވަނީ އެ ސިޓީގެ އިރުމަތީގައި މިހާރުވެސް 50،000 މީހުން ތާށިވެފައި އެބަތިބި ކަމަށެވެ. ސީރިއާ ސަރުކާރާ ގުޅިފައިވާ ސިފައިން މިހާރު ވަނީ ހަލަބުގެ އިރުމަތީގެ ހުރިހާ ސަރަހައްދެއް އިދިކޮޅު ހަނގުރާމަވެރިންގެ އަތް ދަށުން ހިފައިފަ އެވެ.

ރަޝިޔާގެ ޑިފެންސް މިނިސްޓްރީން ބުނީ ހަލަބުގައި ތިބި އިދިކޮޅު ހަނގުރާމަވެރިންނާއި އެ މީހުންގެ އާއިލާތައް އެ ސިޓީން ނުކުމެފައިވާ ކަމަށެވެ. އަދި އެ މަސައްކަތް ހުއްޓުމަކަށް އައީ އެހެންވެ ކަމަށް ވެސް ބުނެފައިވެ އެވެ. އަދި އަންހެނުންނާއި ކުޑަ ކުދިންނާ އެކު ހަލަބުން 9،500 މީހުން ނުކުމެފައިވާ ކަމަށް ރަޝިޔާ އިން ބުނެފައިވެ އެވެ.

ރަޝިޔާގެ ދިފާއީ ވުޒާރާ އިން ބުނެފައި ވަނީ ހަލަބު ސިޓީން ނެރޭ މީހުން ގެންދިއުމަށް ހަމަޖެހިފައި ވަނީ ޖެހިގެން އޮތް އިދްލީބް ޕްރޮވިންސަށް ކަމަށެވެ. އިދްލީގެ ބޮޑު ބައެއްގެ ކޮންޓްރޯލް އޮތީ ވެސް އިދިކޮޅު ހަނގުރާމަވެރިންގެ އަތް ދަށުގަ އެވެ. އޭގެ ތެރޭގައި ޖަބްހަތު ފާތިހު އަލް ޝާމް ނުވަތަ ކުރީގެ ނުސްރާ ފްރަންޓް ހިމެނެ އެވެ.