ފެނަކައިގެ މަޝްރޫއަކުން ގަން އެއާޕޯޓް މުޅިން ސޯލާ ހަކަތަ އަށް

އިޔާދަކުރަނިވި ހަކަތަ އަށް ފެނަކަ ކޯޕަރޭޝަނުން ކުރިއަށް ގެންދާ ބޮޑު މަޝްރޫއެއްގެ ތެރެއިން ރާއްޖޭގައި މުޅިން ސޯލާ ހަކަތަ ބޭނުންކުރާ އެއާޕޯޓަކަށް ގަން އެއާޕޯޓްވެގެން ދާނެ މަޝްރޫއުގެ އެއްބަސްވުމުގައި އެ ކުންފުންޏާއި ފިއުޗަ ސިނަޖީޒް ލިމިޓެޑާ ދެމެދު މިއަދު ސޮއިކޮށްފި އެވެ.

ވެރިރަށް މާލޭން ބޭރުން ރާއްޖޭގެ އެހެން ސަރަހައްދެއްގައި މިހާތަނަށް ހިންގާ އެންމެ ބޮޑު އިޔާދަކުރަނިވި މަޝްރޫއުގެ ތެރެއިން ސޮއިކުރި ޕަވަ ޕާޗޭސް އެގްރީމެންޓް (ޕީޕީއޭ) ގެ ދަށުން ގަން އެއާޕޯޓަށް ބޭނުންވާ ކަރަންޓްގެ 100 ޕަސެންޓް އެ ތަނުގައި ގާއިމްކުރެވޭ 2.5 މެގަވޮޓް ޕީކްގެ ސޯލާ ނިޒާމުން އުފައްދާނެ ކަމަށް ފެނަކައިން ބުންޏެވެ.

މި ބަދަލާ އެކު ރާއްޖޭގެ އެންމެ ދެކުނުގައި އޮތް އިންޓަނޭޝަނަލް އެއާޕޯޓްވާނީ އިއާދަކުރަނިވި ހަކަތައިން ކަރަންޓް ދެވޭ ރާއްޖޭގެ ފުރަތަމަ ސޯލަ ޕަވަޑް އެއާޕޯޓަށެވެ.

އައްޑޫ ސޯލާ ޕަވާ މަޝްރޫއުގެ ތެރެއިން ހުޅުމީދޫގައި ދެ މެގަވޮޓް ޕީކްގެ ސޯލާ ޕީވީ ބެޓަރީ ސްޓޯރޭޖް ސިސްޓަމެއް ހަރުކުރާނެ އެއެވެ. ފެނަކައިން ބުނެފައި ވަނީ އަމާޒަކީ ކުރިއަށް އޮތް ތަނުގައި ހުޅުމީދޫގައި ގާއިމުކުރެވޭ ނިޒާމުން އެ އަވަށާ ކައިރީގައި ހުރި ރިސޯޓްތަކަށް ވެސް އިއާދަކުރަނިވި ހަކަތަ ފޯރުކޮށް ދިނުން ކަމަށެވެ.

އައްޑޫގައި ފެނަކަ އިން ހިންގާ މި މަޝްރޫއުގެ ސަބަބުން ކަރަންޓު އުފެއްދުމަށް ކުރާ ހޭދައިގެ ތެރެއިން އަހަރަކު ގާތްގަނޑަކަށް 2.1 މިލިޔަން ލީޓަރުގެ ޑީސަލް އެންދުން މަދުކުރެވޭނެ އެވެ. އަދި ޖައްވަށް ބޭރުވާ ވިހަ ގޭހުގެ ތެރެއިން އަހަރަކު 5,500 ޓަނު ކާބަންޑަ އޮކްސައިޑް ވެސް މަދުކުރެވޭނެ އެވެ.

އެ ކުންފުނީގެ މަޝްރޫއުގައި ސޮއިކުރުމާ އެކު އެންވަޔަރަމަންޓް މިނިސްޓްރީން ވަނީ މިއީ 2030 އާ ހަމައަށް އަންނަ އިރު "ނެޓް-ޒީރޯ" އެމިޝަނަށް ވާސިލުވާން ރާއްޖޭން ކުރާ މަސައްކަތްތަކަށް ވަރަށް ބޮޑު ބާރަކަށްވާނެކަން ފާހަގަކޮށް، ފެނަކަގެ ޓީމަށް މަރުހަބާ ކިޔައިފަ އެވެ.