ދިވެހިންނަށް ޗައިނާއިން އޮންއެރައިވަލް ވިސާ ދެނީ

ކުރިން ވިސާ ނެގުމަކާ ނުލައި ދިވެހިންނަށް ޗައިނާއަށް ދެވޭ ގޮތަށް ދެ ގައުމުން މިއަދު އެއްބަސްވުމެއްގައި ސޮއިކޮށްފި އެވެ.

ޗައިނާއަށް ދާ ދިވެހިންނަށް އޮން އެރައިވަލް ވިސާ ދިނުމުގެ އެއްބަސްވުމުގައި ސޮއިކުރީ ޗައިނާގެ ފޮރިން މިނިސްޓަރު ވަންގް ޔީ ރާއްޖެއަށް މިހާރު ކުރައްވަމުން ގެންދަވާ ދަތުރުގަ އެވެ.

ފޮރިން މިނިސްޓްރީން ބުނީ ވިސާއަށް ލުއި ދިނުމުގެ އެއްބަސްވުމުގެ ދަށުން ޗައިނާއަށް ދަތުރުކުރާ ދިވެހިންނަށް 30 ދުވަހުގެ އޮން އެރައިވަލް ވިސާ ލިބޭނެ ކަމަށެވެ. އެކަމަކު އެ ލުއިތައް ލިބޭނީ ކޮވިޑް-19 އާ ގުޅިގެން މިހާރު އަޅާފައިވާ ފިޔަވަޅުތައް ނިމުމަކަށް އައުމުން ކަމަށް ފޮރިން މިނިސްޓްރީން ބުންޏެވެ.

މީގެ އިތުރުން ރާއްޖެއަށް އަންނަ ޗައިނާ ރައްޔިތުންނަށް ވެސް އެ އެއްބަސްވުމުގެ ދަށުން އޮންއެރައިވަލް ވިސާ ލިބޭނެ ކަމަށް ފޮރިން މިނިސްޓްރީން ބުންޏެވެ.

މީގެކުރިން ދިވެހިންނަށް ޗައިނާއަށް ދަތުރު ކުރެވެނީ ދުރާލާ ވިސާ ހޯދައިގެންނެވެ.

ޗައިނާއާ އެކު ސޮއިކުރި އިތުރު އެއްބަސްވުންތައް

• ސިއްހީ ދާއިރާއިން ގުޅުން ބަދަހިކުރުމުގެ އެއްބަސްވުން އާކުރުން

ލޮލުގެ ބަލިތަކަށް ފަރުވާދޭ ޚާއްސަ ކްލިނިކެއް/ކޭމްޕެއް މި އެއްބަސްވުމުގެ ދަށުން ޗައިނާއިން ހިންގަން ވަނީ ނިންމައިފަ އެވެ. މި އެއްބަސްވުމުގައި ދެ އަހަރުގެ މުއްދަތަކަށް އެންމެ ފުރަތަމަ ސޮއިކުރީ 2019 ވަނަ އަހަރު އެވެ. މި އެއްބަސްވުމުގެ ދަށުން ވަނީ ލޮލުގެ ފަރުވާދޭ ޚާއްސަ ކޭމްޕެއް ހިންގައިފަ އެވެ.

• އިގްތިސާދީ އަދި ފަންނީ ދާއިރާއިން ގުޅުން ބަދަހިކުރުމަށް ހިލޭ އެހީ ދިނުން

މި އެއްބަސްވުމުގެ ދަށުން ޗައިނާ ސަރުކާރުން 62.8 މިލިއަން އެމެރިކާ ޑޮލަރު (968 މިލިއަން ރުފިޔާ) ދޭނެ އެވެ. މިއީ އިޖްތިމާއީ އަދި އުމްރާނީ ތަރައްގީއަށް ހޭދަކުރުމަށް ދޭ އެހީއެކެވެ.

• ސިނަމާލެ ބްރިޖްގެ މެއިންޓަނަންސް މަސައްކަތުގެ މުއްދަތު އިތުރުކުރުން

ޗައިނާ އިން ހެދި ސިނަމާލެ ބްރިޖް ދިވެހި ސަރުކާރާ ހަވާލުކުރުމަށްފަހު ދެ އަހަރުގެ މުއްދަތަކަށް ބްރިޖްގެ މަރާމާތުގެ މަސައްކަތް ބެލެހެއްޓުމަށް ޗައިނާއާ އެކު ކުރިން ވެފައިވާ އެއްބަސްވުމުގެ މުއްދަތު ހަމަވާތީ މި މަސައްކަތް އަދިވެސް ޗައިނާ އިން ކުރިއަށް ގެންދަން ވަނީ އެއްބަސްވެފަ އެވެ.

• ފަސް ރަށެއްގައި މައިކްރޯގްރިޑް ސީވޯޓާ ޑީސެލިނޭޝަން ޕްލާންޓް ބެހެއްޓުން

މި އެއްބަސްވުމުގެ ދަށުން ހއ. ކެލާ، ރ. އަލިފުށި ކ. ކާށިދޫ، ޅ. އޮޅުވެލިފުށި އަދި ގއ. ދާންދޫގައި މައިކްރޯ-ގްރިޑް ސީވޯޓާ ޑީސެލިނޭޝަން ޕްލާންޓް ބަހައްޓަން ވަނީ ނިންމައިފަ އެވެ. މިއީ 199 މިލިއަން ރުފިޔާގެ ޕްރޮޖެކްޓެކެވެ.