ޔާމީން ބަންދުކުރި ދުވަހުން ފެށިގެން މިނިވަންވުމާ ހަމައަށް އިނާޔަތް ހަމަޖައްސައިދޭން އެދިއްޖެ

ކުރީގެ ރައީސް އަބްދުﷲ ޔާމީނަށް ފަސް އަހަރުގެ ޖަލު ހުކުމް އިއްވި ދުވަހުން ފެށިގެން މިނިވަންވުމާ ހަމައަށް، ކުރީގެ ރައީސުންނަށް ދޭންޖެހޭ އިނާޔަތް ހަމަޖައްސައިދޭން ވަކީލުންގެ ފަރާތުން ފިނޭންސް މިނިސްޓްރީއަށް ހުށަހަޅުއްވައިފި އެވެ.

ދައުލަތުން އުފުލި މަނީ ލޯންޑްރިންގެ ދައުވާ ސާބިތުވެ ޔާމީން ފަސް އަހަރަށް ޖަލަށް ލައި ފަސް މިލިއަން ޑޮލަރުން ޖޫރިމަނާކުރީ ނޮވެމްބަރު، 28، 2019ގަ އެވެ. ހައި ކޯޓުން ދެމެހެއްޓި މި ހުކުމް ސުޕްރީމް ކޯޓުން ބާތިލްކޮށް އެމަނިކުފާނު މިނިވަންވީ މިދިޔަ އަންގާރަ ދުވަހު އެވެ.

ޔާމީން މިނިވަންވުމާ އެކު ދައުލަތުން އެ މަނިކުފާނަށް ދޭން ޖެހޭ ސެކިއުރިޓީ އާއި އިނާޔަތްތައް ވަނީ ދޭން ފަށައިފަ އެވެ. ކުރީގެ ރައީސުންގެ އިނާޔަތް ދޭން ނިންމީ ބަންދުގައި ހުންނެވި ދެ އަހަރު ނުހިމަނަ އެވެ.

އެކަމަކު ޔާމީންގެ ވަކީލުން މިދިޔަ ބުރާސްފަތި ދުވަހު ސިޓީއަކުން އެދިވަޑައިގަތީ ޖަލުގައި އެ މަނިކުފާނު ހުންނެވި މުއްދަތުގައި، ކުރީގެ ރައީސުންނަށް ދައުލަތުން ދޭން ޖެހޭ އިނާޔަތްތައް ވެސް ހަމަޖައްސައިދެއްވުމަށެވެ. ވަކީލުން ދެކެވަޑައިގަންނަވާ ގޮތުގައި، އެ މުއްދަތުގައި އެމަނިކުފާނަށް ހުކުމް އިއްވައި ޖަލަށް ލީ ނުހައްގުންނެވެ.

ފިނޭންސް މިނިސްޓްރީގެ މީޑިއާ އެގްޒެކެޓިވް މުހައްމަދު ޝަނޫން ވިދާޅުވީ ޔާމީން ޖަލު ބަންދުގައި ހުންނެވި މުއްދަތަށް ކުރީގެ ރައީސުންގެ އިނާޔަތް ހަމަޖައްސައިދޭން އެދިވަޑައިގެންފައިވާ ކަމަށެވެ. އެކަމާ މެދު ގޮތެއް ނިންމައި ވަރަށް އަވަހަށް ހާމަކުރައްވާނެ ކަަމަށް ވިދާޅުވި އެވެ.

ކުރީގެ ރައީސުންގެ އިނާޔަތް: (މަހަކަށް)

މާލީ އިނާޔަތް: 50،000ރ. (ދައުރަކަށް)

ދިރިއުޅުއްވާ ތަނުގެ ހަރަދު: 50،000ރ.

އޮފީސް ހިންގުމުގެ ހަރަދު: 175،000ރ.

ބޭސްފަރުވާގެ ހަރަދު (އަހަރަކަށް) : 700،000ރ.

ގާނޫނުގައި އޮންނަ ގޮތުން ރައީސްކަން ކުރައްވާފައިވާ ބޭފުޅުންނާއި އެ ބޭފުޅުންގެ އަނބިކަނބަލުންނަށް އެމްއެންޑީއެފުން ސަލާމަތާއި ރައްކާތެރިކަން ފޯރުކޮށްދޭން ޖެހޭނެ އެވެ. ކުރީގެ ރައީސުންނަށް މިހާރު ދޭ އިނާޔަތްތަކަށް ބަލާއިރު، ރައީސް ކަމުގައި ފަސް އަހަރު ފުރިހަމަކުރައްވާފައި ވާތީ، ޔާމީނަށް މަހަކު ގާތްގަނޑަކަށް 975،000 އަށް ވުރެ ގިނަ ރުފިޔާ (ހުރިހާ ހަރަދަކަށް) ހަމަޖައްސަން ޖެހެ އެވެ.

ބޭސްފަރުވާގެ ހަރަދަށް ބިލްކުރާ ގޮތަށް އޮތުމުން، އިނާޔަތުގެ ގޮތުގައި މަހަކަށް ދޭން ޖެހޭނީ 275،000ރ. އެވެ.

އެހެންކަމުން ޖަލުގައި ހުންނެވި ދެ އަހަރަށް ގާތްގަނޑަަކަށް 6.6 މިލިއަން ރުފިޔާ ދައުލަތުން އެމަނިކުފާނަށް ހަމަޖައްސައިދޭން ޖެހެ އެވެ.

ޔާމީނަށް ދެމުން އައި އިނާޔަތް 2019 ގައި ކަނޑާލީ، ރައީސުލްޖުމްހޫރިއްޔާ އޭނާ މަގާމުގައި ހުންނެވިއިރު ޖިނާއީ ކުށެއް ކުރި ކަން ޝަރީއަތަށް ސާބިތުވާ ވަގުތުން ފެށިގެން އެ މަނިކުފާނާއި އަނބިކަނބަލުންނަށް ގާނޫނުގެ ދަށުން ލިބިދޭ އެއްވެސް ރައްކާތެރިކަމަކާއި އިނާޔަތެއް ނުލިބޭނެ ކަމަށް ގާނޫނުގައި އޮތުމުންނެވެ.

އެކަމަކު އެ ހުކުމް މަތީ މަރުހަލާގެ ކޯޓުން ބާތިލްކޮށް މިނިވަންވެއްޖެ ނަމަ ބަންދުގައި ހުރި މުއްދަތުގައި އިނާޔަތާ މެދު އަމަލުކުރާނެ ގޮތެއް ގާނޫނުގައި ސާފުކޮށްދީފައެއް ނުވެ އެވެ.

އަންނަ އަހަރަަށް ލަފާކުރާ ބަޖެޓް ފާސްކުރިއިރު ޔާމީނަށް ދޭންޖެހޭ އިނާޔަތްތައް ބަޖެޓުގައި ހިމަނައިފައެއް ނުވެ އެވެ. އެއީ ބަޖެޓް މަޖިލީހުން ފާސްކުރއިރު، އެ މަނިކުފާނުގެ މައްޗަށް ޖިނާއީ ކުށެއް ސާބިތުވެފައި ވާތީ އެވެ. ޔާމީނަށް އިނާޔަތް ދޭން ހަމަޖެއްސީ ހާއްސަ ބަޖެޓުންނެވެ.

ޔާމީނަށް މަނީ ލޯންޑްރިންގެ ދައުވާ ކުރީ އެ މަނިކުފާނުގެ ނަމުގައި އޮތް އެކައުންޓަކަށް އެމްއެމްޕީއާރުސީގެ ޚިޔާނާތުގެ ފައިސާ ދައުރުކުރި ކަމަށް ތުހުމަތު ކުރެވޭ އެސްއޯއެފުން ޖަމާކުރި މައްސަލައިގަ އެވެ. އެ ފައިސާ އެންޓި ކޮރަޕްޝަން ކޮމިޝަން (އޭސީސީ) އާ އެކު ހެދި އެސްކްރޯ އެކައުންޓެއްގައި ބެހެއްޓުމަށް އެ މަނިކުފާނު އެއްބަސްވެ ވަޑައިގަތުމަށް ފަހު، އެހެން ފައިސާތަކެއް އެސްކްރޯ އެކައުންޓަށް ޖަމާކޮށް އަދި އެސްއޯއެފުން ޖަމާކުރި ފައިސާ އިސްލާމިކް ބޭންކްގެ ޖެނެރަލް އިންވެސްޓްމަންޓް އެކައުންޓަކަށް ބަދަލުކޮށް، އޭގެ އަސްލު އޮޅުވައިލި ކަމަށް ބުނެ އެވެ.

ސުޕްރީމް ކޯޓުން އިއްވި ހުކުމުގައި ބުނީ ޔާމީން ޖަލަށް ލުމަށް ހުކުމްކުރުމުގައި އަސްލަކަށް ބެލި، ވޮޑަމުލާގެ ފައިސާ އެސްއޯއެފަށް ޖަމާވިކަމާ މެދު ޝައްކު އުފެދޭ ކަމަށެވެ. މައްސަލަ ދިރާސާކުރި އިރު، އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔާތުގެ މައްޗަށް ޚިޔާނާތުގެ ކުށް ސާބިތުވެފައި ވަނީ އެސްއޯއެފަށް ޖަމާވި ވޮޑަމުލާގެ ޗެކްކަން ވަނީ އެނގިފައި ކަމަށް ފަނޑިޔާރު ވިދާޅުވި އެވެ. ނަމަވެސް ޔާމީންގެ މައްސަލާގައި މި ޗެކް ހުށަހަޅައިފައެއް ނުވެ އެވެ.

ޔާމީނަށް ތުހުމަތުކޮށް، މަނީ ލޯންޑްރިންގެ އިތުރު ދެ މައްސަލައެއް ކްރިމިނަލް ކޯޓަށް ވަނީ ހުށަހަޅައިފަ އެވެ. އެއީ، އެމްއެމްޕީއާރުސީ މެދުވެރިކޮށް ރ. ފުއްގިރި ދޫކުރި މުއާމަލާތާއި ވ. އާރަށް ދޫކުރުމުގެ މުއާމަލާތާ ގުޅިގެންގެންނެވެ. އެ އިން ކޮންމެ މައްސަލައެއްގައި މަނީ ލޯންޑަރިންގެ ދައުވާއަކާއެކު ރިޝްވަތު ގަބޫލުކުރުމުގެ ދައުވާއެއް ކޮށްފައިވެ އެވެ.