އަނިޔާވެރި ބައިވެރިން ދޫކޮށްލާ މީހުންނަށް އޮސްޓްރޭލިއާގައި މާލީ އެހީ

އަނިޔާވެރި ބައިވެރިން ދޫކޮށްލަން ހިތްވަރު ދިނުމުގެ ގޮތުން އޮސްޓްރޭލިއާގެ މާލީ އެހީއެއް ދޭން ސަރުކާރުން ނިންމައިފި އެވެ.

އަލަށް ހަމަޖެއްސި އުސޫލަށް އަންގާރަ ދުވަހުން ފެށިގެން އަމަލު ކުރަން ފަށާފައިވާތީ އަނިޔާވެރި ބައިވެރިން ތިބި ދެ ޖިންސްގެ މީހުންނަށް ވެސް އެ އެހީއަށް އެދުމުގެ ފުރުސަތު އޮންނާނެ އެވެ. އެހީގެ ގޮތުގައި ދޭން ނިންމާފައި ވަނީ 5،000 އޮސްޓްރޭލިއާ ޑޮލަރު (3،700 އެމެރިކާ ޑޮލަރު) ގެ ފައިސާގެ އިތުރުން ދިރިއުޅުމުގެ ބައެއް އެހެން ހަރަދުތައް ހަމަޖެއްސުމަށް ދޭ އެހީ އެވެ. އޭގެ ތެރޭގައި ކިޔަވާ ކުދިން ތިބި ނަމަ އެ ކުދިންގެ ސްކޫލްގެ ފީ ވެސް ޑައިރެކްޓް ޕޭމަންޓްގެ ގޮތުގައި ދޭން ނިންމާފައިވެ އެވެ.

އަނިޔާވެރި ބައިވެރިން ދޫކޮށްލަން ހިތްވަރު ދިނުމުގެ ގޮތުން މާލީ އެހީދޭން ސަރުކާރުން ނިންމުމާ ގުޅިގެން ބައެއް ފަރާތްތަކުން އެކަމަށް މަރުހަބާ ކިޔާފައިވެ އެވެ. ނަމަވެސް އިޖުތިމާއީ މައްސަލަތަކަށް ވަކާލާތުކުރާ ބައެއް ފަރާތްތަކުން ބުނީ މާލީ އެހީ ދިނުމަކީ އާއިލީ މައްސަލަތައް އޮސްޓްރޭލިއާގައި މަދު ކުރެވޭނެ ކަމެއް ނޫން ކަމަށެވެ.

އެ ގައުމުގެ ތަފާސްހިސާބުތައް ދައްކާ ގޮތުން ކޮންމެ 9 ދުވަހަކުން އޮސްޓްރޭލިއާގައި އަނިޔާވެރި ބައިވެރިއެއްގެ ފަރާތުން އަންހެނެއްގެ ފުރާނަ ގެއްލެ އެވެ. އަދި ކޮންމެ ތިން އަންހެނަކުން ދެ މީހުންނަކީ އެ މީހުންގެ މިހާރުގެ ބައިވެރިޔާ ނުވަތަ ކުރީގެ ބައިވެރިޔާގެ ފަރާތުން ގެވެށިއަނިޔާގެ އިތުރަށް ޖިންސީ އަނިޔާ ލިބޭ މީހުންނެވެ.

ވިކްޓޯރިއަން ވިމެންސް ޓްރަސްޓްގެ އެގްޒެކެޓިވް ޑިރެކްޓަރު މޭރީ ކުކްސް ވިދާޅުވި ގޮތުގައި އޮސްޓްރޭލިއާގައި ކުރަން ޖެހިފައި އޮތް މުހިއްމު އެއް ކަމަކީ ކަންކަމުގައި ނަގާކިޔާ ބައެއްގެ ގޮތުގައި ފިރިހެނުން ލޭބަލް ކުރުން ހުއްޓާލައި، އަންހެނުންގެ ދައުރު ފުޅާ ކުރުމެވެ.

"ސަރުކާރުގައި ކަމަށް ވިޔަސް ނުވަތަ ކުންފުންޏެއްގައި ކަމަށް ވިޔަސް އަންހެނުންގެ ދައުރު ބޮޑުކޮށް، އެ މީހުންނަކީ ހަމަ ހުރިހާ މައިދާނެއްގައި ފިރިހެނުންނާ އެއް ހަމައެއްގައި މަސައްކަތްކުރެވޭ، ބަސް ބުނެވޭ ބަޔަކަށް ހަދަން އެބަ ޖެހޭ." އޭނާ ވިދާޅުވި އެވެ.

މޭރީ ވިދާޅުވި ގޮތުގައި މިހާރު ވެސް އާއިލީ ކަންކަމުގައި އެންމެ އިސް ދައުރެއް އަދާކުރާ ބަޔަކީ އަންހެނުންނެވެ. އެކަމަކު އަންހެނުންނަށް ފިރިހެނުންގެ ފަރާތުން ލިބޭ އަނިޔާތައް ގިނަ ކަމަށާއި ގިނަ ފަހަރަށް މިފަދަ ހާލަތްތަކާ އެކު ބިކަވަނީ ވެސް އަންހެނުން ކަމަށެވެ.

"މީގައި އެންމެ ބޮޑު ސުވާލަކީ ކީއްވެހޭ ގުޅުންތައް ހަރާބު ވެގެންދާ އިރު، އާއިލީ ހުރިހާ ޒިންމާއެއް އަންހެނެއްގެ ބޮލުގައި އެޅެން ޖެހޭ ސަބަބަކީ؟" މޭރީ ވިދާޅުވި އެވެ.

ރެކޯޑްތަކުން ދައްކާ ގޮތުގައި އޮސްޓްރޭލިއާ އަކީ ދުނިޔޭގެ ނިސްބަތުން ބަލާ އިރު، ދެ ޖިންސްގެ ހަމަހަމަ ކަމުގައި ބޮޑެތި ފަރަގުތަކެއް އޮތް ގައުމެކެވެ. މީގެ ސަބަބުން އަންހެނުންނަކީ މާލީ ފުދުންތެރިކަން ވެސް ކުޑަ ބައެކެވެ.