ސުޖޯއިގެ ތުރިލާއަކަށް ކަރީނާ ރުހުން ދީފި

ބޮލީވުޑްގައި މިސްޓްރީ ތުރިލާތައް ހަދަން ކުޅަދާނަ ޑައިރެކްޓަރު ސުޖޯއި ގޯޝްގެ ފިލްމެއްގައި މަސައްކަތް ކުރަން ކަރީނާ ކަޕޫރް ތައްޔާރު ވަމުން އަންނަ ކަމަށް ރިޕޯޓްތައް ބުނެފި އެވެ.

ބޮލީވުޑް ހަންގާމާ އިން ބުނި ގޮތުގައި އަންނަ އަހަރުގެ ފެބްރުއަރީ މަހުގެ ތެރޭގައި ޝޫޓިން ފަށަން ހަމަޖެހިފައިވާ މި ފިލްމަކީ އަނެއްކާ ވެސް ބެލުންތެރިންނަށް ގެނެސްދޭނެ ވަރަށް ތަފާތު އަދި ނޭވާ ހިފަހައްޓާލަން ޖެހޭ ކަހަލަ ހާދިސާތަކެއް ދައްކުވައިދޭނެ ޝައުގުވެރި ތުރިލާއެކެވެ. ނަން އަދި އިއުލާން ނުކުރާ ފިލްމުގެ މަންޒަރުތައް ނަގަން ހަމަޖެހިފައި ވަނީ ދަރުޖީލިން އާއި ކަލިމްޕޮންގަ އެވެ.

ހަންގާމާ އިން ބުނި ގޮތުގައި ސުޖޯއި ރާވާފައި އޮތީ ޝޫޓިން ފަށާ ގޮތަށް އެއްވާނެއްގައި ކުރިއަށް ގެންގޮސް އެއް ޝެޑިއުލްއަކުން މުޅި ފިލްމު ނިންމައިލާ ގޮތަށެވެ. މީގެ ޕްރޮޑިއުސަރަކީ ޖޭ ޝޭވަކްރަމާނީ އެވެ. ސުޖޯއިގެ ފިލްމަކަށް ކަރީނާ އެއްބަސްވެފައި ވަނީ ދެ މީހުން އެކީގައި މަސައްކަތް ކުރަން ވާހަކަ ދެކެވޭތާ 10 އަހަރު ފަހުންނެވެ.

ސުޖޯއިގެ އެންމެ ކާމިޔާބު ފިލްމަކީ 2012 ގައި ވިދިޔާ ބާލަންއާ އެކު ގެނެސްދިން މިސްޓްރީ ތުރިލާ "ކަހާނީ" އެވެ. އޭގެ ބޮޑު ކާމިޔާބީއާ ގުޅިގެން ދެވަނަ ބައެއް "ކަހާނީ 2: ދުރުގާ ރާނީ ސިންގް" ގެ ނަމުގައި 2016 ގައި ގެނެސްދިނެވެ.

ސުޖޯއި އެންމެ ފަހުން ގެނެސްދިން ފިލްމަކީ އަމީތާބް ބައްޗަނާއި ތާޕްސީ ޕައްނޫގެ 2019 ގެ މިސްޓްރީ ތުރިލާ "ބަދުލާ" އެވެ.

އޭނާގެ އާ ފިލްމަށް ކަރީނާ ރުހުން ދީފައިވާ އިރު މީގެ ކާސްޓްގައި މަޝްހޫރު އިތުރު ތަރިންތަކެއް ވެސް ހިމެނޭނެ ކަމަށާއި ފިލްމު ވަރަށް އަވަހަށް ރަސްމީކޮށް އިއުލާން ކުރާނެ ކަމަށް ހަންގާމާ އިން ބުންޏެވެ.

މި އަހަރުގެ ފެބްރުއަރީގައި ދެވަނަ ދަރިފުޅު ވިހޭ ފަހުން ކަރީނާ ސޮއިކޮށް، ރަސްމީކޮށް އިއުލާންކުރި ހަމައެކަނި ފިލްމަކީ އޭނާ އާއި އެކްތާ ކަޕޫރް ގުޅިގެން ޕްރޮޑިއުސްކޮށް، ހެންސަލް މެހެތާ ޑައިރެކްޓް ކުރަން ހަމަޖެހިފައިވާ އަދި ނަން އިއުލާން ނުކުރާ ތުރިލާއެކެވެ.

ކަރީނާގެ އެންމެ އަވަހަށް ރިލީޒްވާން އޮތް ފިލްމަކީ އަންނަ އަހަރުގެ ފެބްރުއަރީ 14 އަށް ތާވަލު ކޮށްފައިވާ އާމިރު ޚާންގެ "ލާލް ސިންގް ޗައްޑާ" އެވެ.