މަހުމޫދު މަރައިލި މައްސަލައިގައި އިތުރު މީހަކު ފުލުހުންގެ ބެލުމުގެ ދަށަށް

އދ. ދަނގެތި ވިޔަފާރިވެރިޔާ މަހުމޫދު އަބޫބަކުރު މަރައިލި މައްސަލައިގެ ތަހުގީގަށް އިތުރު މީހަކު މިރޭ ފުލުހުންގެ ބެލުމުގެ ދަށަށް ގެންގޮސްފި އެވެ.

އެ ރަށުން ވާހަކަ ދެއްކި މީހަކު ބުނީ އުމުރުން 57 އަހަރުގެ މަހުމޫދު މަރައިލި މައްސަލައިގައި ފުލުހުން ފަށާފައިވާ ތަހުގީގަށް ދަނގެތީ ޕޮލިސް ސްޓޭޝަންގެ ބެލުމުގެ ދަށަށް ގެންދިޔައީ އަންހެނަކު ކަމަށެވެ. އެއީ މި މައްސަލައިގައި ރަށުގެ މީހުން އެންމެ ބޮޑަށް ތުހުމަތުކުރާ އަދި މިއަދުގެ ހަވީރުއްސުރެ ފުލުހުންގެ ބެލުމުގެ ދަށުގައި ތިބި ދެ ފިރިހެނުންގެ ތެރެއިން އެކަކާ ލޯބީގެ ގޮތުން ގުޅިފައިވާ މީހާ ކަމަށް ވެ އެވެ.

ކުރިން ހައްޔަރުކުރި ދެ ފިރިހެނުންނަކީ ތޮއްޑޫން އައިސް އުޅޭ ދެ މީހުންނެވެ. ހައްޔަރުކުރި އަންހެން މީހާ އަކީ ވެސް އއ. ތޮއްޑޫ މީހެއް ކަމަށާއި އޭނާގެ އުމުރަކީ 21 އަހަރު ކަމަށް "މިހާރު" އަށް އެނގިފައިވެ އެވެ.

ދަނގެތީގައި އުޅޭ މީހުންނަށް ބޭނުންވާ ޒަރޫރީ ބާވަތްތައް އެތެރެކޮށް ވިއްކުމުގައި އިސްކޮށް ހަރަކާތްތެރިވަމުން އައި ވިޔަފާރިވެރިޔާ މަހުމޫދު މަރައިލި މައްސަލައިގައި ބަޔަކު ހައްޔަރު ކޮށްފައިވާ ކަމަށް ފުލުހުން އަދި ނުބުނެ އެވެ. ނަމަވެސް އެ ރަށުގެ މީހުން އެންމެ ބޮޑަށް ތުހުމަތު ކުރާ ދެ މީހުންނަކީ މީގެ ތިން މަހެއްހާ ދުވަސް ކުރިން ތޮއްޑޫން ގޮސް އުޅުނު ބައެކެވެ.

އެ ދެ މީހުން ފުލުހުންގެ ބެލުމުގެ ދަށަށް ގެންދިޔައީ ދަނގެތީގެ ރައްޔިތުން ނުކުމެ ގަދަކަމުންނެވެ.