މަސްތުވާތަކެތީގެ ފަރުވާއަށް ރިހެބަށް މީހުން ފޮނުވަން ފަށައިފި

މަސްތުވާތަކެތި ބޭނުންކުރުމުން ސަލާމަތް ކުރުމަށްޓަކައި ހިންމަފުށީ ރިހެބިލިޓޭޝަން ސެންޓަރުން ފަރުވާދިނުން މެދުކަނޑާލާފައިވާ އޮންނަތާ ދުވަސް ގަނޑަކަށް ފަހު، އެ ތަނަށް އަނެއްކާވެސް މީހުން ގެންދަން ފަށައިފި އެވެ.

ނޭޝަނަލް ޑްރަގް އެޖެންސީ (އެންޑީއޭ) ގެ މީޑިއާ އޮފިޝަލް އަހުމަދު ހިލްމީ މިއަދު ވިދާޅުވީ ރާއްޖޭގައި ހުރި ހަމައެކަނި ރެސިޑެންޝަލް ފަރުވާދޭ ސެންޓަރަށް ފާއިތުވި ދެ ހަފުތާގެ ތެރޭގައި ފަރުވާ އަށް މީހުން ގެންގޮސްފައިވާ ކަމަށެވެ.

މި ވަގުތު ވެސް އެ ތަނުގައި 44 މީހަކު އެބަތިބި ކަމަށާއި ކުރިއަށް އޮތް ތަނުގައި ވެސް ފަރުވާ އަށް މީހުން ފޮނުވާނެ ކަމަށް ހިލްމީ ވިދާޅުވި އެވެ.

ކޮވިޑު-19 ގެ ހާލަތާ ގުޅިގެން ރިހެބިލިޓޭޝަން ސެންޓަރަށް ގެންދާ މީހުންގެ އަދަދު ވަރަށް ބޮޑަށް ދަށްވެ، އެ ސެންޓަރު އޮތީ ހުހަށެވެ. އެއްފަހަރާ 172 މީހުންނަށް ފަރުވާ ދެވޭ މަރުކަޒުން މި މަހުގެ ކުރީކޮޅާ ހަމައަށް ތިބީ 26 މީހުންނެވެ.

ރިހެބިލިޓޭޝަން ސެންޓަރަށް ގެންދިއުމުގެ ކުރިން 10-21 ދުވަހުގެ ޑިޓޮކްސް ދޭންޖެހޭނެ އެވެ. މަރާމާތަށްޓަކައި ހިންމަފުށީ ޑިޓޮކްސް ސެންޓަރު ބަންދުކޮށްފައި ހުރުމުން މި ވަގުތު ބޭނުންކުރަމުން އަންނަނީ ރިމާންޑު ސެންޓަރުގައި ހުންނަ ޑިޓޮކްސް ފެސިލިޓީ އަދި ހުޅުމާލެ ދެ ވަނަ ފިޔަވަހީގައި ގާއިމު ކޮށްފައިވާ ޑިޓޮކްސް ސެންޓަރެވެ.

މަސްތުވާން ދާ އައްޑާތައް މި ފަހުން ބަންދުކުރުމާއެކު މަގުމަތީގައި މަސްތުވާތަކެތި ބޭނުންކޮށް، އޭގެ ވިޔަފާރި ކުރުމުގެ މައްސަލަ ވަނީ ބޮޑުވެފަ އެވެ. ރައްޔިތުންގެ މަޖިލީހުގެ ކޮމިޓީއެއްގައި ކޮމިޝަނަރު އޮފް ޕޮލިސް މުހައްމަދު ހަމީދު ވިދާޅުވެފައި ވަނީ ޑްރަގްސް އަށް ފަރުވާ ހޯދަން ބޭނުންވާ މީހުންނާއި މިހާރު ފަރުވާ ހޯދަމުން އަންނަ ލިސްޓުގައި 3،300 މީހުން ހިމެނޭ ކަމަށެވެ.

އޭނާ ވިދާޅުވިގޮތުގައި، މަސްތުވާތަކެތި ބޭނުންކުރާ މީހުންގެ އަދަދު މިދިޔަ އަހަރުތަކުގައި ދިޔައީ އިތުރުވަމުންނެވެ. އެގޮތުން، 2019 ވަނަ އަހަރު އަލަށް 493 މީހަކު މަސްތުވާތަކެތި ބޭނުންކުރަން ފެށިއިރު، މިދިޔަ އަހަރު އަލަށް 516 މީހަކު އެ ވަބާގައި ޖެހިފައި ވެ އެވެ.