ހައި ސްޕީޑް ފެރީ ނެޓްވޯކްގެ ފުރަތަމަ ލޯންޗް ނިންމައި ޓެސްޓުކުރަން ފަށަނީ

ރާއްޖޭގެ ރަށްތައް ހައި ސްޕީޑް ފެރީ ނެޓްވޯކަކުން ގުޅާލުމަށް ފެށި "އިންޓެގްރޭޓަޑް ނޭޝަނަލް ޕަބްލިކް ފެރީ ނެޓްވޯކު"ގެ ފުރަތަމަ ފިޔަވަހީގެ ދަށުން ފުރަތަމަ ލޯންޗު ބަނދެ ޓެސްޓު ކުރަން ތައްޔާރުވެއްޖެ އެވެ.

ސަރުކާރުގެ ވައުދުތަކުގެ ތެރޭގައި ހިމެނޭ ހައި ސްޕީޑް ފެރީގެ ނިޒާމު ގާއިމް ކުރުމުގެ ފުރަތަ ފިޔަވަހި ހަވާލުކޮށްފައި ވަނީ އެމްޓީސީސީއާ އެވެ. އެ ކުންފުނިން ލޯންޗުތައް ބަންނަން ހަވާލުކުރީ ލޯންޗް ބަނުމުގެ މަސައްކަތް ރާއްޖޭގައި ފުޅާ ދާއިރާއެއްގައި ކުރާ ގަލްފް ކްރާފްޓަށެވެ. އެ މަޝްރޫއުގެ ދަށުން މިއަދު ފުރަތަމަ ފަހަރަށް ލޯންޗެއް ވަނީ މޫދަށް ބާލައިފަ އެވެ.

އެމްޓީސީސީގެ ސީއީއޯ އާދަމް އާޒިމް "މިހާރު" އަށް ވިދާޅުވީ، އިންޖީނު ވެސް އަޅައި އެ ލޯންޗު ބޭލީ ޓެސްޓު ކުރަން ކަމަށެވެ. ޓެސްޓުކުރުމުގެ މަސައްކަތް މި މަހު ފަށާނެ ކަމަށް އޭނާ ވިދާޅުވި އެވެ.

"އަޅުގަނޑުމެން ޓްރައިލް އަށް ރެޑީ ކުރަން ވެގެން މި ބޭލީ. މި މަހުގެ ތެރޭގައި ޓެސްޓް ޓްރައިލްއަށް ދުއްވަން ފަށާނެ،" އާޒިމް ވިދާޅުވި އެވެ.

އާޒިމް ވިދާޅުވީ، 30 ނޮޓްގެ ބާރުމިނުގައި ދުވާ މި ލޯންޗުތައް އާދައިގެ ދޯނިތަކާ އަޅާބަލާއިރު ތިން ގުނަ ބާރުމިނުގައި ދުވާނެ ކަމަށެވެ. އަދި ކޮންމެ ލޯންޗެއްގައި 50 މީހުންނަށް ދަތުރު ކުރެވޭނެ ކަމަށާއި ލޯންޗުތައް ހުންނާނީ އޭސީ ކޮށްފައިކަމަށް ވެސް ވިދާޅުވި އެވެ. މީގައި މީހުން އިށީންނަން ހުންނާނީ އެއާކްރާފްޓް ސީޓުތައް ކަމަށް ވެސް ވިދާޅުވި އެވެ.

ލޯންޗުތައް ފަރުމާކުރަނީ ނުކުޅެދުންތެރިކަން ހުންނަ މީހުންނަށް ވެސް އަމިއްލައަށް އަރައި ފޭބޭ ގޮތަށެވެ.

ސަރުކާރުން ހައި ސްޕީޑް ފެރީގެ ހިދުމަތް އެންމެ ފުރަތަމަ ފަށަން ނިންމާފައި ވަނީ ހއ.، ހދ. އަދި ށ. އަތޮޅުގަ އެވެ. މުޅި މަޝްރޫއުގެ ފުރަތަމަ ފިޔަވައްސެވެ. އެ ފިޔަވަހި ނިމޭ އިރު 41 ރަށަކަށް ހައި ސްޕީޑް ފެރީގެ ހިދުމަތް ދެވޭނެ އެވެ.

އެ އަތޮޅުތަކުގައި އެ ހިދުމަތް ދިނުމަށް ބޭނުންވާ 17 ލޯންޗެއް ބަނުމަށް ނިންމާފައިވާ ކަމަށް އާޒިމް ވިދާޅުވި އެވެ. އޭގެ ތެރެއިން، ހަ ލޯންޗެއްގެ ދަތުރުތައް ނޮވެމްބަރު 15ގެ ކުރިން ފެށޭނެ ކަމަށް އޭނާ ވިދާޅުވި އެވެ.

"އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް" އަކީ މުޅި ރާއްޖެ އަށް އަމާޒުކޮށް ފަސިންޖަރުން އަދި މުދާ އުފުލާ ފެރީ ހިމެނޭ ގޮތަށް، ރާއްޖޭގެ އެކި ސަރަހައްދުތައް ގުޅާލުމަށް ފެށި މަޝްރޫއެކެވެ.