ޑިސެމްބަރު މަހާ އެކު، ކޯޓުތައް ރިސެސް އަށް ހިނގައްޖެ

އެހެން އަހަރުތަކެކޭ ވެސް އެއްގޮތަށް، މި ޑިސެމްބަރު މަސް ފެށުމާ އެކު މާލޭގެ ގިނަ ކޯޓުތަކެއް ރިސެސް އަށް ހިނގައްޖެ އެވެ.

މާލޭގައި ހުންނަ ސުޕީރިއާ ކޯޓުތަކާއި ހައި ކޯޓު އަދި ސުޕްރީމް ކޯޓުން ވެސް ކޮންމެ އަހަރެއްގެ ޑިސެމްބަރު މަހު ރިސެސް އަށް ދާނެ އެވެ. އެކަމަކު މިދިޔަ އަހަރުގެ ޑިސެމްބަރު މަހު ސުޕްރީމް ކޯޓުން ނެރުނު އަމުރަކުން އެއްވެސް ކޯޓުތައް ރިސެސް އަށް ނުދާން އެންގުމުން އެ އަހަރު އެ މުއްދަތުގައި ކޯޓުތައް ރިސެސްއަކަށް ނުދެ އެވެ.

ކްރިމިނަލް ކޯޓުގެ ރިސެސް މުއްދަތު އިއްޔެ އިން ފެށިގެން މި މަހުގެ 15 ވަނަ ދުވަހުގެ ނިޔަލަށް ކުރިއަށް ދާއިރު، ޖުވެނައިލް ކޯޓާއި ސިވިލް ކޯޓުގެ ރިސެސްގެ މުއްދަތަކީ އިއްޔެ އިން ފެށިގެން މި މަހުގެ 20 ވަނަ ދުވަހުގެ ނިޔަލެވެ. އެކަމަކު ޑްރަގް ކޯޓާއި ފެމިލީ ކޯޓުގެ ރިސެސް މުއްދަތު އަދި ސާފެއް ނުވި އެވެ.

ހައި ކޯޓާއި ސުޕްރީމް ކޯޓުގެ ރިސެސް މުއްދަތު ނިމުމަކަށް އަންނާނީ އަންނަ ޖެނުއަރީ މަހުގެ ފުރަތަމަ ރަސްމީ މަސައްކަތު ދުވަހު އެވެ.

ޑިސެމްބަރު މަހުގެ އިތުރުން ކޮންމެ އަހަރެއްގެ ޖޫން މަހު ވެސް ސުޕީރިއާ ކޯޓުތަކުން 15 ދުވަހުގެ ރިސެސް އަކަށް ދާނެ އެވެ.

ރިސެސް މުއްދަތުގައި ބައެއް ކޯޓުތަކުން ހުރިހާ ޝަރީއަތްތަކެއް މަޑުޖައްސާލާއިރު، އަނެއް ބައި ކޯޓުތަކުން ހުރިހާ ޝަރީއަތްތަކެއް ހުއްޓާލުމުގެ ބަދަލުގައި ޝަރީއަތްތައް މަދުކޮށްލަނީ އެވެ. އެހެންވިޔަސް ކޮންމެހެން ބާއްވަންޖެހޭ ޝަރީއަތްތައް ބޭއްވުމާއި ނެރެންޖެހެ އަމުރުތައް އެ މުއްދަތުގައި ވެސް ނެރޭނެ އެވެ. އަދި ކޯޓުތަކުގެ އިދާރީ މަސައްކަތްތައް ކުރިއަށް ގެންދާނެ އެވެ.