ސީއެޗްއެސްއީގެ އިސްލާމް ޓީޗަރު ކުއްލި ގޮތަކަށް ނިޔާވެއްޖެ

ސެންޓާ ފޯ ހަޔާ ސެކަންޑްރީ އެޑިއުކޭޝަން (ސީއެޗްއެސްއީ)ގެ އިސްލާމް ޓީޗަރެއްގެ ގޮތުގައި 22 އަހަރު ހޭދަކޮށް، އަދި ދަރިވަރުންގެ ވަރަށް ބޮޑު އިހުތިރާމަކާއި ލޯތްބެއް ހޯދާފައިވާ ސުއޫދު މުހައްމަދުފުޅު މިއަދު ކުއްލިގޮތަކަށް ނިޔާވެއްޖެ އެވެ.

ސުއޫދު، 52، ސީއެޗްއެސްއީއާ ގުޅުނީ މީގެ 19 އަހަރު ކުރިންނެވެ. އޭނާ ވަނީ އެ ސްކޫލުގެ އިސްލާމް ޑިޕާޓްމަންޓްގެ ހެޑްގެ ގޮތުގައި ވެސް މަސައްކަތްކޮށްފަ އެވެ.

ސީއެޗްއެސްއީގެ ޕްރިންސިޕަލް އައިޝަތު ސޮފޫރާ، "މިހާރު" އަށް ވިދާޅުވި ގޮތުގައި ސުއޫދު ވަނީ އިއްޔެ ވެސް ސްކޫލަށް ގޮސް މަސައްކަތް ކޮށްފަ އެވެ. އޭނާ ކުއްލި ގޮތަކަށް ނިޔާވީ، ނިދާފައި އޮއްވައި ނޭވާ ލާން އުނދަގޫވެގެން ހޮސްޕިޓަލަށް ގެންދިޔަތާ މާ ގިނައިރުތަކެއް ނުވެ ރޭ ފަތިހު ކަމަށް ސޮފޫރާ ވިދާޅުވި އެވެ.

ސޮފޫރާ، ސުއޫދު ސިފަކުރެއްވީ ވަރަށް މަޑުމައިތިރު ކުދިންނާ ގުޅޭ މީހެއްގެ ގޮތުގަ އެވެ.

"އަބަދުވެސް ފެންނައިރު ހިނިތުންވުމާ އެކީގައި ހުންނަވާނީ. ވަރަށް އިސްލާމިކް ނޮލެޖް ހުންނަ ބޭފުޅެއް އެއީ. ގުރުއާނާއި ހަދީސް އިލްމުން ހާއްސަ. އަދި އެހާ ކުދިންނާ ގުޅިގެން އުޅޭނީ. ކުދިން ވެސް ސުުއޫދުއާ ވަރަށް ގާތްކޮށް އުޅޭނީ،" ސޮފޫރާ ވިދާޅުވި އެވެ.

ސުއޫދު ނިޔާވި އިރު އޭނާ އައީ ސީއެޗްއެސްއީގެ އިސްލާމް ޓީޗަރެއްގެ އިތުރުން އިސްލާމިކް ޔުނިވާސިޓީގެ ޕާޓް ޓައިމް ލެކްޗަރާއެއްގެ ގޮތުގައި މަސައްކަތް ކުރަމުންނެވެ. ސުއޫދު ވަނީ ކުރީގެ އެމްއީއެސް އާއި އަމީނިއްޔާ ސްކޫލުގައި އިސްލާމް ޓީޗަރެއްގެ ގޮތުގައި ވެސް މަސައްކަތް ކޮށްފަ އެވެ.

ސުއޫދު ނިޔާވުމާ ގުޅިގެން އެޑިއުކޭޝަން މިނިސްޓްރީން ނެރުނު ބަޔާނެއްގައި ބުނެފައި ވަނީ އެއީ ތައުލީމީ ދާއިރާ އަށް ލިބުނު ވަރަށް ބޮޑު ގެއްލުމެއް ކަމަށެވެ.