ފިލިލީންސްގެ ބޮކްސިން ތަރި މެނީ ރިޔާސީ ރޭހަށް

ގާނޫނު ހަދާ މަޖިލީހުގެ މެމްބަރެއްގެ ގޮތުގައި މަސައްކަތްކުރައްވަމުން ގެންދަވާ ފިލިޕީންސްގެ މަޝްހޫރު ބޮކްސިން ތަރި މަނީ ޕެކްޔާ، އަންނަ އަހަރު އެ ގައުމުގެ ރިޔާސީ އިންތިހާބުގައި ވާދަކުރައްވަން ނިންމައިފި އެވެ.

އުމުރުން މިހާރު 42 އަހަރުގެ ޕެކްޔާ އިންތިހާބުގައި ވާދަކުރައްވާނީ ވެރިކަންކުރާ ޕާޓީ، ޕީޑީޕީ-ލަބަންގެ ފެކްޝަނެއްގެ ކެންޑިޑޭޓެއްގެ ގޮތުގަ އެވެ. ރިޔާސީ ރޭހަށް ނުކުންނެވުމާ ބެހޭ ގޮތުން ޕެކްޔާ ވިދާޅުވީ އަބަދު ވެސް އޭނާ އަކީ ބޮޑެތި ކަންކަމާ ކުރިމަތިލައްވަން ބޭނުންވާ މީހެއް ކަމަށެވެ.

"ބޮކްސިން ރިންގާއި، ރިންގުން ބޭރުގައި ވެސް އަހަންނަކީ ފައިޓަރެއް،" ޕަކްޔާ ވިދާޅުވި އެވެ. "އަދި ދެމިހުންނާނީ ވެސް އެ ގޮތުގައި."

ގައުމުގެ ވެރިކަމަށް ވަޑައިގަންނަވަން މަސައްކަތްކުރައްވާ އިރު އޭނާގެ އެޖެންޑާގެ އެންމެ ކުރީގައި އުޅެނީ މައިގަނޑު ދެ ދާއިރާއެކެވެ. އެއީ ކޮރަޕްޝަނާ ދެކޮޅަށް މަސައްކަތްކުރުމާއި ފަގީރުކަން ނައްތައިލުމެވެ.

ބޮކްސިންތެޅުންތެރިއެއްގެ ގޮތުގައި ކާމިޔާބު ކެރިއަރެއް ބިނާކުރު އަދި "ޕެކްމޭން" ގެ ނަމުން މަޝްހޫރުވި ޕެކްޔާ އަކީ ފިލިލީންސްގައި އުފެދުނު އެންމެ ކާމިޔާބު އެއް ބޮކްސިން ތަރި އެވެ. ފަސް ކުދިންގެ ބައްޕަ ގާނޫނު ހަދާ މަޖިލީހުގައި މަސައްކަތްކުރައްވަނީ 2016 އިން ފެށިގެންނެވެ.

ވެރިކަންކުރާ ޕާޓީގެ ފެކްޝަނަކުން ޕެކްޔާ ރިޔާސީ ރޭހަށް ނޮމިނޭޓްކުރި އިރު، މިހާރު ރައީސްގެ މަގާމުގައި ހުންނެވި ރޮޑްރިގޯ ޑުޓާޓަށް އިތުރު ދައުރެއް ޕާޓީގެ ފަރާތުން ނުދޭން ނިންމުމާ ގުޅިގެން އިދިކޮޅު ޕާޓީގެ ފެކްޝަނެއްގެ ކެންޑިޑޭޓްގެ ނައިބު ރައީސްގެ ގޮތުގައި އޭނާ ވާދަކުރައްވަން ވަނީ ނިންމަވައިފަ އެވެ. ޑުޓާޓް، 76، އަށް ވަރަށް ގިނަ ބައެއްގެ ފާޑުކިޔުންތައް ވެސް މިކަމާ ހެދި އަމާޒުވެފައިވެ އެވެ.

ވެރިކަންކުރާ ޕާޓީގެ ފަރާތުން އިންތިހާބުގައި ވާދަކުރައްވާނީ ޑުޓާޓްގެ ކެބިނެޓްގައި ވެސް ކުރިން މަސައްކަތްކުރައްވާފައިވާ އަދި މިހާރު ވެސް ގާނޫނު ހަދާ މަޖިލީހުގެ މެމްބަރެއްގެ ގޮތުގައި ހުންނެވި ކްރިސްޓޯފާ (ބޮން) ގޯ، 47، އެވެ. އޭނާގެ ނައިބެއްގެ ގޮތުގައި ޑުޓާޓް ގަބޫލުރައްވަން ދެކޮޅު ހެއްދެވުމާ ގުޅިގެން މިހާރު ބެލެވޭ ގޮތުން ނައިބުގެ ޓިކެޓް ދޭނެ ކަމަށް ބެލެވެނީ ޑުޓާޓްގެ އަންހެން ދަރިފުޅު ސާރާ ޑުޓާޓް-ކާޕިއޯއަށެވެ.

މީޑިއާތަކުން ބުނީ ވެރިކަންކުރާ ޕާޓީ އާއި އެ ޕާޓީގެ ފެކްޝަނަކުން ރިޔާސީ އިންތިހާބަށް ވާދަކުރަން ނިންމާފައިވާތީ ފިލިޕީންސްގެ އިލެކްޓޯރަލް ކޮމިޝަނުން ބަލައިގަންނާނީ ކޮން ފެކްޝަނެއްކަން އަދި ކަށަވަރުނުވާ ކަމަށެވެ.

ރިޔާސީ އިންތިހާބު އޮންނާނީ މެއި މަހުގެ ތެރޭގަ އެވެ.