މަލާވީން ޓައިޒަން ބްރޭންޑް އެމްބެސެޑަރަކަށް ހަމަޖެއްސުމުން ފާޑުކިޔުންތަކެއް

ބޭސްވެރިކަމާ ގުޅުން ހުރި ކަންކަމަށް ކެނަބިސް އުފެއްދުންތައް ޕްރޮމޯޓް ކުރަން މަލާވީ އިން އެމެރިކާގެ ކުރީގެ ބޮކްސިން ލެޖެންޑް މައިކް ޓައިޒަން ބްރޭންޑް އެމްބެސެޑަރަކަށް ހަމަޖެއްސުމާ ގުޅިގެން ގިނަ ބައެއްގެ ފާޑުކިޔުންތައް އަމާޒުވެއްޖެ އެވެ.

އޭނާ ބްރޭންޑް އެމްބެސެޑަރަކަށް ހަމަޖެއްސުމާ ބެހޭ ގޮތުން މަލާވީގެ އެގްރިކަލްޗަ މިނިސްޓަރު ލޮބިން ލޯ ވިދާޅުވީ ބޭސްވެރިކަމުގައި ކެނަބިސް ބޭނުން ކުރުމާ ގުޅޭ ވަރަށް ގިނަ ކަންކަމުގައި ޓައިޒަން ބައިވެރިވާނެ ކަމަށާއި އޭނާގެ ސަބަބުން އެ ގައުމުގެ ޓޫރިޒަމް ވެސް ޕްރޮމޯޓްވާން މަގުފަހިވާނެ ކަމަށެވެ.

މިނިސްޓަރު ވިދާޅުވި ގޮތުގައި ޓައިޒަން، 55، އާ އެކު ކުރެވޭ މަސައްކަތުގެ ސަބަބުން މަލާވީ އަށް އިންވެސްޓްމަންޓްތަކުގެ އާ ދޮރުތަކެއް ވެސް ހުޅުވޭނެ އެވެ.

ނަމަވެސް ބްރޭންޑް އެމްބެސެޑަރަކަށް އޭނާ ހަމަޖެއްސުމުން އެކަމާ ދެކޮޅަށް އަޑު އުފުލާ މީހުންގެ އެންމެ ބޮޑު ކަންޑޮޑުވުމަކީ ކުރިން ރޭޕްގެ ކުށް ސާބިތުވި މީހަކަށް އެމްބެސެޑަރުކަން ދިނުމެވެ. ރޭޕްގެ މައްސަލައެއްގައި ޓައިޒަނަށް ކުށް ސާބިތުވެ އޭނާ 1992 ގައި ޖަލަށްލާފައި ވަނިކޮށް މިނިވަންވީ 1995 ގަ އެވެ.

މަލާވީގެ ކެނަބިސްގެ ބްރޭންޑް އެމްބެސެޑަރަކަށް ޓައިޒަން ހަމަޖައްސައި އެކަން ރަސްމީކޮށް ސަރުކާރުން އެންގި ނަމަވެސް އެކަމާ ބެހޭ ގޮތުން އޭނާ އެއްވެސް އެއްޗެއް ބުނެފައެއް ނުވެ އެވެ.

އެ ގައުމުގެ ޖަމިއްޔާއެއް ކަމަށްވާ ސެންޓަ ފޯ ޕަބްލިކް އެކައުންޓަބިލިޓީ (ސީޕީއޭ) ގެ އެކްޓިން ޑިރެކްޓަރު ކޮންޑްވާނީ މުންތަލީ ވިދާޅުވީ ބްރޭންޑް އެމްބެސެޑަރަކަށް ސަރުކާރުން ޓައިޒަން ހަމަޖެއްސީ އޭނާއާ ބެހޭ ގޮތުން ރަނގަޅަށް "ހޯމްވޯކް" ނަހަދާ ކަމަށެވެ. އެހެންވެ އެފަދަ ފުރުސަތެއް ޓައިޒަނަށް ދިނުމަކީ ވަރަށް ޒިންމާދާރުކަން ކުޑަ އަދި ރައްޔިތުން ވެސް ބަލައިގަންނާނެ ކަމެއް ނޫން ކަމަށް ވިދާޅުވި އެވެ.

"ބޮޑު ކުށަކަށް އަބަދު ލިބި މިނިވަންވުމަކީ މީހާ އަދި އެއްކޮށް ސާފުވުމެއް ނޫން. އަހަރެމެންގެ ކަންބޮޑުވުމަކީ ގައުމީ ފެންވަރުގައި ކުރާ ކަމަކަށް ރޭޕްގެ މައްސަލައެއްގައި ބެދުނު މީހަކު ބްރޭންޑް އެމްބެސެޑަރަކަށް ހަމަޖައްސައި ގައުމުގެ މޫނުމަތި ހަރާބުކުރަން އުޅޭތީ." މުންތަލީ ވިދާޅުވި އެވެ.

މިކަމަށް ރައްދު ދެއްވަމުން އެގްރިކަލްޗަ މިނިސްޓްރީގެ ތަރުޖަމާނު ގްރޭޝިއަން ލުންގޫ ހުކުރު ދުވަހު ވިދާޅުވީ އެމްބެސެޑަރަކަށް ޓައިޒަން ހަމަޖެއްސުމަކީ ސުވާލު އުފައްދަން ޖެހޭ ކަމެއް ނޫން ކަމަށެވެ. އޭނާ ވިދާޅުވީ ޓައިޒަން އެމްބެސެޑަރަކަށް ހަމަޖެއްސީ އޭނާ އަކީ ކުށެއްގައި ބެދުނަސް މިހާރު އިސްލާހުވެފައިވާ މީހަކަށްވާތީ ގިނަ ބަޔަކަށް އެކަމުން ނަމޫނާއެއް ވެސް ލިބޭނެ އެވެ.

ދުނިޔޭގައި އުފެދުނު އެންމެ މޮޅު އަދި ކާމިޔާބު ބޮކްސިން ތަރިންގެ ތެރޭގައި ހިމެނޭ ޓައިޒަން ވަނީ 2005 ގައި ޕްރޮފެޝަނަލް ބޮކްސިން އިން ރިޓަޔާކޮށްފަ އެވެ. އެކަމަކު "އަޔަން މައިކް" އާއި "ކިޑް ޑައިނަމައިޓް" ފަދަ ނަންތަކުން މަޝްހޫރުވި ލެޖެންޑަކީ މިހާރު ވެސް އެ ކުޅިވަރަށް ހިދުމަތް ކުރަމުން އަންނަ މީހެކެވެ.