ޓައިސަން ފަސޭހައިން ބަލިވެއްޖެ، އެކަމަކު ސިފަކުރީ ކާމިޔާބެއްގެ ގޮތުގައި

ގިނަ ބަޔަކު އިންތިޒާރުކުރި މެޗުން އިއްޔެ ޖޭކް ޕޯލް އަތުން ބަލިވި ނަމަވެސް، އަހަރުތަކަށް ފަހު އެނބުރި ބޮކްސިން ރިންގަށް އެރުނީތީ ހިތާމަނުކުރާ ކަމަށް ދުނިޔޭގެ ކުރީގެ ހެވީވެއިޓް ޗެމްޕިއަން މައިކް ޓައިސަން ބުނެފި އެވެ.

އެމެރިކާގެ ޑަލަސްގައި ކުޅުނު މި ހާއްސަ މެޗުން އުމުރުން 58 އަރުގެ ޓައިސަން ބަލިވި އުމުރުން 27 އަހަރުގެ ޕޯލް އަކީ ކުރިން ޔޫޓިއުބުގައި މަޝްހޫރުކަން ވްލޮގަރެކެވެ.

ޑަލަސް ކައުބޯއިސްގެ ސްޓޭޑިއަމުގައި އޮތް މި މެޗު ބަލަން 72،300 މީހުން ވަނެވެ. އަދި ނެޓްފްލިކްސް ލައިވް ސްޓްރީމިން މެދުވެރިކޮށް 60 މިލިއަނެއްހާ ގޭގައި ބެލި އެވެ.

"މިއީ ބަލިވިޔަސް މޮޅުވުމުގެ އިހުސާސްކުރެވޭ ކަހަލަ ވަގުތުތަކުގެ ތެރެއިން ވަގުތެއް. މި މެޗާ މެދު އުފާވޭ. ރިންގަށް އެރުނީތީ ހިތާމައެއް ނުކުރަން،" ޓައިސަން ބުންޏެވެ.

ޖުލައި މަހަށް ރޭވި މި މެޗު މި މަހަށް ފަސްކުރީ ޖޫންގައި ޓައިސަން އަށް ސިއްހީ މައްސަލައެއް ދިމާވުމުންނެވެ. އޭނާ ބުނީ އެ ފަހަރު 8 ފަހަރު ލޭ އަޅަން ޖެހި، ބަރުދަން ވަރަށް ބޮޑަށް ލުއިވެ މަރާ ހަނގުރާމަކުރަން ޖެހުނު ކަމަށެވެ.

"މި މެޗަށް ސިއްހީ ހާލަތު ރަނގަޅުކުރަން އަހަރެން ވަރަށް މަސައްކަތްކުރިން. އެހެންވީމާ މިއީ އަހަންނަށް މޮޅެއް،"

ޓައިސަން ބުނީ ފުރިފައި އޮތް ސްޓޭޑިއަމެއްގައި، އޭނާގެ ކުދިންގެ ވެސް ކުރިމަތީގައި، އޭނާ އަށް ވުރެ އެތައް އަހަރެއް ހަގު ހުނަރުވެރި ބޮކްސިން ތެޅުންތެރިޔަކާ އެކު، 8 ބުރު ފުރިހަމަކުރުމަކީ އާދަޔާހިލާފު ތަޖުރިބާއެއް ކަމަށެވެ.

ޕްރޮފެޝަނަލް މެޗެއްގެ ދަރަޖަ ދީފައި އޮތް މި މެޗުން ޕޯލް މޮޅުވީ ތިން ފަނޑިޔާރުންގެ ވެސް އިއްތިފާގުން 80-72، 79-73، އަދި 79-73 ޕޮއިންޓުންނެވެ. ޕޯލް ވަނީ މި މެޗުގައި އޭނާގެ ޒުވާންކަމާއި ހަލުވިކަމުގެ ފައިދާ ނަގައިފަ އެވެ. ޕޯލް ބުނީ ޓައިސަންއާ އެކު މެޗަކަށް އެރުމަކީ ލިބުނު ޝަރަފެއް ކަމަށެވެ.

ޓައިސަން ވަނީ މިފަދަ އިތުރު މެޗަކަށް އަރަން ތައްޔާރަށް ހުރި ކަމަށް ނުސީދާކޮށް ބުނެފަ އެވެ. ހެވީވެއިޓް ޗެމްޕިއަންކަން ހޯދި އެންމެ ޒުވާން ތެޅުންތެރިޔާގެ ޝަރަފް އޮފް ޓައިސަން އަކީ 1987-1990 އަށް ދުނިޔޭގެ އެއް ވަނަ އެވެ. އޭނާ ރިޓަޔާކުރީ 2005 ގަ އެވެ.