ލޯންޗުން ޖެހި އަނިޔާވި މީހާގެ ހާލު އަދިވެސް ސީރިއަސް، ފަރުވާދެނީ އައިސީޔޫގައި

ކ. މާފުށީ ނެރު ކައިރި އަށް މަހަށް ނުކުމެ އުޅުނު ޑިންގީއެއްގައި ލޯންޗަކުން ޖެހި ހިނގި އެކްސިޑެންޓުގައި އަނިޔާވި މީހާގެ ހާލު އަދިވެސް ސީރިއަސް ކަމަށް އޭޑީކޭ ހޮސްޕިޓަލުން ބުނެފި އެވެ. ހުކުރު ދުވަހުގެ ރޭ 9:15 ހާއިރު ޑިންގީގެ ފަހަތަށް ލޯންޗެއް އަރާ ހިނގި އެ ހާދިސާގައި ޑިންގީގައި އިން މީހާއަށް އަނިޔާވެ ފަރުވާ އަށް ފުރަތަމަ ގެންދިޔައީ މާފުށީ ހެލްތު ސެންޓަރަށެވެ. އެކަމަކު އެ މީހާގެ ހާލަތު ގޯސްކަމުން އެ ސެންޓަރުން އިމަޖަންސީގައި އޭނާ މާލެ ގެނަ އެވެ.

އެނގިފައިވާ ގޮތުގައި އެ އެކްސިޑެންޓުގައި އެ މީހާގެ ބޮލަށް ވަރަށް ބޮޑަށް އަނިޔާވެފައިވެ އެވެ. މާލެ ގެނައި އިރު ވެސް އޭނާގެ ނޭފަތުން ލޭ އާދެ އެވެ.

އޭޑީކޭގެ މެނޭޖިން ޑިރެކްޓަރު އަހުމަދު އައްފާލް ވިދާޅުވީ އެ މީހާ އޮތީ އަދިވެސް ވަރަށް ސީރިއަސް ހާލަތެއްގައި ކަމަށާއި އެހެންވެ އޭނާއަށް ފަރުވާ ދެނީ އައިސީޔޫގައި ކަމަށެވެ. އެކަމަކު އެ މީހާއަށް ލިބުނު އަނިޔާގެ ސީދާ ތަފްސީލެއް ނޭނގެ އެވެ.