ށ. އަތޮޅު ކުރިއަރުވަން ގިނަ ހުށަހެޅުންތަކެއް، ރައީސްގެ ޖަވާބުތަކުން ބޮޑު އުންމީދެއް

ށ. އަތޮޅު ކައުންސިލުން ތަރައްގީ އަށް ގެންގުޅޭ ތަސައްވުރަކީ ސަރުކާރުން ވެސް ބޭނުންވާ ގޮތަށް ހިދުމަތްތައް އަތޮޅުގެ އެކި ރަށްތަކަށް ބަހާލައިގެން ކުރިއެރުން ހޯދުމެވެ. ތައުލީމީ ފުރުސަތުތައް ކޮމަންޑޫން ފަހިކުރުމެވެ. ސިއްހީ ހިދުމަތް ފުނަދޫންނެވެ. ޓޫރިޒަމް ކުރިއެރުވެން އޮތުމުން ބިލެތްފަހީގައި އެއާޕޯޓެވެ. މަސްވެރިކަމާއި ދަނޑުވެރިކަން ކޮމަންޑު އާއި ފޯކައިދޫގައި ފުޅާކުރުމެވެ.

ހިދުމަތްތައް މިގޮތަށް އެކި ރަށްތަކަށް ބަހާލައިގެން މުޅި އަތޮޅު ކުރިއެރުވުމުގެ ޕްލޭންގައި, ހިމަނާނެ ކަންކަން ފަހިކޮށްދެއްވަން އަތޮޅު ކައުންސިލުން އިއްޔެ ވަނީ ރައީސަށް ހުށަހަޅައިފަ އެވެ.

"އިގްތިސާދީ ގޮތުން ފުދުންތެރި ހިދުމަތްތަކުގައި ކުރިއަރާފައިވާ އަތޮޅަކަށް ހެދުމަށް ކައުންސިލްގެ ވިސްނުން ހިއްސާކުރީ. އަޅުގަނޑުމެން ފަސް އަހަރުގެ ޕްލޭން އެކުލަވައިލަމުން އަންނަނީ ތައުލީމާއި ސިއްހަތާއި އިގްތިސާދާއި ދަތުރުފަތުރު ވެސް ހިމަނައިގެން," އާބާދީގައި 18،000 މީހުން ހިމެނޭ އަތޮޅު ކައުންސިލްގެ ރައީސް މުހައްމަދު ސިޔާމް ވިދާޅުވި އެވެ.

އޭނާ ވިދާޅުވި ގޮތުގައި ލާމަރުކަޒީ ގާނޫނުން ކައުންސިލްތަކަށް އަލަށް ދޫކޮށްފައިވާ ބާރުތަކާއި ހަވާލުކޮށްފައިވާ ޒިންމާތައް އަތޮޅުގެ ރައްޔިތުންނަށް ފައިދާވާ ގޮތަށް ބޭނުންކޮށް ކައުންސިލްގެ އަދިވެސް އަމާޒަކީ އެންމެ ރަނގަޅަށް ހިންގާ ކައުންސިލްގެ ގޮތުގައި ދެމިއޮތުމެވެ.

އަތޮޅު ކައުންސިލުން ރައީސަށް ހުށަހެޅި ކަންކަން

އެޑްމިޓްކޮށްގެން ފަރުވާދޭ އަށް އެނދުގެ ހޮސްޕިޓަލުގެ ޖާގައިގެ ދަތިކަން ހައްލުކުރަން އާ ހޮސްޕިޓަލެއް އެޅުން.

އަތޮޅުގެ އާބާދީގެ ބޮޑު ބަޔަކު ށ. އަތޮޅު ހޮސްޕިޓަލަށް ބަރޯސާވުން ކުޑަކޮށް، ހިދުމަތް ލުއި ފަސޭހަކުރަން މިނީ ދެ ހޮސްޕިޓަލް ތަރައްގީކުރުން.

ލާމަރުކަޒީ ގާނޫނަށް އައި ބަދަލާ އެކު މުވައްޒަފުން އިތުރުވެ ކައުންސިލްތަކުގެ ޖާގައިގެ ދަތިކަމަށް ދިމާވެފައިވާ މައްސަލަތައް ހައްލުކުރުން.

ތައުލީމީ ފުރުސަތުތައް ފަހިކޮށްދޭން ށ. އަތޮޅުގައި މިނީ ކޮލެޖެއް ގާއިމުކުރުން. ސެން ކްލާސްގެ ކުދިންނަށް ބޭނުންވާ ވަސީލަތްތައް ހޯދައިދިނުން.

މީގެ 15 އަހަރު ކުރިން ޓޫރިޒަމްގެ ބޭނުމަށް ދޫކޮށްފައިވާ ދެ ރަށް ވީހާވެސް އަވަހަކަށް އޮޕަރޭޝަނަށް ގެންނަން ބޭނުންވާކަން.

ނަލަންދޫ ހިމެނޭ ގޮތުން ޓޫރިޒަމަށް ފަޅު ރަށްތައް ވީހާވެސް އަވަހަކަށް ދޫކޮށްދިނުން.

ފުނަދޫ އެއާޕޯޓުގައި ރޭގަނޑު ފްލައިޓް ޖެއްސޭ ގޮތް ހަމަޖައްސައިދިނުން.

ކޮމަންޑޫގައި އެއާޕޯޓެއް އެޅުން. އަތޮޅު ކައުންސިލްގެ ރައީސް ސިޔާމް ވިދާޅުވީ، ކޮމަންޑޫގައި އެއާޕޯޓެއް އަޅަން ބޭނުންވާކަން ރައީސްއާ ހިއްސާކުރެއްވީ އެ ކަހަލަ އިޝާރާތެއް ކުރިން ދެއްވާފައި އޮތުމުން ކަމަށެވެ. ސަރުކާރުގެ ސިޔާސަތަކީ ކޮންމެ 30 މިނެޓަކުން ދެވޭ ހިސާބުގައި އެއާޕޯޓެއް އޮތުން ކަމަށް ވާއިރު, ކޮމަންޑޫގެ ރައްޔިތުންގެ ކަންބޮޑުވުންތަކެއް ރ. އަލިފުށީގައި އެއާޕޯޓް އެޅުމާ ގުޅޭ ގޮތުން ހުރި ކަމަށް ވިދާޅުވި އެވެ.

މި ކަންބޮޑުވުމަށް ވިސްނަވައި ރަނގަޅު ހައްލެއް ހޯއްދަވައިދެއްވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި ކަމަށް އަތޮޅު ކައުންސިލުން ބުންޏެވެ.

ސަރުކާރުން ށ. އަތޮޅު ބިލެތްފަހީގައި އަޅަން ނިންމާފައިވާ އެއާޕޯޓު ބަޔަކާ ހަވާލުކުރުމުގެ މަސައްކަތް ކުރިއަށް ދާކަން ރައީސް ފާހަގަކުރެއްވި އެވެ.

ފުނަދޫ އެއާޕޯޓުގައި ލައިޓް ނެތުމުގެ ސަބަބުން ރޭގަނޑު ދަތުރުތައް ނުކުރެވޭ މައްސަލަ ހައްލުކޮށްދެއްވާނެ ކަމަށް ވިދާޅުވި އެވެ. މިނީ ހޮސްޕިޓަލެއް ގާއިމުކުރަން މިހާރު ނިންމާފައި ވަނީ ށ. މިލަންދޫގައި ކަމަށް ރައީސް ވިދާޅުވި އެވެ. ސިޔާމް ވިދާޅުވި ގޮތުގައި ށ. އަތޮޅަށް ހުށަހެޅި ކަންކަމުގައި ސަރުކާރަށް ހައްލުކޮށްދެވެން ހުރި ކަންކަން ކައުންސިލާ ގުޅިގެން ކުރައްވާނެ ކަމުގެ ޔަގީންކަން ވެސް ރައީސް ދެއްވި އެވެ. "އަތޮޅު ކައުންސިލުން އިސްކަންދޭ ތަރުތީބެއް ހައްދަވައި ފޮނުވީމާ އެކަންކަން ކުރިއަށް ގެންގޮސްދެއްވާނެ ކަމަށް ވިދާޅުވި," ސިޔާމް ވިދާޅުވި އެވެ.

ފުނަދޫ ތަރައްގީގެ މަރުކަޒަކަށް

ސަރުކާރުން މިހާރު ވެސް 88 މަޝްރޫއު ހިންގާ އަތޮޅު ކައުންސިލްގެ މެމްބަރުންނަށް ފަހު، ފުނަދޫ ކައުންސިލާ ރައީސް ބައްދަލުކުރެއްވި އެވެ.

އެ ކައުންސިލުން ހުށަހެޅި ކަންކަމުގެ ތެރޭގައި ގިރާ ސަރަހައްދު ހިމާޔަތްކޮށްދިނުމާއި ކައުންސިލްގެ އިހުތިސާސްތެރޭގައި ފަރުކޮޅު ހިމަނައިދިނުމާއި އެއާޕޯޓަށް ދާ މަގުގައި ތާރު އެޅުމާއި ހޮސްޕިޓަލުގެ ޖާގައިގެ ދަތިކަން ހައްލުކޮށްދިނުން ހިމެނެ އެވެ.

އެ ރަށަށް ސަރުކާރުގެ ވިސްނުމަކީ, ރައީސް އިބްރާހިމް މުހައްމަދު ސޯލިހު ވިދާޅުވި ގޮތުގައި, ތަރައްގީގެ މަރުކަޒެއްގެ ގޮތުގައި ހިދުމަތްތައް ފުޅާކުރުމެވެ. އެއާޕޯޓައި ބަނދަރާއި ހޮސްޕިޓަލާއި ސްކޫލް ފަދަ ތަންތަނުގެ ހިދުމަތް ފުޅާވާނެ ކަމުގެ ޔަގީންކަން ދެއްވި އެވެ.

ކޮވިޑާ އެކު މަޝްރޫއުތައް މަޑުޖެހިފައި އޮތަސް އިގްތިސާދީ ހާލަތު ރަނގަޅުވާތީ އަލުން މަޝްރޫއުތައް ފަށައިގަނެވޭނެ ކަމަށް ވިދާޅުވި އެވެ.

ޅައިމަގާއި ފޯކައިދޫގެ ހުށަހެޅުންތަކަށް ހައްލު

ޅައިމަގު ކައުންސިލުން ރައީސް އިބްރާހިމް މުހައްމަދު ސޯލިހަށް ހުށަހެޅީ, ހެލްތު ސެންޓަރުގެ ޖާގައިގެ ދަތިކަން ހައްލުކުރުމަށާއި ޕޮލިސް ޑެސްކެއް ގާއިމުކުރުމުގެ އިތުރުން ހަދަމުން އަންނަ ބަނދަރުގެ ޖާގަ ބޮޑުކޮށްދީ، ގިރާ ސަަރަހައްދު ހިމާޔަތް ކޮށްދިނުމަށެވެ. ފޯކައިދޫން ވެސް ހެލްތު ސެންޓަރުގެ ޖާގައިގެ ދަތިކަން ހައްލުކޮށްދޭން ހުށަހެޅި އެވެ. ގޯތި ދޫކުރަން ބިން ނެތުމުގެ މައްސަލަ އާއި ގާމަތި ރަށަކަށް ވާތީ އެ ރަށުގައި އާޓިފިޝަލް ބީޗެއް ތަަރައްގީކޮށްދޭން ވެސް ކައުންސިލުން އެދުނެވެ.

އެ ކަންކަން ކަމާގުޅޭ އިދާރާތަކާ އެކު ހައްލު ހޯއްދަވައިދެއްވަން މަސައްކަތް ކުރައްވާނެ ކަމަށް ރައީސް ވިދާޅުވި އެވެ. އެއާއެކު ލާމަރުކަޒީ ގޮތުން ރާއްޖެ ތަރައްގީ ކުރަން ކައުންސިލްތަކުގެ އެއްބާރުލުމަށް އެ މަނިކުފާނު އެދިވަޑައިގަތެވެ.

ލާމަރުކަޒީ ގާނޫނަށް ގެނައި އިސްލާހާ އެކު ބާރުތައް ދޫކޮށްލީ ރަށާއި އަތޮޅުގެ ތަރައްގީ އަށް ސަރުކާރުން ކޮށްދޭން ބޭނުންވާ ކަންކަން ރައްޔިތުންނާ އެކު ކުރަން ކަމަށް ވިދާޅުވި އެވެ.