ވަކީލުން ވިދާޅުވީ ޔާމީން އިންކާރު ކުރެއްވި ކަމަށް، ކޮމިޝަނުން ބުނަނީ ނިންމެވީ ހަނު ހުންނަވަން ކަމަށް

ކުރީގެ ރައީސް އަބްދުﷲ ޔާމީންގެ ވެރިކަމުގެ ދުވަސްވަރު، މިނިވަން ނޫހުގެ ކުރީގެ ނޫސްވެރިޔާ އަހުމަދު ރިލްވާން ވަގަށް ނެގި މައްސަލައިގެ ތަހުގީގަށް އެ މަނިކުފާނު އޭރު ހުރަސްއެޅި ކަމުގެ ތުހުމަތުތަކާ ގުޅިގެން ރިޔާސީ ކޮމިޝަނަށް މިއަދު ހާޒިރުކޮށް، ސުވާލު ކުރުމުން އެ ތުހުމަތުތަކަށް ޔާމީން އިންކާރު ކުރެއްވި ކަމަށް ޔާމީންގެ ވަކީލް ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.

ނަމަވެސް ކޮމިޝަންގެ މެމްބަރު މިސްބާހް އަބްދުﷲ މީޑިއާގައި ވިދާޅުވީ، އެ ކޮމިޝަނަށް ޔާމީން ހާޒިރުކުރުމުން އިހުތިޔާރު ކުރެއްވީ ހަނު ހުރުމުގެ ހައްގު ކަމަށެވެ. އެހެންވެ، ދައުލަތުގެ އެހާ އިސް މަގާމެއް ފުރުއްވާފައިވާ ބޭފުޅެއްގެ އެ ނިންމެވުމާ މެދު ކޮމިޝަނުން ކަންބޮޑުވާ ކަމަށް މިސްބާހް "މިހާރު" އަށް ވިދާޅުވި އެވެ.

ޔާމީންގެ ވަކީލުންގެ ޓީމު ލީޑް ކުރައްވާ، ކުރީގެ ނައިބު ރައީސް ޑރ. ޖަމީލު ވިދާޅުވީ، ޔާމީން އެ ކޮމިޝަނަށް ހާޒިރުވުމުން އެންމެ ފުރަތަމަ ވެސް ކޮމިޝަނުން ކުރި ކަމަކީ ގާނޫނުން ކަށަވަރު ކޮށްދީފައިވާ ވަކީލުންގެ ހައްގު ނިގުޅައިގަތުން ކަމަށެވެ. އެގޮތުން، ރިޔާސީ ކޮމިޝަނުން ބޭނުންވާ ދެ ވަކީލަކާއެކު ނޫނީ ތަހުގީގު ކުރިއަށް ނުގެންދެވޭނެ ކަމަށް އެންގި ކަމަށާއި ފަހުން އެ އަދަދު މަދުކުރި ކަމަށް ޑރ. ޖަމީލް ވިދާޅުވި އެވެ.

އެހެންވެ، ޔާމީންގެ ތަހުގީގު ގެންދިޔައީ އެންމެ ވަކީލަކާއެކު ކަމަށް ޑރ. ޖަމީލު ވިދާޅުވެ އެވެ. އެކަންކަމާ ގުޅިގެން މިއީ، ޒާތީ ތައައްސުބުގެ ތެރެއިން، ވަކި ގޮތަކަށް ތަހުގީގު ލަންބައިލުމަށް މަރު ކޮމިޝަނުން އަމާޒު ހިފާފައިވާކަން އެނގޭ ކަމަށް އެ މަނިކުފާނު ވިދާޅުވި އެވެ. އެކަމަކު، މައްސަލަތަކުގެ އަސްލު ތުހުމަތުކުރެވޭ މީހުންނަށް ތަހުގީގު ކުރާ ތަނެއް އަދި ދައުވާކުރާ ތަނެއް ވެސް ނުފެންނަކަން ޑރ. ޖަމީލު ފާހަގަކުރެއްވި އެވެ.

ޔާމީންގެ ވެރިކަމުގައި ރިލްވާން ގެއްލުމުން، އެ މައްސަލައިގައި މީގެ ކުރިން ވެސް ޔާމީނަށް ތުހުމަތުތަކެއް ކުރި އެވެ. އެކަމަށް ލިބުނު ބާރަކީ އޭރުގެ ހޯމް މިނިސްޓަރު އުމަރު ނަސީރަށް ޔާމީން ކުރެއްވި ކަމަށް ބުނާ މެސެޖެވެ. އޮގަސްޓް 22، 2014 ގައި ފޮނުއްވި މެސެޖުގައި ޔާމީން ވިދާޅުވެފައި ވަނީ ރިލްވާންގެ މައްސަލައިގައި އެހާ ބޮޑަށް އުޅޭނެ ކަމަށް ނެތް ކަމަށެވެ. ނަމަވެސް އުމަރު ވަނީ ރިލްވާންގެ ތަހުގީގަށް ޔާމީން ހުރަސްއެޅިކަން ދޮގުކުރައްވައިފަ އެވެ.

ޑރ. ޖަމީލު ވިދާޅުވިގޮތުގައި، އެ ތަހުގީގަށް ޔާމީން ހުރަސް އެޅި ކަމަށް ތުހުމަތު ކުރިޔަސް، އެކަން ކުރައްވާފައި ވަނީ ކިހިނެއް، ކޮން ގޮތަކުން ކަމެއް ކޮމިޝަނަށް ކިޔައެއް ނުދެވުނެވެ. އެ ތުހުމަތުތަކަށް ވެސް ޔާމީން އިންކާރު ކުރައްވާފައިވާ ކަމަށާއި ރިޔާސީ ކޮމިޝަނަށް ހާޒިރުކުރީ އެއްވެސް ހެއްކެއް ނެތި ކަމަށް ޑރ. ޖަމީލް ވިދާޅުވި އެވެ.

"..އެ ބޭފުޅުންނަކަށް ނުބުނެ ދެވުނު ރައީސް ޔާމީނާ މި މައްސަލައާ ގުޅުން ހުރި ގޮތެއް. ރައީސް ޔާމީން ގެންދަވާތަން މި ފެންނަނީ. އަސްލު ކުށްވެރިން ގެންދާތަނެއް ނުފެނޭ. މިއީ ސިޔާސީ ވާދަވެރިކަމުގެ ތެރެއިން، ޔާމީން ވެރިކަމަށް ވަޑައިގަތުމަކީ އެ ބޭފުޅުންނަށް ނުރައްކަލެއް އޮތް ކަމަށް ފެނިގެން ގެންދާ ކަމެއް،" ޑރ. ޖަމީލު ވިދާޅުވި އެވެ.

ވަކީލު އާސިފު ވިދާޅުވީ، ކޮމިޝަނަށް ޔާމީން ހާޒިރުކުރީ ރިލްވާން ވަގަށް ނެގިތާ އަންނަ އާދިއްތަ ދުވަހު ހަތް އަހަރުވާން އުޅޭތީ މީޑިއާގައި އެ ވާހަކަ ދައްކައި އެކަން އެހެން ބައެއްގެ ބޮލުގައި އެޅުވުމަށް ކަމަށެވެ. އެ ތަހުގީގު ހިންގުމުގައި މިއަދު އިސްކޮށް އުޅުއްވީ މަރު ކޮމިޝަންގެ މެމްބަރު މިސްބާހު އައްބާހެވެ. އެކަމަކު، އޭނައާ ހަވާލައިދީ ނޫހެއްގައި ރޭ ލިޔުނު ޚަބަރަކާ ގުޅިގެން މިސްބާހު ނިންމެވީ އެ ތަހުގީގުން އެއްފަރާތް ވުމަށެވެ.

އެކަމުން ވެސް ތަހުގީގަށް ނުފޫޒު ފޯރުވާފައިވާ މިންވަރު އެނގިގެންދިޔަ ކަމަށް އާސިފް ވިދާޅުވި އެވެ.