ކަލްޓް ވިސްނުމާ ދުރަށް ދާން ނާޒިމް އިސްވެ އުފައްދާ ޕާޓީގެ ލީޑަރަށް ހުރެވޭނީ ގިނަވެގެން ދެ ދައުރު

ކުރީގެ ޑިފެންސް މިނިސްޓަރު މުހައްމަދު ނާޒިމް އިސްވެ އުފައްދަން މަސައްކަތް ކުރައްވާ ސިޔާސީ ޕާޓީގެ ލީޑަރަކަށް އެ މަގާމުގައި ހުންނެވޭނީ ވަކި މުއްދަތަކަށް ކަމަށް ކަނޑައަޅަން ނިންމާފައިވާ ކަމަށް އެކަމުގައި އިސްކޮށް ހަރަކާތްތެރިވާ އޮފިޝަލަކު މިއަދު ވިދާޅުވެއްޖެ އެވެ.

ދަނގެތި ދާއިރާގެ މެމްބަރުކަން ވެސް ކުރައްވާ ނާޒިމް އިސްވެ އުފައްދަން މަސައްކަތް ކުރައްވާ ޕާޓީގެ އިސް އޮފިޝަލަކު ވިދާޅުވީ، އެ ބޭފުޅުން ބޭނުންވަނީ އެއްވެސް މީހަކަށް ޕާޓީ އަށް ނުފޫޒު ނުފޯރުވޭ ގޮތަށް ހަދަން ކަމަށެވެ.

"އެހެންވެ އަޅުގަނޑުމެން ވާހަކަ ދައްކަމުން މިދަނީ 4-5 އަހަރުގެ ދެ ޓާމަކަށޭ ލީޑަރަކަށް މަގާމުގައި ދެމިހުންނެވޭނީ. ހަތަރު އަހަރުތޯ ފަސް އަހަރުތޯ އަދި ކަނޑައެއް ނާޅަން. އެކަމަކު ލީޑަރަށް މަގާމުގައި ދެމިހުންނެވޭނީ ޔަގީނުން ވެސް ވަކި މުއްދަތަކަށް. މުޅި އުމުރަކަށް ލީޑަރުކަމުގައި ހުންނެވުމުގެ ފުރުސަތެއް އެއްވެސް ބޭފުޅަކަށް މި ޕާޓީގައި ނޯންނާނެ،" އޮފިޝަލް ވިދާޅުވި އެވެ.

އޭނާ ވިދާޅުވި ގޮތުގައި އެގޮތަށް ނިންމުމުގެ މައިގަނޑު މަގްސަދަކީ ރާއްޖޭގެ ގިނަ ސިޔާސީ ޕާޓީތަކުގައި މިހާރު ގެންގުޅޭ "ކަލްޓް" އުސޫލު ނުވަތަ އަބަދުވެސް އެއް ލީޑަރެއްގެ ފަހަތުން ޕާޓީ އާއި މެމްބަރުން "ދުވުމުގެ" ވިސްނުން ކަނޑުވައިލުމެވެ.

"ކަލްޓެއްގެ ގޮތުގައި ޕާޓީތައް މަސައްކަތްކުރާ ކުރުން އަޅުގަނޑުމެންގެ ޕާޓީން ގަބޫލެއް ނުކުރާނެ،" އޮފިޝަލް ވިދާޅުވި އެވެ.

ނާޒިމް އިސްވެ އުފައްދަން މަސައްކަތް ކުރައްވާ ސިޔާސީ ޕާޓީގެ މަސައްކަތުގައި އޭނާގެ އިތުރުން ދެން އިސްކޮށް އުޅުއްވަނީ ކުރީގެ ޕޮލިސް ކޮމިޝަނަރު އަދި ތިމަރަފުށި ދާއިރާގެ މެމްބަރު އަބްދުﷲ ރިޔާޒެވެ.

އެ ދެ ބޭފުޅުން ވެސް އެންމެ ފަހުން ތިއްބެވީ ޖުމްހޫރީ ޕާޓީގައި ކަމަށް ވާއިރު، މިހާރު ވަނީ އެ ޕާޓީން ވަކިވެވަޑައިގެންފަ އެވެ.

ނާޒިމް އުފައްދަވަން މަސައްކަތް ކުރައްވާ ޕާޓީ އަށް މިހާރު ވެސް 3،000 މެމްބަރުން ހަމަކޮށްފައިވާ ކަމަށް ވެ އެވެ. އެހެންވެ، ޕާޓީގެ ނަމާއި އިދާރީ ބައެއް ކަންކަން ނިންމައި ޕާޓީ ރަޖިސްޓަރީ ކުރަން އިލެކްޝަންސް ކޮމިޝަނަށް ވަރަށް އަވަހަށް ހުށަހަޅަން ވަނީ ނިންމައިފަ އެވެ.

ނާޒިމްގެ އިތުރުން ކުރީގެ ރައީސް މައުމޫން އަބްދުލްގައްޔޫމްގެ ސަރުކާރުގައި ވަޒީރުކަން ކުރެއްވި އަބްދުﷲ ކަމާލުއްދީން ވެސް ވަނީ ސިޔާސީ ޕާޓީއެއް އުފެއްދުމުގެ މަސައްކަތް ފައްޓަވައިފަ އެވެ. އެ ޕާޓީގެ ނަމީ "ގައުމީ އެއްބައިވަންތަކަމުގެ ޕާޓީ" އެވެ.

ރާއްޖޭގައި މިހާރު 10 ސިޔާސީ ޕާޓީ ރަޖިސްޓަރީ ކޮށްފައިވާއިރު، އެންމެ ފަހުން ވުޖޫދަށް ގެނައީ ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމް އެވެ. އެ ޕާޓީ ރަޖިސްޓަރީ ކުރީ ނޮވެމްބަރު 20، 2019 ގަ އެވެ.