ފިލައި ތިބެ، ސިއްރުން ޕާޓީއެއް ނުހަދާނަން: ރިޔާޒް

ކުރީގެ ޕޮލިސް ކޮމިޝަނަރު އަދި ތިމަރަފުށީ ދާއިރާގެ މެމްބަރު އަބްދުﷲ ރިޔާޒާއި ކުރީގެ ޑިފެންސް މިނިސްޓަރު އަދި ދަގަނެތީ ދާއިރާގެ މެމްބަރު މުހައްމަދު ނާޒިމް ސިޔާސީ ޕާޓީއެއް ހެއްދެވުމުގެ މަޝްވަރާތަކާ އެކު މަސައްކަތް ކުރެއްވި ކަމުގެ ތުހުމަތު ދެ ބޭފުޅުން ވެސް މިއަދު ދޮގުކުރައްވައިފި އެވެ

ސިޔާސީ ޕާޓީއެއް ހަދަން ކުރެއްވި މަސައްކަތް ތާއިދު ނުލިބިގެން ފޭލްވެއްޖެ ކަމަށް ރިޕޯޓްކުރި ވާހަކައިގައި ހަގީގަތެއް ނެތް ކަމަށް، ސިޔާސީ މަސައްކަތް އަބަދުވެސް އެކުގައި ކުރައްވާ ދެ ބޭފުޅުން ވިދާޅުވި އެވެ.

ރިޔާޒް "މިހާރު" އަށް ވިދާޅުވީ ސިޔާސީ ޕާޓީއެއް ހެދުމުގެ އެއްވެސް މަޝްވަރާއެއް ނުކުރައްވާ ކަމަށެވެ. ޕާޓީއެއް ހަދާ ނަމަ، އެކަން ކުރާނީ ރައްޔިތުންގެ ގާތަށް ގޮސް ތާއީދާ އެކުގައި ކަމަށް ވިދާޅުވި އެވެ. ސިޔާސީ މަސައްކަތްތައް އޭނާ ކުރިން ވެސް އަދި މިހާރު ވެސް ކުރައްވާ ގޮތަކީ އެއީ ކަމަށް ވިދާޅުވި އެވެ.

"ސިޔާސީ މަސައްކަތްތަކަކީ ފިލައިގެން ތިބެ ކުރެވޭނެ ކަމެއް ނޫން. މީގެ ކުރިން ވެސް އަޅުގަނޑު މަސައްކަތްކޮށްފައި ވާނީ ރައްޔިތުންގެ ތާއީދާ އެކުގައި،" ރިޔާޒް ވިދާޅުވި އެވެ.

އޭނާ ވިދާޅުވި ގޮތުގައި ރައްޔިތުންގެ މަޖިލީހުގައި ދެ ވަނަ ދައުރެއް ފުރުއްވާ އިރު، ދެ އިންތިޚާބު ވެސް ކާމިޔާބު ކުރައްވައި ޚިދުމަތުގައި ދެމިހުންނެވީ ރައްޔިތުންގެ ބޮޑު ތާއީދަކާ އެކުގަ އެވެ.

ނާޒިމް ވެސް ވިދާޅުވީ އިންތިޚާބީ މަގާމެއް އޭނާ ފުރުއްވަމުން ގެންދަވަނީ ރައްޔިތުންގެ ތާއީދާ އެކުގައި ކަމަށާއި ޕާޓީއެއް އުފައްދަން އުޅުނު ކަމަށް ދައްކާ ވާހަކައިގައި ހަގީގަތެއް ނެތް ކަމަށެވެ. ސިޔާސީ ޕާޓީއެއް އުފައްދަން ގަސްތުކޮށްފި ނަމަ އެ ކަމަށް ވެސް ރައްޔިތުން ތާއީދުކުރާނެ ކަމަށް ވިދާޅުވި އެވެ.

ނާޒިމް ވެސް ވިދާޅުވީ އޭނާ މަގާމުގައި މިހާރު ހުންނެވީ ރައްޔިތުންގެ ތާއީދާ އެކުގައި ކަމަށެވެ. ސިޔާސީ ޕާޓީއެއް އުފައްދަން ގަސްތުކޮށްފި ނަމަ އެކަމަށް ވެސް ރައްޔިތުން ތާއީދުކުރާނެ ކަމަށް ވިދާޅުވި އެވެ.

ސިޔާސީ ޕާޓީއެއްގެ މަސައްކަތް ކުރެއްވި ވާހަކަ ދެ ބޭފުޅުން ދޮގު ކުރެއްވި ނަމަވެސް ޖުމްހޫރީ ޕާޓީގެ މަސައްކަތްތަކާ ދެ ބޭފުޅުން ވެސް ފެއަށް ޖެހިވަޑައިގެން، ޕާޓީގެ އެއްވެސް ހަރަކާތެއްގައި ބައިވެރިވެވަޑައިނުގަންނަވާތާ ދުވަސްތަކެއް ވެއްޖެ އެވެ. ދެ ބޭފުޅުންނަކީ ވެސް ސިޔާސީ މަސައްކަތްތަކުގައި ކުރިން ޖުމްހޫރީ ޕާޓީގެ ލީޑަރު ގާސިމް އިބްރާހީމާ ގާތް ދެ ބޭފުޅުންނެވެ. ޖޭޕީގެ ނައިބު ރައީސްކަމާއި ޕާލަމެންޓްރީ ގްރޫޕްގެ ލީޑަރަކަށް ރިޔާޒް ހުންނެވި އިރު ގާސިމްގެ އެޑްވައިޒަރެއްގެ ގޮތުގައި ނާޒިމް އުޅުއްވި އެވެ.

ރިޔާޒް ވިދާޅުވީ ޖުމްހޫރީ ޕާޓީއާ ދުރުގައި ހުންނެވީ ސިޔާސީ ގޮތުން އެ ޕާޓީގެ މިސްރާބާ ދޭތެރޭގައި ހިތްހަމަނުޖެހުންތަކެއް ހުރުމުން ކަަމަށެވެ. އޭނާ ދުރަށް ވަޑައިގަތީ، ކުރީގެ ސަރުކާރާއި ޕީޕީއެމްގެ ލީޑަޝިޕްގައި އިސްކޮށް ތިއްބެވި، ގާސިމަށް ވެސް ވަރަށް ބޮޑަށް ފާޑުވިދާޅުވި ބޭފުޅުންތަކެއް ޖޭޕީއާ ގުޅިވަޑައިގަތުމުންނެވެ. ގާނޫނާ ޚިލާފަށް ސަރުކާރަކުން ކަންކަން ކުރިއިރު ވާގިވެރިންގެ ގޮތުގައި ތިބި ކަމަށް އެ ބޭފުޅުން ތުހުމަތު ކުރެއްވި ބަޔަކު ޖޭޕީގެ ހިންގުމުގެ ތެރެއަށް ވަން ހިސާބުން ނާޒިމް ވެސް ޕާޓީއާ ދުރަށް ވަޑައިގަތީ އެވެ.