ޕްރޮޖެކްޓްތަކުން ޓެކްސް މާފުކޮށްދިނުމުގެ ބާރު ރައީސަށް ދޭ ބިލު މަޖިލީހުން ފާސްކޮށްފި

ރާއްޖޭގައި ބޮޑެތި ޕްރޮޖެކްޓްތައް ހިންގާ ކުންފުނިތަކުން ހިންގާ މަޝްރޫއުތަކުގެ ޓެކްސް މާފުކޮށްދިނުމުގެ ބާރު ރައީސުލްޖުމްހޫރިއްޔާ އަށް ލިބޭ ގޮތަށް އިންކަމް ޓެކްސްގެ ގާނޫނަށް ބަދަލު ގެންނަން މިއަދު ރައްޔިތުންގެ މަޖިލީހުން ފާސްކޮށްފި އެވެ.

މިދިޔަަ އޭޕްރީލް މަހު މަޖިލީހަށް ހުށަހެޅި އާމްދަނީން ޓެކްސް ނެގުމުގެ ގާނޫނަށް ގެނައި އިސްލާހުގައި ވަރަށް ގިނަ ކަންތައްތަކެއް ބަދަލު ކުރަން ނިންމާފައިވެ އެވެ. އެގޮތުން ބޭރުގެ ކޮންޓްރެކްޓަރުން ކޮންމެ މަހަކު ދައްކަން ޖެހޭ ވިތުހޯލްޑިން ޓެކްސް 10 ޕަސެންޓުން ފަސް ޕަސެންޓަށް ކުޑަކޮށްފައިވެ އެވެ.

ސަރުކާރުގެ ފަރާތުން ގައްދޫ ދާއިރާގެ މެމްބަރު އަހުމަދު ޒާހިރު ހުށަހެޅުއްވި މި ބިލްގައި ހިމަނާފައިވާ އިތުރު ކަންކަމުގެ ތެރޭގައި ގާނޫނާ ހިލާފަށް ނުވަތަ ހުއްދަ ނޫން ގޮތަކަށް ލިބޭ މުދަލާއި ފައިސާ އިން ވެސް ޓެކްސް ނެގޭނެ އެވެ. އަދި ލިބިފައިވާގޮތް ނުވަތަ ހޯދި ގޮތް ސާބިތުކޮށްނުދެވޭ ފައިސާ އާއި އިންވެސްޓް ކުރަން ނުވަތަ ހަރަދު ކުރަން ފައިސާ ލިބުނުގޮތް ސާބިތު ކޮށްނުދެވޭ އިންވެސްޓްމެންޓްތަކާއި އެންމެހާ މުދަލުން ވެސް ޓެކްސް ދައްކަން ޖެހޭނެ އެވެ.

އާމްދަނީން ޓެކްސް ނެގުމުގެ ގާނޫނަށް ބަދަލުގެންނަން ސަރުކާރުން ހުށަހެޅި އިސްލާހުތަކަށް މަޖިލީހުގެ އިގްތިސާދީ ކޮމިޓީން އިތުރު ބަދަލުތަކެއް ވެސް ގެނެސްފައިވެ އެވެ އޭގެ ތެރޭގައި އެ ގާނޫނުން އިސްތިސްނާ ވާނެ އާމްދަނީތަކުގެ ތެރެއަށް، މަޖިލީހުގެ މެމްބަރުންނަށް މަޖިލީހުން ލިބޭ އާމްދަނީ އިތުރުކުރުން ހިމެނެ އެވެ.

ބިލުގައި ސަރުކާރުން ހުށަހަޅާފައި އޮތީ ރައީސާއި ނައިބު ރައީސަށް މުސާރަ އާއި އިނާތްތަކުގެ ގޮތުގައި ލިބޭ އާމްދަނީ އިސްތިސްނާކުރުމަށެވެ. އެއާއެކު، އިގްތިސާދީ ކޮމިޓީން ނިންމީ ރައްޔިތުންގެ މަޖިލީހުގެ އިމްތިޔާޒްތަކާއި ބާރުތަކުގެ ގާނޫނުގެ ދަށުން މެމްބަރުންނަށް ލިބޭ އާމްދަނީ ވެސް އެ އިސްތިސްނާގައި ހިމެނުމަށެވެ.