"ލަމްސް ކިޗަން" ގެ ފަހު ޝޯ މީޑިއާ ނެޓް މަލްޓިސްކްރީނަށް

ކެއްކުމުގެ ޝޯ "ލަމްސް ކިޗަން"ގެ މި ސީޒަންގެ އެންމެ ފަހު އެޕިސޯޑް މީޑިއާ ނެޓްގެ މަލްޓި-ސްކްރީނުގައި މިއަދު ރިލީޒް ކުރަން ނިންމައިފި އެވެ.

މި ޝޯގެ 12 ވަނަ އެޕިސޯޑް މަލްޓި-ސްކްރީނުންނާއި އެމްއެސްޓީވީން ވެސް މިއަދުން ފެށިގެން ފެންނައިރު، ރާއްޖޭގެ މަޝްހޫރު ފަންނާނުންގެ މެދުގައި ކެއްކުމުގެ ޗެލެންޖުތަކެއް ޝޯ ގައި ދައްކުވައިދޭނެ ކަމަށް މީޑިއާ ނެޓުން ބުންޏެވެ.

މިހާތަނަށް ދެއްކި މި ޝޯތަކުގައި، މުނިފޫހިފިލުވުމުގެ ދާއިރާގެ ފަންނާނުން ކަމަށްވާ އަބްދުﷲ މުއާޒާއި ރަވީ ފާރޫގައި މީރާ މުހައްމަދާއި މަރިޔަމް އައްޒަ އާއި މަރިޔަމް މައިޝާ ފެނިފައިވެ އެވެ. އެންމެ ފަހު އެޕިސޯޑުގައި ފެންނާނީ އަޒޭ އާއި ރިޝްފާގެ ދެމެދުގައި ކުރިއަށް ގެންދާ ކެއްކުމުގެ ވާދަވެރި ކަމެވެ.

މީޑިއާ ނެޓްގެ މަލްޓި-ސްކްރީނަކީ މުނިފޫހިފިލުވުމަށް ހާއްސަ ޕްލެޓްފޯމެކެވެ. މި ޕްލެޓްފޯމް މެދުވެރިކޮށް، ދިވެހި ތަފާތު ސީރީޒްތަކާއި ޝޯތައް ބަލައިލެވޭނެ އެވެ. މަލްޓިސްކްރީނުން، ލައިވް ޓީވީގެ އިތުރުން ވީޑިއޯ އޮން ޑިމާންޑް މެދުވެރިކޮށް ފިލްމާއި ސީރީޒް ވެސް ބަލައިލެވޭނެ އެވެ.

މީޑިއާ ނެޓުން އެމްއެސްޓީވީގެ އެޕްލިކޭޝަނެއް ވެސް ތައާރަފްކޮށްފައިވާއިރު، އެ އެޕްލިކޭޝަން ފްލޭ ސްޓޯރުން އެންޑްރޮއިޑް ޔޫއެޗްޑީ ޓީވީ އަށް ޑައުންލޯޑު ކުރެވޭނެ އެވެ. މީޑިއާ ނެޓްގެ އެމްއެސްޓީވީ އެޕްލިކޭޝަން ބޭނުންކޮށްގެން ޓީވީން ވެސް މީޑިއާ ނެޓްގެ ޝޯތަކާއި ޑްރާމާތައް ބެލޭނެ އެވެ.