ހިތަދޫ ފިޔަވައި އައްޑޫގެ އެހެން އަވަށްތަކުގެ ކާފިއު އުވާލައިފި

އައްޑޫ ހިތަދޫ ފިޔަވައި އެހެން ހުރިހާ އަވަށްތަކެއްގެ ކާފިއު މިއަދު އުވާލައިފި އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ހިތަދޫ ފިޔަވައި އައްޑޫގެ އެހެން ހުރިހާ އަވަށެއްގެ ކާފިއު މިއަދުން ފެށިގެން ނިމުމަކަށް ގެނެސްފައިވާ ކަމަށެވެ.

ކޮވިޑްގެ ކޭސްތައް އެޕްރީލް މަހުގެ ފަހުކޮޅުން ފެށިގެން އިތުރުވާން ފެށުމުން އައްޑޫ މޮނިޓަރިންގެ ހާލަތަށް ގެނެސް ކާފިއު ހިންގަމުން ދިޔައީ ހަވީރު 4:00 އިން ފަތިހު 4:00 އަށެވެ.

ނަމަވެސް އަދިވެސް ހިތަދޫގެ ކޭސްތައް އިތުރުވާތީ މި މަހުގެ 17 އިން ފެށިގެން އެ އަވަށުގެ ކާފިއު ވަގުތު އިތުރުކޮށްފައިވެ އެވެ. އެއީ ހެނދުނު 8:00 އިން ފަތިހު 4:00 އަށެވެ.

ހިތަދޫ ފިޔަވައި އެހެން ހުރިހާ އަވަށްތަކުގެ ކާފިއު މިއަދު އުވައިލި ނަމަވެސް މިދިޔަ މަހުގެ 1 އިން ފެށިގެން މުޅި އައްޑޫ އަދިވެސް އޮތީ މޮނިޓަރިންގެ ހާލަތުގަ އެވެ. އަދި ގިނަ ފިޔަވަޅުތަކެއް އަޅާފައިވެ އެވެ. އޭގެ ތެރޭގައި ޖަމާއަތުގައި ނަމާދުކުރުން މެދުކަނޑާލުމާއި އެއް އަވަށުން އަނެއް އަވަހަށް ހުއްދަ ހޯދައިގެން ނޫނީ ދަތުރުނުކުރުމާއި ކެފޭ/ރެސްޓޯރަންޓްތައް އާންމުކޮށް ހުޅުވައިގެން ހިދުމަތް ދިނުން ހުއްޓާލުން ހިމެނެ އެވެ.

އައްޑޫގެ މިހާރުގެ ކޮވިޑްގެ އެކްޓިވް ކޭސްތަކަށް ބަލާ އިރު ކޭސްތަކެއް އުޅެނީ ހިތަދު އާއި މަރަދޫގައި އެކަންޏެވެ. ހިތަދޫގައި 123 ކޭސް އުޅޭ އިރު މަރަދޫގައި އުޅެނީ ހަތަރު ކޭހެވެ. އެންމެ ފަހުން އައްޑޫން ޕޮޒިޓިވްވި މީހުންގެ އަދަދަކީ ހަތެކެވެ. އެހެންވެ ޖުމްލަ އެކްޓިވް ކޭސްތަކުގެ އަދަދަކީ މިހާރު 127 އެވެ.

އެޕްރީލް މަހުގެ ފަހުކޮޅު ކޮވިޑްގެ ކޭސްތައް އިތުރުވާން ފެށި ފަހުން ބުދަ ދުވަހާ ހަމައަށް އައްޑޫން ޕޮޒިޓިވް މީހުންގެ ޖުމްލަ އަދަދަކީ 446 އެވެ. އަދި ބަލިން ރަނގަޅުވި މީހުންގެ އަދަދަކީ 317 އެވެ.

މި ވަގުތު އެޑްމިޓްކޮށްގެން ފަރުވާދޭ މީހަކު ނެތް އިރު، ދެ މީހަކު މިދިޔަ މަހު ކޮވިޑްގައި އައްޑޫން މަރުވި އެވެ.