މާލެއިން ކޮވިޑަށް ޕޮޒިޓިވްވި އަދަދު ވަރަށް ބޮޑަށް ދަށަށް

ފާއިތުވި 24 ގަޑިއިރުގެ ތެރޭގައި މާލެއިން ކޮވިޑު-19 އަށް ޕޮޒިޓިވްވި މީހުންގެ އަދަދު ވަރަށް ބޮޑަށް ދަށްވެއްޖެ އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ އިއްޔެ ހަވީރު 6:00 އިން މިއަދު ހަވީރު 6:00 އާ ދޭތެރޭގައި 4،784 ސާމްޕަލް ޓެސްޓުކޮށްފައިވާ ކަމަށެވެ. އޭގެ ތެރެއިން މާލެއިން ޕޮޒިޓިވްވީ 35 މީހުންނެވެ. އެއީ، ބަލީގެ ހާލަތު އެންމެ ގޯސްކޮށް އުޅުނު މާލެ، ހުޅުމާލެ އަދި ވިލިމާލެއިން މި މަހު އެންމެ މަދުން ކޮވިޑަށް މީހުން ޕޮޒިޓިވްވި ދުވަހެވެ.

އެ ނަމްބަރުތަކަށް ބަލާއިރު ރަށްރަށުގެ ހާލަތު ފެންނަނީ ގޯސްކޮށެވެ. އެކި ރަށްރަށުން 164 މީހަކަށާއި ރިސޯޓުތަކުން ތިން މީހަކާއި ތަރައްގީކުރަމުން އަންނަ ރަށްރަށުން 43 އަދި ސިނާއީ މަސައްކަތްކުރާ ރަށްރަށުން އަށް މީހަކަށް ބަލި ޖެހިފައި ވެ އެވެ. އެއާއެކު، އަލަށް ކޮވިޑު ޖެހުނު މީހުންގެ އަދަދު އުޅެނީ 253 ގަ އެވެ.

އެ ބަލިން 769 މީހަކު ރަނގަޅުވެފައި ވެ އެވެ. އެހެންވެ، އެކްޓިވް ކޭސްތައް ވަނީ 4،784 އަށް ތިރިވެފަ އެވެ.

ހޮސްޕިޓަލުގައި އެޑްމިޓުކޮށްގެން ފަރުވާ ދޭ މީހުންގެ އަދަދު ވެސް 44 އަށް ވަނީ މަދުވެފަ އެވެ.