އިމިގްރޭޝަންގެ ހަތަރު މީހަކަށް ނޯޓިސް ދިން މައްސަލާގައި ޓްރައިބިއުނަލްގެ އަމުރެއް

އިމިގްރޭޝަންގެ ޔުނިފޯމް މިންގަނޑަށް ނުފެތޭ ކަމަށް ބުނެ ވަޒީފާއިން ވަކިކުރަން ނޯޓިސް ދީފައިވާ މީހުންގެ ތެރެއިން ހަތަރު މީހަކު ތިބި މަގާމަށް އެހެން ބަޔަކު އައްޔަން ކުރުން މަޑުޖައްސާލަން ވަޒީފާއާބެހޭ ޓްރައިބިއުނަލުން މިއަދު އަމުރުކޮށްފި އެވެ.

އިމިގްރޭޝަންގެ ޔުނިފޯމް މިންގަނޑާ އެއްގޮތަށް އަމަލުނުކުރާ މުވައްޒަފުންނަށް ނޯޓިސް ދެމުން ދަނިކޮށް ޓްރައިބިއުނަލުން މިއަދު އެގޮތަށް އެންގީ އޭގެ ތެރެއިން ހަތަރު މީހަކު އެ މައްސަލަ ޓްރައިބިއުނަލަށް ހުށަހެޅުމުންނެވެ.

ޓްރައިބިއުނަލްގެ ނިންމުމުގައިވަނީ އެ މައްސަލަ ނިމުމުގެ ކުރިން އެ ހަތަރު މީހުން ތިބި މަގާމަށް އަލުން އެހެން ބަޔަކު އައްޔަންކޮށްފި ނަމަ އެކަމުން އެ ހަތަރު މީހުންގެ ހައްގު ގެއްލިގެން ގޮސްދާނެ ކަމަށެވެ. އެހެންވެ މައްސަލަ ނިމެންދެން، އެ ހަތަރު މީހުން ތިބި މަގާމަށް ދާއިމީކޮށް ބަޔަކު އައްޔަން ނުކުރަން ވަނީ އަމުރުކޮށްފަ އެވެ.

އިމިގްރޭޝަންގެ ޔުނިފޯމް މިންގަނޑު ބުނާގޮތުން ތުނބުޅި އާއި މަތިމަސް ދެ ސެންޓިމީޓަރަށް ވުރެ ދިގުވެގެން ނުވާނެ އެވެ. އަދި ބޯ ވެސް އެކަށީގެންވާ މިންވަރަކަށް ތުނިކުރަން ޖެހޭއިރު ފަޓުލޫނުގެ ފައިކުރި ކުރު ކުރުމަކީ މަނާ ކަމެކެވެ. އެ މިންގަނޑަށް ފެތެން މުވައްޒަފުންނަށް މުއްދަތެއް ދިނުމަށް ފަހު އެއަށް އަމަލުނުކުރާ އެންމެންނަށް ވަނީ ވަޒީފާއިން ވަކިކުރާނެ ކަމުގެ ނޯޓިސް ދީފަ އެވެ.