ލުއީ ވިޓޯން އިން ހެދި 700 ޑޮލަރުގެ "ކަފިއްޔާ" އަށް ފާޑުކިޔަނީ

ފަލަސްތީނުގެ ކުރީގެ ރައީސް ޔާސިރު އަރަފާތުގެ ދައުރުގައި ވަރަށް ބޮޑު ސަމާލުކަމެއް ލިބުނު އަދި އެ ގައުމު ރަމްޒުކޮށްދޭ "ގައުމީ ސްކާފް" ގެ ގޮތުގައި މަޝްހޫރުވި ކަޅާއި ހުދުގެ ސްކާފް ޑިޒައިން ކޮޕީކޮށްގެން ފްރާންސްގެ ފެޝަން ކުންފުނި ލުއީ ވިޓޯން އިން ނެރުނު 700 ޑޮލަރުގެ އަގު ހުރި ސްކާފަކަށް ފާޑުކިޔުންތައް އަަމާޒުވެއްޖެ އެވެ.

ފިރިހެނުންނަށް ހާއްސަކޮށްގެން އެ ކުންފުނި ހުދާއި ނޫކުލައިގެ ޝޭޑަކާ އެކު ނެރުނު ސްކާފަށް ފާޑުކީ މީހުން އެ ސިފަކޮށްފައި ވަނީ ގައުމެއްގެ ރަމްޒެއް ކޮފީކޮށްގެން ކުރާ ވިޔަފާރީއެއްގެ ގޮތުގަ އެވެ. ލުއީ ވިޓޯނުން ނެރުނު "މޮނޮގްރާމް ކަފިއްޔާ ސްޓޯލް" އަގަކީ 705 ޑޮލަރު (10,892ރ.) އެވެ.

އެ ކުންފުނީފެ ވެބްސައިޓްގައި ބުނެފައިވާ ގޮތުގައި އެ ސްކާފަކީ "ކްލެސިކް ކަފިއްޔާ" އަސްލަކަށް ބަލައިގެން އުފައްދާފައިވާ ހާއްސަ އެއްޗެކެވެ. ލުއީ ވިޓޯންގެ ސްކާފް އުފައްދާފައި ވަނީ ވޫލް، ކަފަ އަދި ސިލްކް ފަދަ މެޓީރިއަލްތަކުންވެ.

"މިއީ އެ މީހެއްގެ މޫޑާ ގުޅޭ ގޮތަށް ސްޓައިލްކޮށްލެވިދާނެ ވަރަށް ލުއި އެއްޗެއް،" ލުއީ ވިޓޯނުން ބުންޏެވެ.

ފެޝަން ކުންފުނިތަކުން ނެރޭ އުފެއްދުންތަކަށް ފާރަވެރިވެ، ފާޑުކިޔާ ޑައިޓް ޕްރާޑާ އިންސްޓަގްރާމް އެކައުންޓްގައި ފަލަސްތީނުގެ ކަފިއްޔާއާ ބެހޭ ވަރަށް ގިނަ މައުލޫމާތު ހިމަނައި، ލުއީ ވިޓޯންގެ އުފެއްދުމަށް ފާޑުކިޔާފައި ވަނީ ކަފިއްޔާގެ ޑިޒައިން ކޮޕީކޮށް އެކަމަކު އޭގެ ރަސްމީ ކުލަ ނުހިމެނުންނެވެ.

"އެކަމަކު މި ކުންފުންޏަކީ ސިޔާސީ ގޮތުން ވަކި ކޮޅަކަށް ބުރަނުވާ ކަމަށް ބުނާ ކުންފުންޏެއް،" ޑައިޓް ޕްރާޑާ އިން ބުންޏެވެ.

ފަލަސްތީނުގެ ކަފިއްޔާ އަކީ އެގައުމު މިނިވަންކަމަށް ކުރާ މަސައްކަތަށް ތާއީދުކުރާކަން އަންގައި ދިނުމުގެ ގޮތުން އަރަބި ދުނިޔޭގައި އާންމުކޮށް ބޭނުންކޮށް އުޅޭ އެއްޗެކެވެ. އޭގެ ކުލަ އާއި ގޮޅި ކުހަރާހަފައި ހުންނަ ގޮތާއި އެ ފޮތިގަނޑު އަޅާފައި ހުންނަ ގޮތުން އަންގައިދޭނީ އެ މީހަކު އަރަބި ދުނިޔޭގައި ނިސްބަތްވާ ސަރަހައްދާއި ގަބީލާ އެވެ. ކަފިއްޔާގެ އަސްލު ގެއްލުވައިލަން ފެޝަންގެ ނަމުގައި އެކި ކެމްޕޭނުތައް ހިންގުމަކީ އަބަދުވެސް ކުރަމުން އަންނަ ކަމެކެވެ.