އެމްއެންޑީއެފްގެ ކާރަކުން ޖެހި ސައިކަލަކަށް ލިބުނު ގެއްލުމަށް ބަދަލު ދެނީ

އެމްއެންޑީއެފްގެ ވެހިކަލަކުން ޖެހި މީހެއްގެ ސައިކަލަކަށް ގެއްލުންވި މައްސަލައިގައި ބަދަލު ދޭން ހުކުމްކޮށްފި އެވެ.

އަމީނީ މަގުން ދުއްވާފައި ދިޔަ އެމްއެންޑީއެފްގެ ކާރަކުން ޖެހި މީހެއްގެ ސައިކަލަކަށް މިދިޔަ އަހަރުގެ ޑިސެމްބަރު މަހު ގެއްލުންވި މައްސަލައިގައި ދައުލަތުން ބޭނުންވީ ކޯޓު މެދުވެރިކޮށް، ބަދަލު ދޭށެވެ. އެ މައްސަލަ ފުލުހުން ވެސް ތަހުގީގުކުރި އެވެ.

ސައިކަލުގެ ވެރިފަރާތުން ސިވިލް ކޯޓުގައި ދައުވާ ކުރުމުން ދައުލަތުން ވަނީ ސައިކަލަށް ލިބުނު ގެއްލުމުގެ ބަދަލުގެ ގޮތުގައި 7،500ރ. ދޭން އެއްބަސްވެފަ އެވެ. އެގޮތަށް ދެ ފަރާތުން އެއްބަސްވުމުން އެއް މަސް ތެރޭގައި އެ ފައިސާ ދައްކަން ސިވިލް ކޯޓުން މިދިޔަ ހަފުތާގައި ވަނީ އަންގައިފަ އެވެ.

ގެއްލުމުގެ ބަދަލުގެ ގޮތުގައިި ދައުލަތުން ގިނަ އަދަދެއްގެ ފައިސާ އަމިއްލަ ފަރާތްތަކާއި ކުންފުނިތަކަށް ދޭންޖެހޭ މައްސަލާގައި ގިނަ ބައެއް ފާޑުކިޔުން ކުރިން އަމާޒުވި އެވެ. ނަމަވެސް ސަރުކާރުން ބުނެފައިވަނީ ގެއްލުމުގެ ބަދަލު ދެނީ ޝަރުއީ މަރުހަލާ އިން އެގޮތަށް ނިންމުމުން ކަމަށެވެ.