މަޓާޓޯ މޯލްޑިވްސް ޓްރެވަލް އެވޯޑްސް މިރޭ: ފުރިހަމަ އަށް ތައްޔާރުވެފައި

ރާއްޖޭގެ ޓޫރިޒަމް ސިނާއަތުގައި ދޭ އެންމެ ބޮޑު އަދި އެންމެ ޝަރަފްވެރި އެވޯޑް ކަމަށްވާ މޯލްޑިވްސް ޓްރެވަލް އެވޯޑްސް ދިނުމުގެ ހަފްލާ މިރޭ ބޭއްވުމަށް ހަމަޖެހިފައިވާ އިރު، އެ ހަފްލާ އަށް ހުރިހާ ފަރާތްތަކަކުން ފުރިހަމަ އަށް ތައްޔާރުވެއްޖެ އެވެ.

މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ދޭ މޯލްޑިވްސް ޓްރެވަލް އެވޯޑްސް ހަފްލާ އިންތިޒާމްތައް ހަމަޖައްސާ ތިންކް އެސޯސިއޭޓްސްގެ ސީއީއޯ އަދީލް އިސްމާއިލް ވިދާޅުވީ މިރޭ އޮޅުވެލި ރިސޯޓުގައި ބާއްވާ މި ހަފްލާ އަކީ ހުރިހާ ގޮތަކުން ވެސް ފުރިހަމަ ހަފްލާއަކަށް ހެދުމަށް ކުރަން ޖެހޭ މަސައްކަތްތައް ކުރުމުގައި ތިންކުގެ ދެ ޓީމަކުން ހަރަކާތްތެރިވަމުން އަންނަ ކަމަށެވެ.

"އެއް ޓީމް މަސައްކަތް ކުރަނީ މާލޭގައި. އެ ތަނަށް ދާ ފަރާތްތަކަށް ގުޅައި ޔަގީން ކުރަމުން. ދެވަނަ ޓީމް މަސައްކަތް ކުރަނީ ހަފްލާ ބާއްވާ ތަން ތައްޔާރުކުރުމުގައި އޮޅުވެލި ރިސޯޓުގައި. އިރާދަކުރެއްވިއްޔާ ރާވާފައި އޮތް ގޮތަށް ހަފްލާ ކުރިއަށް ދާނެ،" އޭނާ ވިދާޅުވި އެވެ.

އަދީލް ވިދާޅުވި ގޮތުގައި އޮޅުވެލީގައި ވަމުންދާ ތައްޔާރީތަކުގެ 80 ޕަސެންޓަށް ވުރެ ބޮޑު ބައެއް ނިމި، މިހާރު ވަނީ ރިހާސަލް ފަށަން ތައްޔާރުވެފަ އެވެ.

މިއީ މަޓާޓޯ ޓްރެވަލް އެވޯޑް ބާއްވާ ފަސްވަނަ އަހަރެވެ. އެހެންވެ، މި އަހަރުގެ ހަފްލާ އިތުރަށް ފުރިހަމަ ކުރުމަށް ތިންކުން ވަނީ ގިނަ މަސައްކަތްތަކެއް ކޮށްފަ އެވެ. އަދި މި އެވޯޑް ދޭން ފެށި ފަހުން މި އަހަރު މިއީ އެންމެ ގިނަ ބަޔަކު ވެސް އެވޯޑަށް ކުރިމަތިލި ފުރަތަމަ ފަހަރެވެ. އެ ގޮތުން، އެވޯޑުގެ 35 ކެޓަގަރީއަށް 246 ފަރާތަކުން ކުރިމަތިލާފައިވެ އެވެ.

މި އަހަރު އަލަށް ތައާރަފް ކުރާ ފަސް ދާއިރާއަކުން އެވޯޑު ދޭން ވަނީ ނިންމައިފަ އެވެ. އެ ދާއިރާތަކަކީ ލީޑިން މާކެޓިން ޕްރޮގްރާމް، ލީޑިން ހިއުމަން ރިސޯސް މެނޭޖްމަންޓް، ލީޑިން ގެސްޓްހައުސް އައިލެންޑް، ލީޑިން އެފްއެންޑްބީ އައުޓްލެޓް އަދި ލީޑިން އެއާޕޯޓް ލައުންޖެވެ.

މި އަހަރުގެ ޓްރެވަލް އެވޯޑްގެ ސްކޯ ގުނަން ކަނޑައާޅާފައި ވަނީ އަމިއްލަ އޮޑިޓް ފާމެއް ކަމަށްވާ ކޭޕީއެމްޖީ އެވެ.

އަދީލް ވިދާޅުވި ގޮތުގައި ކޭޕީއެމްޖީގެ ޓީމަކުން މިހާރު ވަނީ ސްކޯތައް ފައިނަލްކޮށްފަ އެވެ. ވަނަތައް ހޮވުމުގެ މަސައްކަތް ވީހާ ވެސް ރަނގަޅަށް ކުރިއަށް ގެންދިއުމަށް، ކޭޕީއެމްޖީގެ ޓީމްގެ ބޭފުޅުން އޮޅުވެއްޔަށް ވަޑައިގެން، ވަނަތަކަށް ދިޔަ ފަރާތްތަކުގެ ނަންތައް ހަވާލުކޮށް، ކަމާ ބެހޭ ހުރިހާ ކަމެއް ކުރައްވާނެ ކަމަށް އޭނާ ވިދާޅުވި އެވެ.

"ވިއްސާރަ ވިޔަސް، ކޮންޓިންޖެންސީ ޕްލޭނަކަށް ބަލައިގެން އަޅުގަނޑުމެން ކުރިއަށް މި ދަނީ،" އަދީލް ވިދާޅުވި އެވެ.

ޓްރެވަލް އެވޯޑުގެ މައި ސްޕޮންސަރަކީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އެވެ. އެވޯޑުގެ އޮންލައިން މީޑިއާ ޕާޓްނަރަކަށް "މިހާރު" ހަމަޖައްސާފައިވާ އިރު، އިތުރު ޕާޓްނަރުންގެ ތެރޭގައި އެލައިޑް އިންޝުއަރެންސާއި ފިއުލް ސަޕްލައިސް މޯލްޑިވްސް އާއި ޕީއެސްއެމާއި ދިރާގު އަދި ކޮކާކޯލާ ހިމެެނެ އެވެ.

‎މަޓާޓޯ ޓްރެވަލް އެވޯޑަކީ ރާއްޖޭގެ ޓޫރިޒަމް ދާއިރާ ތަރައްގީކޮށް ކުރިއަރުވަން މަސައްކަތް ކުރާ އަދި ރާއްޖެ އާއި ރާއްޖޭން ބޭރުން އެ ދާއިރާ އިން ހޮވޭ ފަރާތްތަކަށް ދޭ އެވޯޑެކެވެ.