މަޓާޓޯ ޓްރެވަލް އެވޯޑަށް 35 ކެޓަގަރީން 243 ފަރާތަކުން ކުރިމަތިލައިފި

މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ދޭ "މޯލްޑިވްސް ޓްރެވަލް އެވޯޑް" އަށް 35 ކެޓަގަރީން 243 ފަރާތަކުން ކުރިމަތިލައިފި އެވެ.

މިއީ މި އެވޯޑް ދޭން ފެށި ފަހުން މިހާ ގިނަ ބަޔަކު އެވޯޑަށް ކުރިމަތިލި ފުރަތަމަ ފަހަރެވެ.

މަޓާޓޯއިން ބުނި ގޮތުގައި އަލަށް ތައާރަފްކުރި ފަސް ދާއިރާއަކުން އެވޯޑު ދޭނެ އެވެ. އެ ދާއިރާތަކަކީ ލީޑިން މާކެޓިން ޕްރޮގްރާމް، ލީޑިން ހިއުމަން ރިސޯސް މެނޭޖްމަންޓް، ލީޑިން ގެސްޓްހައުސް އައިލެންޑް، ލީޑިން އެފްއެންޑްބީ އައުޓްލެޓް އަދި ލީޑިން އެއާޕޯޓް ލައުންޖް އެވެ.

ނޮވެމްބަރު މަހު މަޓާޓޯ ޓްރެވަލް އެވޯޑު ހަފްލާ ބާއްވާއިރު، ލީޑިން ގެސްޓްހައުސް ކެޓަގަރީން 18 ފަރާތަކުން ކުރިމަތިލާފައިވާ ކަމަށް ވެސް މަޓާޓޯއިން ބުންޏެވެ. އަދި ރިސޯޓު ކެޓަގަރީން ވެސް ގިނަ ބަޔަކު ކުރިމަތިލާފައިވާތީ އެ ކެޓަގަރީގެ ވާދަވެރިކަން ވެސް ބޮޑުވާނެ ކަމަށް އެ ތަނުން ބުންޏެވެ.

މިދިޔަ އަހަރު ޓްރެވަލް އެވޯޑަށް ކުރިމަތިލާފައިވަނީ 115 ފަރާތަކުންނެވެ. މިއީ މި އެވޯޑް ހަފުލާ ބާއްވާ ފަސް ވަނަ އަހަރެވެ.

މި އަހަރުގެ އެވޯޑް ހަފްލާ ކުރިއަށް ގެންދާނީ ދެ ދުވަހަށް ބަހާލައިގެންނެވެ. އެވޯޑު ބޭއްވުމުގެ ހުރިހާ ކަމެއް އިންތިޒާމްކުރުމުގެ ކަންކަން ކުރިއަށް ގެންދާނީ ތިންކް އެޑްވަޓައިޒިންގެ ފަރާތުންނެވެ.

މަޓާޓޯއިން ބުނި ގޮތުގައި މި އެވޯޑު ދިނުމުގެ ބޭނުމަކީ ރާއްޖޭގެ ޓޫރިޒަމް އިންޑަސްޓްރީ ކުރިއަރުވައި ހިދުމަތުގެ ފެންވަރު މަތިކުރުމަށް ހިތްވަރު ދިނުމެވެ.

މަޓާޓޯ ޓްރެވަލް އެވޯޑަކީ ރާއްޖޭގެ ފަތުރުވެރިކަން ތަރައްގީކޮށް ކުރިއަރުވަން މަސައްކަތް ކުރާ އަދި ރާއްޖެ އާއި ރާއްޖޭން ބޭރުން ފަތުރުވެރިކަމުގެ ދާއިރާ އިން ހޮވޭ ފަރާތްތަކަށް ދޭ އެވޯޑެކެވެ.