އެސެޓް ރިކަވަރީ ކޮމިޝަނުގެ ސްޕީޑާ މެދު ލަދުވެތިވަން: މީކާއީލް

އެސެޓް ރިކަވަރީ ކޮމިޝަނުން މިދިޔަ ދެ އަހަރެއްހާ ދުވަހު ކޮށްފައިވާ މަސައްކަތުގެ މަދުކަމުން، އެ ކޮމިޝަނާ މެދު ލަދުވެދިވެވަޑައިގަންނަވާ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހުމަދު ނަސީމް މިއަދު ވިދާޅުވެއްޖެ އެވެ.

އެމްއެމްޕީއާރުސީގެ ހިޔާނާތުގެ ފައިސާ ލިބުނު ކަމަށް ބެލެވޭ މީހުންގެ ތެރެއިން ދައުލަތުގެ މަގާމުތަކުގައި މިހާރު ތިބި މީހުންނާއި ކުރިން މަގާމުތައް އަދާކޮށްފައިވާ މީހުންގެ ލިސްޓެއް މަޖިލީހުން ވަނީ ހޯދައިފަ އެވެ. މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އާއި ޖުޑިޝަރީ ކޮމިޓީން އެ ލިސްޓް ދިރާސާކުރުމަށް ފަހު އެކުލަވައިލި ރިޕޯޓް މަޖިލީހުގެ ތަޅުމަށް ހުށަހެޅީ މިހާރު ކުރިއަށްދާ ޖަލްސާގަ އެވެ.

ޖޮއިންްޓް ކޮމިޓީގެ ރިޕޯޓްގެ ބަހުސްގައި މީކާއީލްް ވިދާޅުވީ ދެ އަަހަރު ވަންދެން މަސައްކަތްކުރުމަށް ފަހު އެކުލަވައިލި ރިޕޯޓްގައި ހުރި ނަންތަކުގެ ބޮޑު ބައި އޮތީ މައުލޫމާތު އެއްކުރުމުގެ މަރުހަލާގައި ކަމަށާއި ދެ އަހަރު ދުވަހުން ވާންޖެހޭނީ އެވަރު ނޫން ކަމަށެވެ. ކޮމިޝަނުގެ މަސައްކަތް މިހާރު މިދާ ސްޕީޑްގައި ކުރިއަށްދާ ނަމަ ރިޔާސީ ދައުރާއި މަޖިލީހުގެ ދައުރު ނިމޭ އިރު ވެސް އެމްއެމްޕީއާރުސީ މައްސަލައަށް ހައްލެއް އަންނާނެ ކަަމަށް ދެކެވަޑައިނުގަންނަވާ ކަމަށް ވެސް އޭނާ ވިދާޅުވި އެވެ.

"ދެ އަހަރާއި ބައި ވެގެން ދާއިރު، ރިޔާސީ ކޮމިޝަނެއް ވަކިން ހަދައި، ދައުލަތުގެ ބަޖެޓުން އެ މީހުންނަށް އަޅުގަޑުމެން ހަރަދުކޮށް ދެ އަހަރާ ބައި ވެގެން ދާއިރު، ލިސްޓެއް އެކުލަވާލާއިރު އެ ލިސްޓްގެ ފަސްދޮޅަސް އެތައް ޕަސެންޓެއް މީހުންނަށް، އަދި މައުލޫމާތު އެއްކުރުމުގެ ސްޓޭޖްގައި ހުރި މީހުންނޭ އެ މީހުންނަކީ ބުނީމާ ހަމަ އަޅުގަނޑު ވެސް އެބަ ލަދުގަނޭ،" މީކާއީލް ވިދާޅުވި އެވެ.،

މައުލޫމާތު އެއްކުރުމުގެ މަރުހަލާގައި ލިސްޓް ނުބާއްވައި ހަލުވި ދުވެއްޔެއްގައި މަސައްކަތް ކުރިއަށް ގެންދަންޖެހޭ ކަަމަށާއި އެސެޓް ރިކަަވަރީ ކޮމިޝަނުގެ މެމްބަރުންގެ މުސާރަ ހަލާލުވާ ވަރަށް މަސައްކަތް ކުރަން ޖެހޭ ކަމަށް ވެސް އޭނާ ވިދާޅުވި އެވެ. ލިސްޓްގައި ނަން ހިމެނޭ ފަރާތްތަކަށް އަޅަން ޖެހޭ ފިޔަވަޅުތައް އެޅޭނީ ވެސް އޭނާ ވިދާޅުވި ގޮތުގައި ކޮމިޝަނުން އެއަށް ވުރެ މަސައްކަތް އަވަސްކޮށްގެން ކަމަށެވެ. އެ މަސައްކަތް ކޮމިޝަނާއި ޕީޖީން އަދި ކޯޓުތަކުން ވެސް މައްސަލަ އަވަސްކުރަން ޖެހޭ ކަަމަށެވެ.

އެސެޓް ރިކަވަރީ ކޮމިޝަނުގެ މަސައްކަތް ލަސްކަމުން އެހެން ބައެއް މެމްބަރުން ވެސް މިއަދު ފާޑުވިދާޅުވި އެވެެ.

ކޮމިޝަނުން މަޖިލީހާ ހިއްސާކުރި ލިސްޓް މިހާރު ވަނީ އާއްމުކޮށްފަ އެވެ. އޭގެ ތެރޭގައި މަޖިލީހުގެ ބައެއް މެމްބަރުން ވެސް ހިމެނެ އެވެ.