އެލެން ޑިޖެނެސްރެސްގެ ޝޯ އަންނަ އަންނަ އަހަރު ހުއްޓާލަނީ

އާންމުންގެ މެދުގައި މަގުބޫލު އެމެރިކާގެ ޓީވީ ޝޯ "ދި އެލެން ޑިޖެނެރެސް ޝޯ" ގެ 19 ވަނަ ސީޒަނާ އެކު ހުއްޓާލަން ނިންމައިފި އެވެ.

މިކަމާ ބެހޭ ގޮތުން އެލެން ބުނީ 19 ވަނަ ސީޒަނާ އެކު ޝޯ ނިންމައިލުމަކީ ރަނގަޅު ކަމަކަށް ވާނެ ކަމަށާއި އޭނާ އެކަމާ ދޭތެރޭ ވެސް ވިސްނާތާ ވެސް ގިނަ ދުވަސްތަކެއްވެއްޖެ ކަމަށެވެ. އެކަމަކު ޝޯ ހުއްޓައިލަން ނިންމި ސަބަބާ ބެހޭ ގޮތުން އެއްވެސް ވާހަކައެއް ނުދައްކަ އެވެ. ނަމަވެސް 2018 ގައި ވެސް ޝޯ ހުއްޓައިލަން އުޅޭކަމުގެ އިޝާރާތެއް އެލެން ދީފައިވެ އެވެ.

"ހިތަށް އަރަނީ ދެން ވެއްޖޭ ޝޯ ހުއްޓާލަން. އެއީ އަހަރެންގެ އަމިއްލަ ނަފުސު ވެސް ބުނާ ވާހަކަ އަކީ،" އެލެން، 63، ބުންޏެވެ. "މިހާރު ބޭނުންވޭ ކޮންމެވެސް ޗެލެންޖިން އެހެން ކަމެއްކޮށްލަން."

މިދިޔަ އަހަރު އެލެންގެ މައްޗަށް ބޮޑެތި ތުހުމަތުތަކެއް ކުރެވި، އޭނާ އަށް ގިނަ ބައެއްގެ ފާޑުކިޔުންތައް ވެސް އަމާޒުވި އެވެ. އެއީ މަސައްކަތުގައި މާހައުލުގައި އެކީގައި މަސައްކަތްކުރާ މީހުންގެ ހައްގުތައް ގެއްލޭ ގޮތަށް ހަރުކަށި އުސޫލުތައް ގެންގުޅެ، ބައެއް މުވައްޒަފުންނާ ދޭތެރޭ އިހާނެތިކޮށް ހަދާ ކަމަށް ބުނެ ފެންމަތިވި މައްސަލަތަކާ އެވެ. އެކަމާ ހެދި ޝޯގެ ސީނިއާ ތިން ޕްރޮޑިއުސަރެއްގެ މަގާމު ގެއްލި، ފަހުން އެލެން މައާފަށް ވެސް އެދިފައިވެ އެވެ.

އެންބީސީން ގެނެސްދޭ "ދި އެލެން ޑިޖެނެރެސް ޝޯ" އަކީ 2003 އިން ފެށިގެން ގެނެސްދެމުން އަންނަ ޝޯއެކެވެ. އަށާރަ ވަނަ ސީޒަން ގެނެސްދޭން ފެށީ މިދިޔަ އަހަރުގެ ސެޕްޓެމްބަރު މަހުގެ ތެރޭގަ އެވެ. އެ ޝޯގެ 3،000 އަށް ވުރެ ގިނަ އެޕިސޯޑް މިހާތަނަށް ގެނެސްދީފައިވެ އެވެ.

"ދި އެލެން ޑިޖެނެރެސް ޝޯ" ހޯދާފައިވާ އެވޯޑްތަކުގެ ތެރޭގައި ޑޭޓައިމް އެމީ އެވޯޑާއި ޕީޕަލްސް ޗޮއިސް އެވޯޑް ހިމެނެ އެވެ.