އިންޑިއާ އިން އޮސްޓްރޭލިއާ އަށް ދަތުރުކޮށްފި ނަމަ ޖަލަށް!

ސިޑްނީ (މެއި 2) - އިންޑިއާ އިން އޮސްޓްރޭލިއާ އަށް ދަތުރު ކުރުން މި ދުވަސްވަރު މަނާކޮށްފައިވާތީ އިންޑިއާ އިން އޮސްޓްރޭލިއާ އަށް ދަތުރުކޮށްފި ނަމަ ފަސް އަހަރުގެ ޖަލު ހުކުމަކާ އެކު ބޮޑު ޖޫރިމަނާއަކާ ކުރިމަތިލާން ޖެހިދާނެކަމުގެ ބިރު ބޮޑުވެއްޖެ އެވެ.

އޮސްޓްރޭލިއާގެ ހެލްތު މިނިސްޓްރީން ބުނީ އިންޑިއާ އިން އެ ގައުމަށް މީހުން ދަތުރުކުރުން މަނާކުރީ ކަރަންޓީނުގައި ތިބި މީހުންގެ ތެރޭން ކޮވިޑަށް ޕޮޒިޓިވްވާ ރޭޓް މަތިވުމުން ކަމަށެވެ. ހެލްތު މިނިސްޓްރީން ބުނީ ކަރަންޓީން ފެސިލިޓީތަކުން ޕޮޒިޓިވްވާ އަދަދު މެނޭޖްކުރެވޭ މިންވަރަށް ދަށް ކުރަން ބޭނުންވާ ކަމަށެވެ. މިދިޔަ ހަފުތާގައި އޮސްޓްރޭލިއާ އިން ވަނީ އިންޑިއާ އިން ދަތުރުކުރާ ހުރިހާ ފްލައިޓެއް މަނާކޮށްފަ އެވެ.

އޮސްޓްރޭލިއާގެ މީޑިއާތަކުން ބުނެފައިވާ ގޮތުގައި އަމިއްލަ ގައުމަށް ދަތުރުކޮށްގެން ޖިނާއީ ކުށަކާ ކުރިމަތިލާން ޖެހޭ މިއީ ފުރަތަމަ ފަހަރެވެ.

އޮސްޓްރޭލިއާގެ ގާތްގަނޑަކަށް 9،000 މީހުން އިންޑިއާގައި ދިރިއުޅެ އެވެ.

އޮސްޓްރޭލިއާ އިން ހަމަޖައްސާފައިވާ އާ އުސޫލާ ޚިލާފަށް އިންޑިއާ އިން އެއްވެސް މީހަކު އެ ގައުމަށް ދަތުރުކޮށްފި ނަމަ ފަސް އެހަރުގެ ޖަލު ހުކުމެއް ނުވަތަ 51،000 ޑޮލަރުން ޖޫރިމަނާކުރުމުގެ ބިރު ބޮޑެވެ. މެއި 15 ވަނަ ދުވަހަށް ފަހު މި އުސޫލުން އަލުން މުރާޖައާ ކުރާނެ އެވެ.

ވައިރަސް ކޮންޓްރޯލް ކުރަން އޮސްޓްރޭލިއާ އިން ވަނީ މިދިޔަ އަހަރުގެ ފެބްރުއަރީން ފެށިގެން ހަރުކަށި ފިޔަވަޅުތައް އަޅަން ފަށައިފަ އެވެ. ނަތީޖާއެއްގެ ގޮތުން އޮސްޓްރޭލިއާ އިން ޕޮޒިޓިވްވާ މީހުންގެ އަދަދު ވަނީ ވަރަށް ބޮޑަށް ދަށްކޮށްފަ އެވެ.