ހަނދަށް ދާ އުޅަނދު ހަދަން ނާސާ އިން ސްޕޭސް އެކްސްއާ އެކު ހެދި އެއްބަސްވުން ބާތިލުކޮށްފި

އެމެރިކާގެ ނާސާ އިން އަލުން ހަނދަށް ދާން ކުރިއަށްދާ ގެންދާ "އާޓެމިސް" ޕްރޮމްރާމަށް ބޭނުންވާ އުޅަނދު ހަދަން މަހުޖަނު އީލޮން މަސްކްގެ ސްޕޭސް އެކްސްއާ އެކު ހެދި 2.9 ބިލިއަން ޑޮލަރުގެ އެއްބަސްވުން ނާސާ އިން ބާތިލުކޮށްފި އެވެ.

މިދިޔަ މަހުގެ 16 ވަނަ ދުވަހު ނާސާގެ ޕްރޮޖެކްޓް ސްޕޭސް އެކްސް އަށް ލިބުނީ އެމެޒޯންގެ ވެރިޔާ ޖެފް ބެޒޯސްގެ ބްލޫ އޮރިޖިން އާއި ޑައިނެޓިކްސްއާ ވާދަކޮށެވެ. ނަމަވެސް އެއްބަސްވުން ބާތިލުކުރަން ޖެހުނީ އެކަން ނާސާ އިން ކުރިއަށް ގެންގޮސްފައި ވަނީ އެންމެ އިންސާފުވެރިކޮށް ނޫން ކަމަށް ބުނެ އެކަން ހުއްޓުވައިދޭން ބްލޫ އޮރިޖިން އާއި ޑައިނެޓިކްސް އިން އެމެރިކާ ގަވަރަމަންޓް އެކައުންޓަލިބިލިޓީ އޮފީސް (ޖީއޭއޯ) އަށް ހުށަހެޅުމާ ގުޅިގެންނެވެ.

އެ ކުންފުނިތަކުން ބުނެފައިވާ ގޮތުގައި ހަނދަށް ދިއުން ފަދަ ބޮޑު މަޝްރޫއެއް ކުރިއަށް ގެންދާ އިރު، ނާސާ އިން އެންމެ ކުންފުންޏަކާ ގުޅިގެން މަސައްކަތްކުރުމަކީ އެންމެ އިންސާވެރި ގޮތަށް ނުވުމުގެ އިތުރަށް ރައްކާތެރި ގޮތެއް ވެސް ނޫނެވެ. އަދި ނާސާ އިން ޕްލޭންކޮށްފައިވާ ގޮތަށް 2024 ގައި ހަނދަށް ދާން ކުރާ މަސައްކަތަށް އެކަމުން ހުރަސްތަކެއް ވެސް އެޅޭނެ ކަމަށް ބްލޫ އޮރިޖިން އާއި ޑައިނެޓިކްސް އިން ބުނެފައިވެ އެވެ.

މިކަމާ ގުޅިގެން ޖިއޭއޯގެ އެންގުމަށް ނާސާ އިން ސްޕޭސް އެކްސްއާ އެކު ހެދި އެއްބަސްވުން ބާތިލުކުރިކަން ކަށަވަރުކޮށް ދެއްވައި ނާސާގެ ތަރުޖަމާނު މޮނިކާ ވިޓް ވިދާޅުވީ އެކަން ދެން ކުރިއަށް ގެންދާނީ ޖީއޭއޯ އިން އަންގާ ގޮތެއްގެ މައްޗަށް ބިނާކޮށް ކަމަށެވެ.

ނާސާ އިން ބުނި ގޮތުގައި އެއް ކުންފުންޏަކާ ގުޅިގެން ހިއުމަން ލޭންޑިން ސިސްޓަމް (އެޗްއެލްސް) ހަދަން ނިންމީ ލިބުނު ބަޖެޓަށް ރިއާޔަތްކޮށެވެ. އަދި ސްޕޭސް އެކްސް އަކީ މިހާރު ވެސް ނާސާއާ އެކީގައި މަސައްކަތެއް ކުރާތީ ކުންފުންޏަކަށްވާތީ ދެ ފަރާތުގެ މެދުގައި އެއްގޮތް ވިސްނުންތަކެއް ހުރި ކަމަށް ބުނެފައިވެ އެވެ.

ނާސާ ބުނި ގޮތުގައި އާޓެމިސް ޕްރޮގްރާމަށް 3.3 ބިލިއަން ޑޮލަރުގެ ބަޖެޓެއް ބޭނުންވާތީ އެކަން ކޮންގްރެސް އަށް ހުށަހެޅި ނަމަވެސް އެ ބަޖެޓް މިހާތަނަށް އެއްކޮށް ހަމައެއްނުޖެ އެވެ. ނާސާ އަށް ކޮންގްރެސް އިން މިދިޔަ އަހަރު ދޫކޮށްފައި ވަނީ 850 މިލިއަން ޑޮލަރެވެ.