ކާމިޔާބު ލިބުނީ ޔާމީންގެ ފިކުރުގެ ސަބަބުން: ޑރ. މުއިއްޒު

މި ހުރިހާ ދުވަހު އެމްޑީޕީން ރަސްކުރަމުން ދިޔަ މާލޭ ސިޓީ ކައުންސިލްގެ މައްޗަށް ޕީޕީއެމުން ބާރު ހޯދީ، ދީނާއި ތަރައްގީގެ ފިކުރު އިސްކޮށްގެން ކަމަށާއި އެއީ ޕާޓީގެ ލީޑަރު ކުރީގެ ރައީސް އަބްދުﷲ ޔާމީންގެ ފިކުރު ކަމަށް، މާލޭގެ މޭޔަރު ކަމަށް އިންތިހާބުވި ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އިއްޔެ ބޭއްވި ލޯކަލް ކައުންސިލް އިންތިހާބުގައި މާލޭގެ މޭޔަރުކަމާއި ސިޓީ ކައުންސިލްގެ ގިނަ ގޮނޑިތަކެއް ވެސް ކާމިޔާބުކޮށްގެން، ޕީޕީއެމް ވަނީ މުޅި ރާއްޖެ ސިއްސުވާލައިފަ އެވެ. އަދި އެކަމުގެ އުފާ "މީ މަގޭ ރާއްޖެ އަލިވިލުން" ގެ ނަމުގައި މިހާރު އަންނަނީ ފާޅުކުރަމުންނެވެ.

އެ ހަފުލާގައި ވާހަކަ ދައްކަވަމުން، ކުރީގެ ހައުސިން މިނިސްޓަރު ވިދާޅުވި ގޮތުގައި އޭނާ އިންތިހާބަށް ނުކުންނެވީ، ރައީސް ޔާމީން ދަސްކޮށްދެއްވި ފިކުރުގަ އެވެ. އެއީ ދީނީ ފިކުރާއި ތަރައްގީގެ ފިކުރެވެ. އިންތިހާބު ކާމިޔާބު ކުރެވުމުގެ އަނެއް ސަބަބެއް ކަމަށް މުއިއްޒު ފާހަގަކުރެއްވީ މި ސަރުކާރުގެ ދެ އަހަރާއި ބައިގެ ތެރޭގައި، މާލޭގެ ރައްޔިތުންނަށް ވެފައިވާ ވައުދުތައް ނުފުއްދުމެވެ.

"އެ މީހުން ބޭނުންވީ ފުދުންތެރި ދިރިއުޅުމެއް. މާލެ ހިތްފަސޭހަ ތަނަކަށް ހަދަން. ތަރައްގީ،" މުއިއްޒު ވިދާޅުވި އެވެ.

ކެމްޕޭންގެ ތެރޭގައި އޭނާ ވަނީ، މާލޭގެ ވަރަށް ގިނަ ގެތަކަށް ވަޑައިގެން، އާއްމުންނާ ބައްދަލުކުުރައްވައިފަ އެވެ. މުއިއްޒު ވިދާޅުވި ގޮތުގައި މާލޭގެ ގިނަ މީހުންގެ މޫނުމަތިން ފެނުނީ މާޔޫސް ކަމާއި ހިތްދަތިކަމެވެ. ބޯހިޔާވަހިކަން ދޭނެ ކަމަށް ސަރުކާރުން ވި ވައުދު ނުފުއްދުމުގެ ސަބަބުން، ގިނަ ބަޔަކު އުޅެނީ ވަރަށް ހާލުގައި ކަމަށް ވިދާޅުވި އެވެ.

އެ މީހުންގެ މައިގަނޑު ޝަކުވާ އަކަށްވީ، މުއިއްޒުގެ ބަހުން ނަމަ، ޔާމީންގެ ސަރުކާރުން ދިން ފްލެޓްތައް އަތުލުމާއި ވިޔަފާރިތައް ބަނގުރޫޓުވުމެވެ.

އޭނާ ވިދާޅުވި ގޮތުގައި ޕީޕީއެމަށް ދިވެހި ރައްޔިތުން ވޯޓު ދިނީ، ގައުމީ ވިސްނުމުގަ އެވެ. އިސްލާމް ދީނާއި ގައުމިއްޔަތާ މެދު އެ މީހުން ކަންބޮޑުވުމެވެ. އެހެންވެ، އެ ހުރިހާ ކަމަކުން އުއްމީދު ލިބިވަޑައިގަންނަވާ ކަމަށާއި ދީނާއި ގައުމަށް ގައްދާރުވާ، މިނިވަންކަން ގެއްލޭ ގޮތަށް އަމަލުކުރާ މީހުންނަށް ފުރުސަތު ނުދޭނެ ކަން އެނގިވަޑައިގެންނެވި ކަމަށް މުއިއްޒު ވިދާޅުވި އެވެ.

"ކޮން ބާރެއްތޯ [އެމްޑީޕީއަށް] ނުލިބެނީ؟ ސަރުކާރާއި ރައްޔިތުންގެ މަޖިލީހުގެ މެޖޯރިޓީ އާއި މިހާތަނަށް މާލޭ ސިޓީ ކައުންސިލް ވެސް އެ އޮތީ އެ މީހުންނަށް. އެކަމަކު އެ ހުރިހާ ކަމެއް އޮވެ، މާލޭ ރައްޔިތުން ބޭނުންވާ ގޮތަކަށް ކަންތައްތަކެއް ނުވޭ،" އޭނާ ވިދާޅުވި އެވެ.

އާ މޭޔަރުގެ ވައުދަކީ، އަމާނަތްތެރިކަމާއި ތެދުވެރިކަމާއެކު، މާލޭ ރައްޔިތުންގެ ބޭނުންތައް ފުއްދައިދިނުމެވެ.