"ކޮވިޑް ފްރީ" ދުވަހެއް ނޫން

"މިއަދަކީ ކޮވިޑް ފްރީ ދުވަސް،" ވޯޓުލާ މަރުކަޒެއްގެ ބޭރުން ފެނުނު މަންޒަރެއް ފޭސްބުކްގައި ހިއްސާކުރަމުން މީހަކު ލިޔެފައި އޮތެވެ. އެ ފޮޓޯ އިން ފެންނަނީ މާލެ އާއި ކ. އާއި ތ. އަތޮޅުގެ ވޯޓު ފޮށިތައް ބަހައްޓާފައިވާ އަމީނިއްޔާ ސްކޫލްގެ ބޭރެވެ. އެއް ބަޔަކު ތިބީ ބޮނޑިވެގެން އޮލަ ވާހަކައިގެ ތެރެއަށް ގޮސް ގެއްލިފަ އެވެ. އެއްވެސް ކަހަލަ އިޖުތިމާއީ ގައިދުރުކަމެއް ނެތި، އަނެއް ބަޔަކު ސަލާން ކުރަމުން ދިޔަ ތަން ވެސް ފެނެ އެވެ.

ސޯޝަލް މީޑިއާގައި މަޖަލަކަށް ހަދައިގެން އިއްޔެ އާއި މިއަދު ވެސް އެންމެ ގަދައަށް ދެއްކި އެއް ވާހަކައަކަށް ވީ، މިއީ "ކޮވިޑް ނެތް" ދުވަހަކެވެ. ލޯކަލް ކައުންސިލްތަކުގެ އިންތިހާބުގެ ވޯޓުލުން މިއަދު ކުރިއަށް ގެންދާއިރު، ރާއްޖޭގައި މިވަގުތު އޮތް ކޮވިޑްގެ ބަލިމަޑުކަން ނިމި، އެ ބަލި ނުފެތުރޭނެ ދުވަހަކަށް ވި ވާހަކަ އެވެ. އެކަމަކު މިއީ މަޖަލަކަށް ހަދައިގެން ދައްކާ ވަރަށް ވުރެ މާ ސީރިއަސް ކަމެކެވެ.

ވޯޓުލާ މަޒުކަޒުތަކުގެ ބޭރުގައި އިޖުތިމާއީ ގައިދުރުކަމުގެ އެއްވެސް ހަމައެއް ލަމައެއް ނެތެވެ. އެއް ބަޔަކު ތިބީ ކިއުތަކުގައި ފިތިބާރުވެގެންނެވެ. ވޯޓުލައި ނިންމައިފައި އަނެއް ބަޔަކު ވޯޓުލާ މަރުކަޒުގެ ބޭރުގައި ބޮނޑިވެގެން ވާހަކަ ދެއްކުމާއި ކޮފީ އާއި ސިނގިރޭޓު ބުއިމާއި އަދި ހީ ސަކަރާތް ޖެހުމުގައި އުޅޭ ތަން ވެސް ފެނުނެވެ. ވޯޓުލުމަށް މިއަދުގެ މިހާތަނަށް ދިޔަ މީހުންގެ އަދަދު މަދުވި ނަމަވެސް، މި މަންޒަރު ފެންނަލެއް ވަރަށް ގިނަ އެވެ.

އެކަން އެގޮތަށް ނުކުރަން އަންގައި، އާންމުން ހޭލުންތެރިކުރާނެ ބަޔަކު ވެސް ނެތެވެ.

ކޮވިޑްގެ ކޭސްތައް ރިކޯޑް އަދަދަކަށް އިތުރުވެފައިވާ މި ދުވަސްވަރު، އިންތިހާބާ ވިދިގެން އެޗްޕީއޭ އިން ދިން ލުއިތަކާ އެކު ކޭސްތައް އިތުރުވުމުގެ ބިރު ވެސް އެބަ އޮތެވެ. އެކަމަކު، ފެންނަ މަންޒަރުތަކުން ގިނަ މީހުންނަށް އެ ބިރުވެރިކަން އަދި އިހުސާސްނުވާ ކަމަށް ބެލެވެ އެވެ. ވޯޓުލުމަށްޓަކައި ކަރަންޓީން ނުވެ ރަށަށް ދެވޭނެ ހުއްދަ ދިނުމުން އެޗްޕީއޭއަށް ވެސް އޮތީ ފާޑުކިޔުން އަމާޒުވެފަ އެވެ.

އެހެން އިންތިހާބުތަކާ ހިލާފަށް މިއީ އާންމުން ވަރަށް ބޮޑަށް ހޭލުންތެރިކުރުވަން ޖެހޭ އިންތިހާބަކަށް ވީ ނަމަވެސް، އެކަން ވެސް އެންމެ ރަނގަޅަށް އިލެކްޝަން ކޮމިޝަނުންނާއި އަދި ޕާޓީތަކުން ވެސް މި ފަހަރު ކޮށްފައެއް ނުވެ އެވެ. ވޯޓުލާން ދާންޖެހޭ މަރުކަޒު ޔަގީންނު ވެގެންނާއި އަރަންޖެހޭ ކިއު ޔަގީން ނުވެގެން ދެކޮޅަށް ދުވި އެތައް ބަޔަކާ ދިމާވި އެވެ. ވޯޓުލުމަށްޓަކައި މި ފަހަރު އަމިއްލަ ގަލަމެއް ގެންދިއުމަށް އަންގާފައި އޮތް ކަން ވެސް ބައެއް މީހުނަށް ނޭނގެ އެވެ.

އެޗްޕީއޭގެ ގައިޑްލައިނާ އެއްގޮތަށް ވޯޓުލާ މަރުކަޒުތަކުގައި އިންތިޒާމުތައް ހަމަޖައްސާ އޮފިޝަލުން އަމަލުކުރަމުން އަންނަކަން ފާހަގަކުރެވުނު ނަމަވެސް، އާންމުންގެ ފަރާތުން ފަރުދީ ޒިންމާ އެންމެ ރަނގަޅަށް އަދާކުރާތަން ނުފެނެ އެވެ.

ހަނދާނުގައި ބަހައްޓަންވީ، އިންތިހާބާ އެކު ލުއިތަކެއް ދިން ނަމަވެސް، މިއީ "ކޮވިޑް ފްރީ" ދުވަހެއް ނޫން ކަމެވެ. އެ މީހެއްގެ ރައްކާތެރިކަން އަމިއްލަ އަށް ކަށަވަރުކުރާށެވެ.