ކިމް ކާޑޭޝަން ވެސް ބިލިއަނަރަކަށް

ފިރިމީހާ ކަންޔޭ ވެސްޓްގެ ގާތުން ވަރިވާން ކޯޓަށް ހުށަހަޅާފައިވާ އެމެރިކާގެ މަޝްހޫރު ސެލެބްރިޓީ ކިމް ކާޑޭޝަނަށް ވެސް ބިލިއަނަރެއްގެ ދަރަޖަ ލިބިއްޖެ އެވެ.

ފޯބްސް އިން ބުނި ގޮތުގައި 40 އަހަރުގެ ވިޔަފާރިވެރިޔާގެ ތަނަވަސްކަން އިތުރު ހަރުފަތަކަށް އުފުލުނީ އަމިއްލަ ވިޔަފާރިތައް ކަމަށްވާ ކޭކޭޑަބްލިއު ބިއުޓީ އާއި ސްކިމްސްގެ ވިޔަފާރި ބޮޑުތަނުން އުފުލި އާމްދަނީ އިތުރުވުމާ ގުޅިގެންނެވެ.

ފޯބްސް އިން ބުނި ގޮތުގައި ކިމް އަށް އަލަށް ބިލިއަނަރެއްގެ ދަރަޖަ ލިބުނީ މިދިޔަ އަހަރުގެ އޮކްޓޯބަރު މަހުން ފެށިގެން އޭނާގެ އާމްދަނީ އަށް އައި ކުރިއެރުމާ އެކީގަ އެވެ. އެގޮތުން އޮކްޓޯބަރު މަހާ ހަމައަށް ކިމްގެ މިލްކިއްޔާތަކީ 780 މިލިއަން ކަމަށް ވިޔަސް މި އަހަރުގެ މިހާތަނަށް އައި އިރު، ކިމްގެ އާމްދަނީ ހިސާބުކޮށްލުމުން އޭނާގެ މިލްކިއްޔާތު ބިލިއަން ޑޮލަރަށް އަރާ ކަމަށް ފޯބްސް އިން ބުންޏެވެ.

ފޯބްސް އިން ބުނީ އަމިއްލަ ވިޔަފާރި ބްރޭންޑްތަކުގެ އާމްދަނީގެ އިތުރުން އާއިލީ ރިއަލިޓީ ޝޯ އާއި އެކި އިޝްތިހާރުތަކުގެ އިތުރުން ބައެއް އެހެން ކުދި ވިޔަފާރިތަކުން ވެސް ކިމްގެ އާމްދަނީ އުފުލިފައިވާ ކަމަށެވެ.

ތިން ވަނަ ކައިވެނީގެ މައްސަލަ ކޯޓްގައި އޮއްވައި ހަތަރު ކުދިންގެ މަންމަ އަށް ބިލިއަނަރެއްގެ ދަރަޖަ ލިބުނު އިރު ފިރިމީހާ ކަންޔޭ އަކީ ވެސް ބިލިއަނަރެކެވެ. އޭނާގެ މިލްކިއްޔާތު 1.8 ބިލިއަނަށް އަރަ އެވެ. އެކަމަކު މިލްކިއްޔާތު އެއަށް ވުރެ ބޮޑު ކަމަށް މިދިޔަ އަހަރު އެމެރިކާގެ ރައީސް ކަމަސް ވެސް ވާދަކުރި ކަންޔޭ އަމިއްލަ އަށް ދައުވާކުރެ އެވެ.

ކަންޔޭ އެންމެ ފުރަތަމަ ރަސްމީކޮށް ބިލިއަނަރެއްގެ ދަރަޖަ ލިބުނީ މިދިޔަ އަހަރު އެވެ.

ކިމް ބިލިއަނަރެއްގެ މަގާމަށް ޖެހިލި އިރު އޭނާގެ އެއްބަނޑު ކޮއްކޮ ކައިލީ އަށް ބިލިއަނަރެއްގެ މަގާމު 2019 ވަނަ އަހަރު ލިބުނެވެ. އެކަމަކު މިދިޔަ އަހަރުގެ ކުރީކޮޅު އޭނާގެ ނަން ބިލިއަނަރުންގެ ލިސްޓުން އުނިކޮށްފައިވެ އެވެ. ފޯބްސް އިން ބުނެފައިވާ ގޮތުގައި ކައިލީ، 23، ގެ ނަން އުނިކުރީ މިލްކިއްޔާތާ ގުޅޭ ގޮތުން ސައްހަ ނޫން މައުލޫމާތުތަކެއް ދީފައިވާކަން އެނގުމާ ގުޅިގެންނެވެ. އެވެ.

އޭނާގެ މިލްކިއްޔާތަކީ މިހާރު 700 މިލިއަން ޑޮލަރެވެ.