ޑްރަގްގެ ފަރުވާ ނުފެށި ކިއުގައި ތިބި މީހުންގެ އަދަދު ދަށަށް

މަސްތުވާތަކެތީގެ ވަބާއިން ސަލާމަތްވުމުގެ ފަރުވާ ނުފެށި ކިއުގައި ތިބި މީހުންގެ އަދަދު ދަށަށް ހިނގައްޖެ އެވެ.

ނޭޝަނަލް ޑްރަގް އެޖެންސީ (އެންޑީއޭ)ގެ މީޑިއާ އަދި ލީގަލް އޮފިޝަލް އަހުމަދު ހިލްމީ "މިހާރު" އަށް މިއަދު ވިދާޅުވީ ޑްރަގްގެ ފަރުވާ ނުފެށި މިދިޔަ އާދިއްތަ ދުވަހާ ހަމައަށް ތިބީ 456 މީހުން ކަމަށެވެ.

މާޗު މަހުގެ ކުރިން ފަރުވާ ނުފެށި ތިބި މީހުންގެ އަދަދު ހުރީ 513ގަ އެވެ.

މާޗު މަސް ނިމުނު އިރު ކ. ހިންމަފުށީގައި ހުންނަ ރިހެބިލިޓޭޝަން ސެންޓަރުން ފަރުވާ ހޯދަން ޑްރަގް ކޯޓުން ކުރި އަމުރާ ގުޅިގެން ފަރުވާ ނުފެށި 276 މީހުން ތިބި އިރު ކޮމިއުނިޓީ ރީއިންޓަގްރޭޝަން ފަރުވާ ނުފެށި އޮތް މީހުންގެ އަަދަދަކީ 180 އެ އެވެ.

މަސްތުވާތަކެތީގެ ވަބާގައި ޖެހި ގައުމު ވެއްޓިފައިވާ އަނދަވަޅުން ސަލާމަތްކުރަން އެންޑީއޭ ނުކުޅެދިފައިވާ ކަމުގެ ތުހުމަތުތަކާ އެކު 1،000 އަށް ވުރެ ގިނަ މީހުންގެ ސޮޔާ އެކު ރައްޔިތުންގެ މަޖިލީހަށް މިދިޔަ އަންގާރަ ދުވަހު ޕެޓިޝަނެއް ހުށަހެޅި އެވެ. އޭގައި އެ މީހުން އެދިފައިވަނީ އެންޑީއޭއާ އެކު ފަރުވާގެ ނިޒާމު ވެސް ބަދަލުކޮށްދިނުމަށެވެ.

އެންޑީއޭ ބޯޑުގެ ޗެއާމަން އަބްދުލް ހަމީދު މިދިޔަ ބުރާސްފަތި ދުވަހު "މިހާރު" އަށް ވިދާޅުވީ މަސްތުވާތަކެތި ބޭނުންކުރާ މީހުންނަށް ހާއްސަކޮށްގެން ނަފްސާނީ ފަރުވާދޭ ކްލިނިކެއް ހުޅުވުމުން ފަރުވާއަށް ކިއުގައި ތިބި މީހުންގެ ނިސްބަތް ވަރަށް ކުޑަކުރެވިފައިވާ ކަމަށެވެ.

އެ ތަނުގައި ދުވާލަކު ދެ އޯޕީޑީ ހިންގަ އެވެ. އެންޑީއޭގެ ތެރޭގައި އަދި ގަލޮޅު ދަނޑުގައި އިތުރު އޯޕީޑީ ހިންގާތީ ޑޮކްޓަރަށް ދެއްކުމުގައި ކިއު ވަރަށް ކުޑަވާނެ ކަން ވެސް އޭނާ ފާހަގަކުރެއްވި އެވެ.

ކޮވިޑު-19އާ ގުޅިގެން ހިންމަފުށީ ރިހެބިލިޓޭޝަން ސެންޓަރު ބަންދުކޮށްގެން ދުވަސްތަކެއް ދިޔަ އެވެ. އެކަމަކު މިހާރު އެތަނަށް ވެސް މީހުން ފޮނުވަން ވަނީ ފަށައިފަ އެވެ. އޭގެ އިތުރުން މާލެ ސަރަހައްދުގައި ވަރަށް އަވަހަށް އިތުރު ދެ ޑިޓޮކްސް ސެންޓަރު ހުޅުވަން ތައްޔާރުވަމުން އަންނަ ކަމަށް ހަމީދު ވިދާޅުވި އެވެ.

"ރޯދަ މަސް ތެރޭގައި އިރާދަކުރެއްވިއްޔާ ބޮޑު ބަދަލެއް މާލެތެރެއިން ފެންނާނެ،" އޭނާ ވިދާޅުވި އެވެ.