އައިކޮމް ނިންމުންތައް ނުބަލަންކުރި ހުކުމް އިސްތިއުނާފަށް

އިންފޮމޭޝަން ކޮމިޝަނަރުގެ ނިންމުންތައް ހައި ކޯޓަށް ނުބެލޭނެ ކަމަށް ކުރި ހުކުމް ސުޕްރީމް ކޯޓަށް

25 މާޗް 2021

މައުލޫމާތު ހޯދައި ލިބިގަތުމުގެ ހައްގުގެ ގާނޫނުުގެ ދަށުން އިންފޮމޭޝަން ކޮމިޝަނަރު ނިންމަވާ ނިންމެވުންތަކުގެ މައްސަލަ ހައި ކޯޓަށް ނުބެލޭނެ ކަމަށް އެ ކޯޓުން ކުރި ހުކުމް ދައުލަތުން ސުޕްރީމް ކޯޓުގައި އިސްތިއުނާފް ކުރަން ނިންމައިފި އެވެ.

މުއިއްޒު އިބްރާހިމް

މައުލޫމާތު ހޯދައި ލިބިގަތުމުގެ ހައްގުގެ ގާނޫނު ބުނާގޮތުން މައުލޫމާތެއް ނުދިނުމަށް ނުވަތަ ދިނުމަށް އިންފޮމޭޝަން ކޮމިޝަނަރު ނިންމާ ނިންމުމެއް ހައި ކޯޓުގައި އިސްތިއުނާފް ކުރެވިދާނެ އެވެ. އެކަމަކު އެމްޑަބްލިއުއެސްސީން އިންފޮމޭޝަން ކޮމިޝަނަރުގެ އޮފީހާ ދެކޮޅަށް ހުށަހެޅި މައްސަލައެއްގައި ހައި ކޯޓުން ދާދިފަހުން ނިންމީ އެފަދަ މައްސަލަތައް ހައި ކޯޓަށް ނުބެލޭނެ ކަމަށެވެ.

އެޓާނީ ޖެނެރަލް އިބްރާހިމް ރިފްއަތު ކުރެއްވި ޓްވީޓެއްގައި ވަނީ ހައި ކޯޓުގެ އެ ހުކުމަކީ ގާނޫނުއަސާސީން ލިބިދޭ އިސްތިއުނާފް ކުރުމުގެ ހައްގު ގެއްލޭ ގޮތަށް ކޮށްފައިވާ ހުކުމެއް ކަމަށެވެ. އެހެންވެ، އާންމު މަސްލަހަތަށް ބަލައި އެ ހުކުމް ސުޕްރީމް ކޯޓުގައި އިސްތިއުނާފް ކުރާނެ ކަމަށް ރިފްއަތުގެ ޓްވީޓްގައިވެ އެވެ.

ޤާނޫނުއަސާސީން ލިބިދޭ އިސްތިއުނާފުކުރުމުގެ ޙައްޤު ގެއްލޭ ގޮތަށް @mvhighcourt އިން ނަންބަރު 2020/HC-A/149 މައްސަލަ ނިންމާފައިވާތީ، ޢާންމު މަޞްލަޙަތަށް ބަލައި، ޤާނޫނުއަސާސީގެ 56، 133 ގެ (ރ) އަދި (ބ) އަށް ރިޢާޔަތްކޮށް އެމައްސަލަ @SCMaldives ގައި އިސްތިއުނާފުކުރަން ނިންމައިފީމެވެ.
— I Riffath (@ibriffath) March 25, 2021

އޭޖީގެ ޓްވީޓް

އިންފޮމޭޝަން ކޮމިޝަނަރުގެ ނިންމުންތައް ހައި ކޯޓަށް ނުބެލޭނެ ކަމަށް އެ ކޯޓުން ނިންމީ ގާނޫނުގައި "އިންފޮމޭޝަން ކޮމިޝަނަރުގެ ނިންމުން" މިފަދައިން ބުނެފައި އޮންނާތީ އެވެ. އިންފޮމޭޝަން ކޮމިޝަނަރަކީ އޭގެ ޒާތުގައި މުއައްސަސާއެއް ނުވަތަ އޮފީހަކަށް ނުވާތީ ކަމަށް ބުނެ އެވެ. އެކަމަކު އެ ގާނޫނުގެ 72 ވަނަ މާއްދާ ބުނާގޮތުން "އިންފޮމޭޝަން ކޮމިޝަނަރު" ކަމަށް އެ ގާނޫނުގައި ބުނަނީ އިންފޮމޭޝަން ކޮމިޝަނަރުގެ މަސްއޫލިއްޔަތު އަދާކުރަން ގާއިމްކުރާ އޮފީސް ނުވަތަ މުއައްސަސާއަށެވެ.

Comments