ފައެއް ޖަހަން ފިރުޝާނަށް ހަރަދު ދޭނެ: އާސަންދަ

ބާ އިމާރާތެއްގެ ސީލިންގު ގައިމައްޗަށް ވެއްޓި، ކަނާތު ފައި ބުރިކޮށްލަން ޖެހުނު މުހަންމަދު ފިރުޝާން އެންސްޕާ އަށް އެދުމުން އޭނާ އަށް ޕްލާސްޓިކް ފައެއް ޖެހުމުގެ ހަރަދު ހަމަޖައްސައިދޭނެ ކަމަށް އާސަންދަ އިން މިރޭ ބުނެފި އެވެ.

އުމުރުން 17 އަހަރުގެ ފިރުޝާންގެ ފައި ބުރޮކޮށްލަން ޖެހުނީ މީގެ ދޮޅުމަހެއްހާ ކުރިން ގދ. ގައްދޫ ކައިރީގައި އޮންނަ ފަޅު ރަށަށް، ރަހުމަތްތެރިންނާ އެކު ދިޔަ ދަތުރެއްގައި ހިނގި ހިތާމަވެރި ހާދިސާއެއްގަ އެވެ. ރަހުމަތްތެރިންނާ އެކު ގޮސް އެ މީހުން ތިބީ ވަރަށް ބޮޑަށް ވީރާނާ ވެފައިވާ މޫދުކޮޮޓަރިއެއްގަ އެވެ. އެ އިމާރާތުގެ ސީލިންގު ވެއްޓުނީ ފިރުޝާން އެކަނި އެތަނުގައި ހުއްޓަ އެވެ.

ފިރުޝާން ޕްލާސްޓިކް ފަޔެއް ޖަހަން އާއިލާއިން އާންމުންގެ އެހީ ހޯދާ ވާހަކަ މިއަދު "މިހާރު" ގައި ޖެހުމާ އެކު އާސަންދަ އިން ބުނީ ޕްލާސްޓިކް ފައެއް ބޭނުންވާ ކަމަށް އެންސްޕާއަށް އެ އާއިލާ އިން ހުށަހަޅާފައި ނުވާ ކަމަށެވެ. އަދި އެކަމަށް އެދި އެންސްޕާ އަށް ހުށަހެޅުމުން އާސަންދަ މެދުވެރިކޮށް އެކަން ހަމަޖައްސަދޭނެ ކަމަށް އެތަނުން ބުންޏެވެ.

ފިރުޝާންގެ އާއިލާ އިން ބުނީ ޕްލާސްޓިކް ފައެއް ޖަހަން 5،000 ޑޮލަރު ބޭނުންވާ ކަމަށެވެ. ހޮސްޕިޓަލުގައި އެތައް ދުވަހެއް ބޭއްވުމަށް ފަހު އޭނާ ދޫކޮށްލީ މީގެ ތިން ދުވަސް ކުރިންނެވެ. އޭނާ މިހާރު އިންނަނީ ފުރޮޅުލީ ގޮނޑިއެއްގަ އެވެ.

ފަރުވާ އަށް ފިރުޝާން މާލެ ގެނައުމާއި ބޭސްފަރުވާގެ ކަންކަން ވެސް ހަމަޖައްސައިދީފައި ވަނީ އާސަންދައިންނެވެ.