އަކްޝޭ ދޫކޮށްލި ފިލްމެއް ރާޖާއި ޝްރަދާ އަށް

މިދިޔަ އަހަރުގެ ތެރޭގައި އަކްޝޭ ކުމާރު ސޮއިކުރި ކަމަށް ބުނާ، ޑައިރެކްޓަރު މުދައްސަރު އަޒީޒްގެ އާ ފިލްމުން އޭނާ ވަކިވެއްޖެ އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި އަކްޝޭ ފިލްމުން ވަކިވީ މިހާރު ވެސް ގިނަ ޕްރޮޖެކްޓްތަކަކަށް ސޮއިކޮށްފައި ހުރުމުން ވަގުތު ދޭން ދަތިވުމާ ގުޅިގެންނެވެ. ނަން އަދި އިއުލާން ނުކުރާ މި ފިލްމަކީ އަންނަ މެއި މަހުގެ 28 ގައި ރިލީޒްކުރާ އަކްޝޭގެ "ބެލް ބޮޓަމް" ގެ ޕްރޮޑިއުސަރުން ކަމަށްވާ ޕޫޖާ އެންޓަޓައިންމަންޓްގެ ވާޝޫ ބަގްނާނީ އާއި ދަރިފުޅު ޖެކީ ބަގްނާނީގެ ފިލްމެކެވެ. މީޑިއާތަކުން ކުރިން ބުނެފައި ވަނީ ފިިލްމަށް އަކްޝޭ ސޮއިކުރީ 100 ކްރޯޑް ރުޕީސް (13.4 މިލިއަން ޑޮލަރު) އަށް ކަމަށެވެ.

އަކްޝޭގެ "ސޫރިޔާވަންޝީ" އާއި "ބެލް ބޮޓަމް" އާއި "އަތުރަންގީ ރޭ" އާއި "ޕްރިތުވީރާޖް" މި އަހަރު ގެނެސްދޭން ނިންމާފައިވާ އިރު އޭނާގެ ކުރިއަށް ހުރި ޕްރޮޖެކްޓްތަކުގެ ތެރޭގައި "ބައްޗަން ޕާންޑޭ" އާއި "ރަކްޝާބަންދަން" އާއި "ރާމް ސެތޫ" އަދި "މިޝަން ލަޔަން" ހިމެނެ އެވެ.

ބޮލީވުޑް ހަންގާ އިން ބުނީ އަކްޝޭ ފިލްމު ދޫކޮށްލާފައިވާތީ މިހާރު މުދައްސަރުގެގެ ފިލްމުގެ ލީޑަށް މިހާރު ރާޖްކުމާރު ރާއޯ އާއި ޝްރަދާ ކަޕޫރް ނަގާފައިވާ ކަމަށެވެ. އެ ދެ ތަރިންނަކީ 2018 ގެ "އިސްތިރީ" ގެ ލީޑް ތަރިންނެވެ.

ޝްރަދާ މި ވަގުތު އަންނަނީ ލަވް ރަންޖަންގެ ނަން އިއުލާން ނުކުރާ ފިލްމެއްގެ މަސައްކަތް ރަންބީރް ކަޕޫރާ އެކު ކުރަމުންނެވެ. ޝްރަދާގެ ކުރިއަށް ހުރި ބޮޑެތި ޕްރޮޖެކްޓްތަކުގެ ތެރޭގައި "ނާގިން" ޓްރިލޮޖީ ހިމެނެ އެވެ.

ރާޖްގެ "ރޫހީ" އަންނަ މަހުގެ 11 ގައި ސިނަމާތަކަށް ގެންނަ އިރު، މިދިޔަ ހަފުތާގައި އޭނާ ވަނީ "ބަދާއީ ދޯ" ގެ ޝޫޓިން ނިންމާލައިފަ އެެވެ. އަދި މި އަހަރު އޭނާ ފެންނާނެ ފިލްމުތަކުގެ ތެރޭގައި "ހަމް ދޯ ހަމާރޭ ދޯ" ހިމެނެ އެވެ. އެ ފިލްމުގެ ޝޫޓިން ވެސް މިދިޔަ އަހަރުގެ ފަހުކޮޅު އޮތީ ނިންމާލައިފަ އެވެ.

"ހެޕީ ބާގް ޖާއޭގީ" އާއި "ދުލްހާ މިލްގަޔާ" އަދި "ޒިންދަގީ ރޮކްސް" ފަދަ ފިލްމުތައް ގެނެސްދިން މުދައްސަރުގެ އެންމެ ފަހުގެ ފިލްމަކީ 2019 ގައި ކާތިކް އާރިޔަނާއި އަނަންޔާ ޕާންޑޭ އާއި ބޫމީ ޕިޑްނޭކަރާ އެކު ގެނެސްދިން "ޕަތީ ޕަތުނީ އޯރް ވޯ" އެވެ.